រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាល លោក ខៀវ កាញារីទ្ធ បានរំឭកពីការជាប់ពន្ធនាគារចំពោះអ្នកសារព័ត៌មាន ទាំងឡាយណាដែលនៅតែបន្តយកតួនាទីរបស់ខ្លួនទៅប្រើប្រាស់ជាមធ្យោបាយសម្រាប់បិទបាំងលើប័ណ្ណសម្គាល់យាន្តយន្ត រំលោភតួនាទីរាជការសាធរណៈ។
លោក ខៀវ កាញារីទ្ធ បានសរសេរនៅលើបណ្តាញសង្គមផ្ទាល់របស់លោក កាលពីថ្ងៃទី១៣ខែកុម្ភៈថា”រំឭកអ្នកស្រឡាញ់ស្លាកលេខPress បើនគរបាលចាប់ មិនមែនពិន័យទេ តែគឺគុក”។
មាត្រា៧៩នៃច្បាប់ចរាចរណ៍ផ្លូវគោកថ្មីចែងថា ជនណាក្លែងប័ណ្ណបើកបរ បណ្ណសំគាស់យានយន្ត ស្លាកលេខសម្គាល់យានយន្ត ឬលិខិតអនុញ្ញាតផ្សេងៗ ដែលចេញដោយរាជការសាធារណៈត្រូវផ្តន្ទាទោសដាក់ពន្ធនាគារពី៥ទៅ១០ឆ្នាំតាមបញ្ញត្តិមាត្រា៦២៩នៃក្រមព្រហ្មទណ្ឌ។
កន្លងទៅគេប្រទះឃើញ អ្នកសារព័ត៌មានមួយចំនួនបានប្រើប្រាស់ស្លាកលេខPress ជាមធ្យោបាយ សម្គាល់យានយន្តរបស់ខ្លួន ធ្វើដំណើរតាមដងផ្លូវសាធារណៈនានា។ ករណីនេះធ្វើឲ្យសាធារណជនខ្លះយល់ច្រឡំថា ស្លាកលេខPress នេះ ជាស្លាកលេខស្របច្បាប់ ដែលចេញដោយក្រសួងព័ត៌មាន។
