អំពើហិង្សាបានកើតឡើងជាបន្តបន្ទាប់នៅគ្រាដែលអតីតបុគ្គលិកក្រុមហ៊ុនកាពីតូលបានតវ៉ាជាច្រើនខែប្រឆាំងនឹងក្រុមហ៊ុននេះដែលបញ្ឈប់ពួកគេពីការងារ។ ប៉ុន្តែអំពើហិង្សាដែលធ្ងន់ធ្ងរជាងគេបានកើតឡើងនៅក្នុងខែមករា២០១៦។ អតីតអ្នកបើករថយន្តកាពីតូលអះអាងថាហិង្សានោះប្រព្រឹត្តិដោយអ្នករត់រ៉ឺម៉កកង់បីរបស់សមាគមរួបរួមគ្នាដើម្បីអភិវឌ្ឍកម្ពុជាដែលការពារឲ្យក្រុមហ៊ុននោះប្រដាប់ដោយបំពង់ទីព ញញួរ ដែកសសៃ ស្នាប់ដៃ ដំថ្ម បានវាយទាត់ធាក់ទៅលើអ្នកតវ៉ាបណ្តាលឲ្យរងរបួសធ្ងន់ចំនួន១៤នាក់អ្នកខ្លះបាក់ដៃ បែកក្បាល ប្រះឆ្អឹង គ្រំាឈាម។ ក្រោយហិង្សានោះសមត្ថកិច្ចបានចាប់អ្នតវ៉ា២នាក់ ដែលម្នាក់ជាអតីតអ្នកបើករថយន្តក្រុងល្បីឈ្មោះនេះនិងម្នាក់ទៀតជាសមាជិកសហភាពការងារកម្ពុជាដែលឃ្លាំមើលការតវ៉ា។
ឈរនៅក្រោមសំយ៉ាបផ្ទះស្ថិតនៅភូមិឡកំបោ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ អ្នកស្រី ណាត់ ស្រីនាថ ត្រូវជាភរិយារបស់អតីតអ្នកបើករថយន្តកាពីតូលលោក ណន វណ្ណា ដែលកំពុងជាប់ឃុំនៅពន្ធនាគារព្រៃសបានរៀបរាប់ថា ស្វាមីគាត់ធ្វើការងារនៅក្រុមហ៊ុនកាពីតូលមិនដែលមានថ្ងៃឈប់សម្រាកជាពិសេសថ្ងៃបុណ្យជាតិ។ អ្នកស្រីថាករណីនេះទើបស្វាមីគាត់នាំគ្នាបាតុកម្មតវ៉ាឲ្យក្រុមហ៊ុនគោរពច្បាប់ការងារនិងទទួលយកអតីតអ្នកបើករថយន្តទំាងអស់ចូលធ្វើការវិញ។
អ្នកស្រី ណាត់ ស្រីនាថ បញ្ជាក់ថាអំឡុងពេលស្វាមីគាត់តវ៉ាក្បែរក្រុមហ៊ុនកាពីតូលនោះក៏មានការប៉ះទង្គិចគ្នាជាមួយអ្នករត់រ៉ឺម៉កកង់បីរបស់សមាគមរួបរួមគ្នាដើម្បីអភិវឌ្ឍកម្ពុជា ហើយអាជ្ញាធរមិនចាប់អ្នកបង្កហិង្សាបែរជាចាប់ស្វាមីរបស់គាត់ដែលមិនបានប្រព្រឹត្តបទល្មើសដាក់ពន្ធនាគារដោយអយុតិ្តធម៌ទៅវិញ។ អ្នកស្រីបន្តថា៖ ”គាត់ទាមទារច្បាប់ការងារទាមទារឲ្យគេទទួលយកគាត់ធ្វើការងារវិញ ប៉ុន្តែក្រុមហ៊ុនកាពីតូលថែមទំាងប្រើអំពើហិង្សាដាក់យើងហើយថែមទំាងចាប់យើងដាក់ឃុំឃំាងទៀតទំាងគាត់អត់មានកំហុសអីអយុត្តិធម៌ណាស់”។
ស្ត្រីមេផ្ទះវ័យ២៧ឆ្នាំត្រូវជាភរិយារបស់សមាជិកសហភាពការពារងារកម្ពុជាលោក រស់ ស៊ីផៃ ឈរនៅមុខផ្ទះស្ថិតនៅរាជធានីភ្នំពេញប្រាប់អ្នកយកព័ត៌មានVODថាស្វាមីគាត់ក៏ត្រូវបានអាជ្ញាធរចាប់ដាក់ពន្ធនាគារដោយអយុត្តិធម៌ផងដែរ។ អ្នកស្រី ឃឹម វ៉ាន់ដា អះអាងថាស្វាមីគាត់មិនបានធ្វើខុសដូចការចោទប្រកាន់នោះទេព្រោះគាត់គ្រាន់តែជួយទាមទារសិទ្ធិជូនអតីតអ្នកបើករថយន្តកាពីតូលជាង៤០នោះតែប៉ុណ្ណោះ។ អ្នកស្រីបន្ថែមថា៖ “គាត់មើលទៅមិនមានអីខុសឆ្គងត្រង់ណាសោះហើយដល់ពេលខាងសមត្ថកិច្ចចាប់ប្តីខ្ញុំខាងប្តីខ្ញុំគាត់គ្រាន់តែសុំទាមទារយកយុត្តិធម៌ចំពោះតៃកុងឡាន”។
អ្នកស្រី ឃឹម វ៉ាន់ដា លើកឡើងទៀតថាក្រោយពីស្វាមីជាប់ពន្ធនាគារធ្វើឲ្យគ្រួសារគាត់ជួបបញ្ហាប្រឈមច្រើនដោយសារត្រូវចំណាយថវិកាសម្រាប់ឲ្យកូនទៅសិក្សានៅសាលារៀនឯកជននិងការចំណាយប្រចំាថ្ងៃ។
វ័យ៤៥ឆ្នាំលោក ថេប វុទ្ធី ដែលស្ថិតនៅក្នុងករណីហិង្សាអះអាងថាគាត់ត្រូវបានក្រុមអ្នករត់រ៉ឺម៉កកង់បីរបស់សមាគមរួបរួមគ្នា ដើម្បីអភិវឌ្ឍកម្ពុជាយកញញ៉ួវាយគាត់ឲ្យរងរបួសចំក្បាលនិងដៃខណៈពួកលោកជាង៤០នាក់មិនមានសម្ភារៈអ្វីការពារខ្លួននោះទេ។ លោកអំពាវនាវឲ្យរដ្ឋាភិបាលនិងស្ថាប័នពាក់ព័ន្ធត្រូវស៊ើបអង្កេតចាប់ជនដៃដល់មកផ្តន្ទាទោស។ លោកបន្ថែមថា៖ “ខ្ញុំក៏សុំណូមពរដល់ខាងរាជរដ្ឋាភិបាលនិងក្រសួងពាក់ព័ន្ធទំាងអស់សូមឲ្យវែកមុខរកឃាតករមកផ្តន្ទាទោសតាមច្បាប់ជនដៃដល់ហ្នឹងតែម្តងដែលប្រើអំពើហិង្សាមកលើពួកខ្ញុំហាក់បីដូចជាសាហាវព្រៃផ្សៃបំផុតដែលពួកខ្ញុំដែលជាអ្នកមកតវ៉ាទាមទាររកយុត្តិធម៌មិនអាចទទួលយកបាន”។
អ្នករងរបួសម្នាក់ទៀតលោក គឹម ធី អតីតអ្នកបើរថយន្តកាពីតូលឈរស្ពាយដៃដែលបាក់ឆ្អឹងម្ខាងស្ថិតនៅសង្កាត់ទឹកថ្លា រាជធានីភ្នំពេញបានរៀបរាប់ថាគាត់បើកឡានឲ្យក្រុមហ៊ុនកាពីតូលនេះរយៈពេលជិត៧ឆ្នាំ ប៉ុន្តែក្រុមហ៊ុនបានបញ្ឈប់ដោយមិនបានទូទាត់ប្រាក់សំណងតាមច្បាប់ការងារនោះទេ។ លោកថាបើក្រុមហ៊ុនមិនដោះស្រាយជូនពួកគេនោះពួកគេនឹងធ្វើបាតុកម្មជាថ្មីទៀត។ លោកបន្តថា៖ “ខ្ញុំនៅតែទាមទារឲ្យថៅកែដោះស្រាយឲ្យពួកខ្ញុំឲ្យមានច្បាប់ការងារបានខ្ញុំឈប់បើមិន[ដោះស្រយ]ខ្ញុំនៅតែធ្វើបន្តទៀត ហើយទាមទារឲ្យថៅកែឲ្យដោះស្រាយឲ្យពួកខ្ញុំឲ្យបាន”។
ក្រោយពីអំពើហិង្សាកើតឡើងនោះសហភាពការងារដែលមានបណ្តុំសហព័ន្ធសហជីពជាច្រើនមកពីវិស័យកាត់ដេរ ទេសចរណ៍ និងសមាគមសេដ្ឋកិច្ចក្រៅក្រព័ន្ធផងនោះបានចេញសេចក្តីថ្លែងការណ៍ថាឈ្មោះ ស៊ុត ម៉េងហ៊ី ជាអ្នកបញ្ជាឲ្យប្រើហិង្សាលើអ្នកតវ៉ា។ សេចក្តីថ្លៃងការណ៍បញ្ជាក់ថានៅពេលកើតហេតុព្រះរាជអាជ្ញានិងអាជ្ញាធរខណ្ឌ៧មករាមានវត្តមាននៅទីនោះ ប៉ុន្តែមិនបានចាប់ខ្លួនភាគីម្ខាងទៀតជាសមាជិករបស់សមាគមរូបរួមគ្នាដើម្បីអភិវឌ្ឍកម្ពុជាដែលមានអាវុធវាយដំអ្នកតវ៉ានោះទេតែសមត្ថកិច្ចបែរជាទៅចាប់ខ្លួនអ្នកតវ៉ាដែលត្រូវបានគេវាយឲ្យរងរបួសទៅវិញ។
អ្នកតវ៉ាដែលសមត្ថកិច្ចចាប់ខ្លួនមានឈ្មោះ រស់ ស៊ីផៃ និង ណន វណ្ណា ពួកគេត្រូវបានសាលាដំបូងរាជធានីភ្នំពេញសម្រេចឲ្យឃុំខ្លួនបណ្តោះអាសន្នកាលពីថ្ងៃទី៨ខែមករាចោទពីបទហិង្សាដោយចេតនាមានស្ថានទម្ងន់ទោស ការប្រឆាំងនឹងអ្នករាជការសាធារណៈ និងបទចោទមួយទៀតគឺរារាំងជាឧបសគ្គដល់ចរាចរណ៍សាធារណៈ។
ប្រធានសហភាពការងារកម្ពុជាលោក អាត់ ធន់ អះអាងថាចៅក្រមសាលាដំបូងរាជធានីភ្នំពេញដែលសម្រេចឃុំខ្លួនមនុស្សពីរនាក់ដែលទាមទារឲ្យក្រុមហ៊ុនកាពីតូលគោរពលក្ខខណ្ឌការងារនោះមានភាពលំអៀងដោយលោកថាមិនបានស៊ើបអង្កេតឲ្យបានច្បាស់លាស់ស្តាប់តែភាគីអាជ្ញាធរ។ លោកបន្ថែមថា៖ “ចៅក្រមហាក់ដូចជាមានការលំអៀងដោយសារតែដាក់ឃុំបណ្តោះអាសន្នទៅលើជនរងគ្រោះពីរនាក់ទៀត។ អញ្ចឹងខ្ញុំគិតថាតាមពិតការស៊ើបអង្កេតរបស់គាត់មានសិទ្ធិ ប៉ុន្តែបើសិនជាគាត់ដាក់ឲ្យនៅក្រៅឃុំដើម្បីស៊ើបអង្កេតខ្ញុំគិតថាវាប្រសើរជាងមិនគួរយកឆន្ទានុសិទ្ធិមួយដាក់ឲ្យនៅក្នុងឃុំដើម្បីត្រួតពិនិត្យសូម្បីតែគាត់មិនបានប្រព្រឹត្តហើយគាត់ជាជនមួយដែលមានអត្តសញ្ញាណច្បាស់លាស់ដែលយើងគិតថាគាត់មិនអាចជាបញ្ហាដល់ការស៊ើបអង្កេតរបស់ចៅក្រមទេ ប៉ុន្តែចៅក្រមដាក់ដោយសារតែអាចនិយាយថាព័ត៌មានបន្តិចបន្តួចពីប៉ូលីសមកគឺដាក់តែម្តងអញ្ចឹងខ្ញុំគិតថាធ្វើបែបហ្នឹងវានាំឲ្យភាពអយុត្តិធម៌ហ្នឹងហើយ”។
យ៉ាងណាក៏ដោយលោក អាត់ ធន់ ជំរុញឲ្យក្រសួងមហាផ្ទៃនិងឧត្តមក្រុមប្រឹក្សានៃអង្គចៅក្រមពិនិត្យមើលពីវិធានការរបស់អាជ្ញាធរខណ្ឌ៧មករានិងមន្ត្រីតុលាការដែលកាន់សំណុំរឿងនេះដែលលោកថាដើម្បីរកយុត្តិធម៌ឲ្យជនរងគ្រោះនិងដើម្បីបង្កើនជំនឿដល់សាធារណជនចំពោះការអនុវត្តច្បាប់នៅកម្ពុជា។
ប្រធានសាលាដំបូងរាជធានីភ្នំពេញលោក តំាង ស៊ុនឡាយ មានប្រសាសន៍ថាករណីហិង្សាលើអតីតអ្នកបើកឡានឲ្យក្រុមហ៊ុនកាពីតូលនោះតុលាការនៅតែបន្តធ្វើការស៊ើបអង្កេតចាប់អ្នកពាក់ព័ន្ធផ្សេងទៀត។ លោកបន្តថា៖ ”តុលាការគេធ្វើទំាងអស់ឲ្យតែមានកំហុសមានប្រព្រឹត្តអំពើបទល្មើសគេកំពុងរកហើយរាល់ថ្ងៃគេធ្វើទំាងអស់ទំាងសងខាងដូចថាវៃទៅវៃមកត្រូវរកអ្នកប្រព្រឹត្ត គេកំពុងអង្កេតហ្នឹងឯងស៊ីជម្រៅខ្ញុំមិនបានតាមគ្រប់រឿងនោះទេប៉ុន្តែគេត្រូវតែធ្វើគោលការណ៍ហ្នឹងនោះ”។
អនុប្រធានផ្នែកសិទ្ធិមនុស្សរបស់សមាគមការពារសិទ្ធិមនុស្សអាដហុកលោក ណៃ វ៉ង់ដា ដែលចុះតាមដានករណីនេះផ្ទាល់ យល់ថាតុលាការត្រូវដោះលែងអ្នតវ៉ាពីរនាក់ឲ្យមានសេរីភាពនិងស៊ើបអង្កេតឡើងវិញចាប់ជនល្មើសពិតប្រាកដដាក់ពន្ធនាគារដើម្បីកុំឲ្យមាននិទណ្ឌភាពនៅកម្ពុជា។ លោកមានប្រសាសន៍ថា៖ “ក្នុងនាមអង្គការសិទ្ធិមនុស្សយើងសំណូមពរឲ្យមានការដោះលែងអ្នកដែលជាប់ឃុំទំាងពីរនាក់នោះត្រឡប់មកវិញ ហើយមានការដាក់ទោសទណ្ឌទៅលើអ្នកដែលប្រព្រឹត្តបទល្មើសគឺក្រុមដែលប្រើហិង្សាទៅលើអ្នកតវ៉ាដោយសន្តិវិធីហ្នឹង”។
យ៉ាងណាក៏ដោយក្រុមអ្នកតវ៉ាអះអាងថាបើស្ថាប័នពាក់ព័ន្ធរបស់រដ្ឋាភិបាលរួមទាំងតុលាការផងមិនផ្តល់យុត្តិធម៌ដល់ពួកគេទេពួកគេព្រមានថានឹងធ្វើយុទ្ធនាការតាមដងផ្លូវក្នុងរាជធានីភ្នំពេញនាពេលឆាប់ៗនេះអំពាវនាវឲ្យសាធារណជនផ្អាកប្រើប្រាស់សេវាកម្មក្រុមហ៊ុនកាពីតូលដឹកអ្នកដំណើរដែលពួកគេថាដើម្បីឲ្យក្រុមហ៊ុននេះគោរពច្បាប់ការងារនិងចាប់ជនល្មើសមកផ្តន្ទាទោសតាមច្បាប់៕
