លោក សម រង្ស៊ី​ អំពាវនាវឲ្យពលករខ្មែរនៅថៃឆ្លៀតពេល​ចុះឈ្មោះបោះឆ្នោត​​

លោក សម រង្ស៊ី កាលពីពេលកន្លង

ប្រធានគណបក្សសង្គ្រោះជាតិដែលកំពុងនិរទេសខ្លួននៅក្រៅប្រទេសអំពាវនាវឲ្យពលករខ្មែរនៅប្រទេសថៃ​ឲ្យចូលរួមចុះឈ្មោះបោះឆ្នោត​ឲ្យបានទាំងអស់គ្នាដើម្បីមានសិទ្ធិបោះឆ្នោតនៅពេលខាងមុខ។​

លោក សម​ រង្ស៊ី ថ្លែងទៅកាន់ប្រជាពលរដ្ឋ​ក្នុងវេទិកាមួយនៅក្នុងខេត្តបន្ទាយមានជ័យនៅព្រឹកនេះតាមវីឌីអូខនហ្វើរ៉េនជំរុញឲ្យពលករខ្មែរដែលកំពុងធ្វើការនៅប្រទេសថៃឆ្លៀតពេល​ចុះឈ្មោះបោះឆ្នោតបើទោះជាមានការមមាញឹកនៅក្រៅប្រទេសក្តី។​ លោក សម រង្ស៊ី ក៏ណែនាំឲ្យមន្ត្រីរបស់ខ្លួនជួយសម្របសម្រួល​ដើម្បីបង្កភាពងាយស្រួលឲ្យប្រជាពលរដ្ឋបានចុះឈ្មោះនិង បានបោះឆ្នោត។ លោកមានប្រសាសន៍ថា៖ “យើងជួយលើកទឹកចិត្តជួយជំរុញឲ្យបងប្អូនយើងដែលធ្វើការនៅប្រទេសថៃ ជួយពួកគាត់លើកទឹកចិត្តឲ្យពួកគាត់លៃលកមកចុះឈ្មោះឲ្យបានទាន់ពេលវេលានិងលៃលកមកបោះឆ្នោតនៅប្រទេសកម្ពុជា​ឲ្យបានច្រើនជា​អតិបរមាដើម្បីរួមចំណែកក្នុងការផ្លាស់ប្តូរដែលយើងកំពុងរួមចំណែកទាមទារឲ្យទាល់តែបានទាំងអស់គ្នា”។​

លោក សម រង្ស៊ី ក៏ធ្លាប់បានស្នើឲ្យមានការធ្វើវិសោធនកម្មច្បាប់បោះឆ្នោត​ដើម្បី​រៀបចំនីតិវិធីសម្រាប់ឲ្យប្រជាពលរដ្ឋ​ខ្មែរនៅ ក្រៅប្រទេសមានសិទ្ធិបោះឆ្នោតដែរតែភាគីគណបក្សប្រជាជនកម្ពុជាបដិសេធដោយលើកឡើងថានីតិវិធីស្មុគស្មាញចំណាយ​លុយច្រើន ហើយម្យ៉ាងបច្ចុប្បន្នត្រូវធ្វើយ៉ាងណាពង្រឹងនីតិវិធីបោះឆ្នោតនៅក្នុងប្រទេសសិន។​

អ្នកនាំពាក្យគណៈកម្មាធិការជាតិរៀបចំការបោះឆ្នោតលោក ហង្ស ពុទ្ធា មានប្រសាសន៍ថាបច្ចុប្បន្នមិនទាន់មានផែនការក្នុងការជួយសម្រួលឲ្យពលរដ្ឋខ្មែរនៅក្រៅប្រទេសអាចចុះឈ្មោះឬបោះឆ្នោតបាននោះទេ។ លោកបន្តថា៖ “សព្វថ្ងៃរៀបចំកម្រិតនៅក្នុងប្រទេសឲ្យបានគិតថាប្រសើរហើយ។ ក្បែរព្រំដែននៅក្នុងប្រទេសដែរតើយើងមានគិតពង្រឹងផ្នែកហ្នឹងទេ?​ មិនទាន់ពិភាក្សាដល់ហ្នឹងទេ ប៉ុន្តែអ្វីដែល គិតសួរថាបើ គ ដាក់នៅតាមព្រំដែនមែនសួរថាទី១ថៅកែនៅប្រទេសជិតខាងហ្នឹងគេឲ្យពលករខ្មែរមកចុះឈ្មោះទេទី២បើធ្វើចឹងវាអយុត្តិធម៌ចំពោះអ្នកនៅប្រទេសក្រៅដែលអត់នៅជាប់ព្រំដែន”។

របាយការណ៍ក្រសួងការងាររបស់ថៃឲ្យដឹងថាពលរដ្ឋខ្មែរដែលកំពុងធ្វើការងារទាំងខុសច្បាប់និងស្របច្បាប់នៅក្នុងប្រទេសថៃមានជាង១លាននាក់។ ទន្ទឹមនឹងនោះអង្គការសង្គមស៊ីវិលនៅក្នុងស្រុកក៏ធ្លាប់បង្ហាញរបាយការណ៍ដែរថាពលរដ្ឋខ្មែររាប់ម៉ឺនរាប់សែនទៀតកំពុងធ្វើការនៅក្នុងប្រទេសមួយចំនួនដូចជាកូរ៉េខាងត្បូង ម៉ាឡេស៊ី ជប៉ុន និងចិនជាដើម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered