អភិបាលខេត្តអះអាងថាកំពង់ផែស្វយ័តក្រុងព្រះសីហនុពិតជាបានចាក់បំពេញដីជ្រុលចូលទៅក្នុងសមុទ្របន្តិចមែនដូចការចុះផ្សាយក្នុងសារព័ត៌មានកាលពីពេលថ្មីៗនេះ ប៉ុន្តែលោកថាការចាក់បំពេញនេះត្រូវបានសម្រួលរួចហើយ។
អភិបាលខេត្តព្រះសីហនុ លោក យន្ត មីន ប្រាប់វីអូឌីថាពិតជាមានការចាក់ជ្រុលចូលទៅក្នុងទឹកនៃឆ្នេរសមុទ្រពិតមែន ដោយលោកថាអ្នកចាក់ដីបានចាក់ចូលហួស។ លោកបន្ថែមថាក្រោយពីមន្ត្រីជំនាញចុះត្រួតពិនិត្យរួចមក កំពង់ផែស្វយ័តបានជួយសម្រួលនិងបានកាយដីទាំងនោះវិញអស់ហើយ។
លោកមានប្រសាសន៍ថា៖ “ការពិតដីនោះមិនមែនដីគាត់ផ្ទាល់ខ្លួនទេជាដីរបស់អង្គភាពរបស់គាត់ទេដីហ្នឹង គាត់មានផែនការចាក់ដីហ្នឹងដើម្បីរាបធ្វើដីហ្នឹងឡើងវិញ តែដល់ពេលអ្នកចាក់នោះគាត់ចាក់ជ្រុលចូលទៅសមុទ្របន្តិចទៅតែឥឡូវគាត់កែវិញហើយតើ! “។
ក្នុងលិខិតមួយច្បាប់ចុះថ្ងៃទី១៧ខែកុម្ភៈ ប្រធានអគ្គនាយកកំពង់ផែស្វយ័តក្រុងព្រះសីហនុ លោក លូ គឹមឈន់ បានជម្រាបជូនអភិបាលខេត្តថាដីដែលបានឈូសឆាយនោះគឺជាដីតំបន់អភិវឌ្ឍន៍ដែលជាកម្មសិទ្ធិរបស់កំពង់ផែនិងពុំមែនជាកម្មសិទ្ធិឯកជនរបស់បុគ្គលណាមួយឡើយ។ លោកបន្តថាដីដែលតំបន់អភិវឌ្ឍន៍នេះគឺកំពង់ផែបានទិញនិងរក្សាទុកសម្រាប់តម្រូវការអភិវឌ្ឍកំពង់ផែនាពេលអនាគត។ លោកបញ្ជាក់ថា៖ “ចំពោះការចាក់ដីធ្វើផ្លូវព័ទ្ធជុំវិញតំបន់អភិវឌ្ឍន៍ដែលស្ថិតក្នុងភូមិគគីរ ឃុំបិតត្រាំង នេះគឺស្ថិតនៅលើដីចម្ការដូងចាស់ពីសង្គម ពុំមែនលើផ្ទៃសមុទ្រនោះទេ ក្នុងគោលបំណងការពារទប់ស្កាត់ការទន្ទ្រានកាន់កាប់ដីពីជនមួយចំនួនប៉ុណ្ណោះ”។
លោក លូ គឹមឈន់ ប្រាប់វីអូឌីថាការចាក់ដីនេះគឺដើម្បីត្រៀមពង្រីកកំពង់ផែខេត្តហើយលោកថាពុំមានការចាក់ដីចូលសមុទ្រនោះទេ។ លោកមានប្រសាសន៍ថា៖ “អត់មានទេអូន អត់មានចាក់ក្នុងសមុទ្រទេ យើងចាក់ទៅក្នុងដីចម្ការដូងហេងហេង កាលពីសម័យសង្គមហ្នឹងណា ហើយអូនឯងគិតមើលបើវាជាសមុទ្រវាអាចដាំដូងបានទេ វាអត់ទេ … បាទគឺយើងអត់មានចាក់ដីចូលទៅក្នុងសមុទ្រនោះទេ ហើយខ្ញុំថតច្បាស់លាស់មានឯកសារ ប៉ុន្តែគ្រាន់តែបងប្អូនដែលគាត់ដែលមានបំណងចោទប្រកាន់នោះ គាត់ថតបច្ចេកទេសដែលគាត់ថតនោះមើលឃើញកណ្តាលសមុទ្រតែហ្មង។ ប៉ុន្តែអ្នកដែលមើលជាក់ស្តែងខ្ញុំឃើញថាដីហ្នឹងនៅក្នុងដែនមានដើមដូងដុះនៅពីក្រៅហ្នឹង ហើយបើយើងគិតមើលថាបើចាក់ក្នុងសមុទ្រម៉េចក៏មានដើមដូងដុះពីខាងក្រៅកើត”។
លោក លូ គឹមឈន់ បានបន្ថែមថាកំពង់ផែស្វយ័តបានកាយដីដែលចាក់ជាផ្លូវព័ទ្ធជុំវិញតំបន់អភិវឌ្ឍន៍នោះវិញអស់ហើយ ដោយលោកថាមិនចង់មានបញ្ហាច្រើនលើករណីនេះ។
បើតាមលោក លូ គឹមឈន់ ផ្ទៃកំពង់ផែបច្ចុប្បន្នមានប្រមាណ៧០ហិលតា ដែលលោកថាក្នុង១ឆ្នាំផ្ទៃកំពង់ផែត្រូវរីកប្រមាណជា៧ហិកតា។ លោកបន្ថែមថាការចាក់ដីនេះគឺដើម្បីត្រៀមអភិវឌ្ឍកំពង់ផែសម្រាប់ទៅថ្ងៃមុខ ដែលមានផ្ទៃដីសរុប១៥០ហិកតា៕