រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ប្រាក់ សុខុន បានចេញលិខិតបំភ្លឺអំពីការដកតំណែងប្រធានក្រុមប្រឹក្សាភិបាល និង អគ្គនាយកនៃទូរគមនាគមន៍កម្ពុជា ថាមិនមានជាប់ពាក់ព័ន្ធនឹងការប្រព្រឹត្តកំហុសនោះទេ។
កាលពីថ្ងៃទី១៨ ខែកុម្ភៈ ក្រសួងប្រៃសណីយ៍បានសម្រេចដកលោក មាស ប៉ូ ពីតំណែងជាប្រធានក្រុមប្រឹក្សាភិបាល ដោយដាក់លោក ខូវ មករា ដែលមានតួនាទីជាអនុរដ្ឋលេខាធិការក្រសួងជំនួសវិញ។ ក្រសួងក៏សម្រេចដក លោក ឡាយ ម៉ារីវ៉ូ ដែលមានមុខតំណែងពីប្រតិភូរាជរដ្ឋាភិបាលទទួលបន្ទុកជាអគ្គនាយកនៃទូរគមនាគមន៍ ជំនួសដោយ លោក សន វី ដែលកាលពីមុនមានតួនាទីជាអគ្គនាយករងនៃទូរគមនាគមន៍កម្ពុជា។
ក្រសួងប្រៃសណីយ៍បានបញ្ជាក់ថា នេះជាការកែសម្រួលរចនាសម្ព័ន្ធដឹកនាំរបស់អង្គភាពនេះ ក្រោយពីរកឃើញថា មានការកិបកេងលុយជាង ២០ម៉ឺនដុល្លារ និង ការបំពេញការងារ មាន”ភាពខ្វះខាតធ្ងន់ធ្ងរ”។
រដ្ឋមន្ត្រីក្រសួងប្រៃសណីយ៍លោក ប្រាក់ សុខុន បានចេញនៅលិខិតបំភ្លឺមួយនៅថ្ងៃទី ១៩ ខែកុម្ភៈ ថាការដកតំណែងក្រុមប្រឹក្សាភិបាល និង អគ្គនាយកនៃទូរគមនាគមន៍នោះ លោក មាស ប៉ូ មិនពាក់ព័ន្ធនឹងកំហុសនោះទេ ហើយលោកនៅតែមានតំណែងជាអនុរដ្ឋលេខាធិការក្នុងក្រសួង។
ក្នុងលិខិតបំភ្លឺបន្ថែមថា ចំណែកឯការដូរប្រធានក្រុមប្រឹក្សាភិបាលដោយដាក់លោក ខូវ មករា នោះគ្រាន់តែជាការចាប់ដៃគូស័ក្តសម និង ស៊ីគ្នាជាមួយអគ្គនាយកស្ដីទី លោក សន វី ប៉ុណ្ណោះ។
ក្នុងលិខិតដដែលឲ្យដឹងថា ករណីប្រព្រឹត្តអំពើពុករលួយជាមួយនឹងប្រាក់ជាង ២០ ម៉ឺន ដុល្លារនោះក្រុមការងារអធិការដ្ឋានរបស់ក្រសួងប្រៃសណីយ៍ និង ក្រុមការងារអង្គភាពប្រឆាំងអំពើរពុករលួយនៅតែបន្តស៊ើបអង្កេតករណីនេះ។
បុគ្គលិករបស់ទូរគមនាគមន៍កម្ពុជាម្នាក់ប្រាប់វីអូឌី(VOD)ក្នុងលក្ខខណ្ឌមិនបញ្ចេញឈ្មោះថា ពេលកន្លងមក អង្គភាពសាធារណៈរបស់រដ្ឋមួយនេះតែងតែមានបញ្ហាមិនចេះចប់ទាក់ទងនឹងការកិបកេងប្រាក់របស់អង្គភាពនិងបានធ្វើឲ្យអាជីវកម្មអង្គភាពមួយនេះដំណើរការមិនល្អ។
គួរបញ្ជាក់ថា កាលពីឆ្នាំ២០១៥ បុគ្គលិកទូរគមនាគមន៍មួយចំនួនបានចេញមុខតវ៉ាជាបន្តបន្ទាប់ ដោយពួកគេស្នើឲ្យក្រុមប្រឹក្សាភិបាលរបស់ស្ថាប័ននេះស៊ើបអង្កេតទាក់ទងនឹងការបាត់ថវិកាប្រមាណ២៣ម៉ឺនដុល្លារអាមេរិក។ ទាក់ទងនឹងការតវ៉ានេះ បុគ្គលិករបស់ទូរគមនាគមន៍ពីរនាក់ដែលម្នាក់ធ្វើការផ្នែកទារបំណុលនិងម្នាក់ទៀតផ្នែកកាន់លុយ ត្រូវបានចោទប្រកាន់ថា ធ្វើឲ្យបាត់លុយ២៣ម៉ឺនដុល្លារនេះ ប៉ុន្តែពួកគេបានបដិសេធនឹងការចោទប្រកាន់នោះ៕