ធនាគារជាតិកម្ពុជាក្រើនរំឭកអ្នកលក់ដូរ​​កុំឲ្យ​បដិសេធមិនទូទាត់លុយ​រៀល​

ក្រដាសប្រាក់១០ម៉ឺនរៀល(រូបភាពពីហ្វេសប៊ុកធនាគារជាតិនៃកម្ពុជា)

ធនាគារជាតិនៃកម្ពុជា​បានក្រើនរំឭក​ដល់អ្នកលក់ដូរនិងអ្នកធ្វើអាជីវករ​ផ្សេងៗ​ថាកុំឲ្យ​​បដិសេធមិនទទួលយកលុយ​រៀល ដោយ​ថាការមិនយកលុយរៀល​គឺខុសនឹង​ច្បាប់​។​

នៅក្នុងទំព័រហ្វេសប៊ុក​ផ្លូវការ ធនាគារជាតិ​នៃកម្ពុជា​បាន​សរសេរថាជនដែលបដិសេធ​មិនទទួលលុយរៀលនឹង​ត្រូវពិន័យ​ជាប្រាក់​ស្មើ​នឹង​១០០ដងនៃ​ប្រាក់ដែល​ជននោះមិនព្រមទូទាត់ពីអតិថិជន។ ធនាគារបញ្ជាក់​ថា៖ “ជនណាពុំព្រមទូទាត់រូបិយវត្ថុដែលមានតម្លៃនីត្យានុកូលនិងមានតេជានុភាពធ្វើសេរីកាលើដែនដីនៃព្រះរាជាណាចក្រកម្ពុជា ជននោះនឹងត្រូវបានផ្តន្ទាទោសពិន័យជាប្រាក់ស្មើនឹង១០០ដងនៃទឹកប្រាក់ដែលពុំព្រមទូទាត់នោះ”។

ធនាគារ​ឲ្យ​ដឹង​ថា​ការពិន័យ​នេះ​មាន​នៅក្នុងមាត្រា៤៣និង៦៤នៃច្បាប់ស្តីពីការរៀបចំនិងការប្រព្រឹត្តទៅនៃធនាគារជាតិនៃកម្ពុជា ដែលត្រូវបានប្រកាសឲ្យ​ប្រើដោយព្រះមហាក្សត្រកាលពីឆ្នាំ១៩៩៦។ ធនាគារ​បន្ថែម​ថា៖ “ក្នុងពេលដែលមិនបានដកចេញពីចរាចរទេនោះ ក្រដាសប្រាក់ដែលបោះផ្សាយដោយធនាគារកណ្តាលគឺជារូបិយវត្ថុមានតម្លៃនីត្យានុកូលក្នុងព្រះរាជាណាចក្រកម្ពុជានិងមានតេជានុភាពធ្វើសេរីកាគ្មានព្រំដែន”។

អ្នកសេដ្ឋកិច្ចកត់សម្គាល់​ថានៅក្នុងប្រទេសកម្ពុជាបច្ចុប្បុន្ននេះជាពិសេសផ្សារទំនើបៗគឺមានការ​ដោះដូរ​ពាណិជ្ជកម្ម​ឬការ​ចាយលុយជា​​​​ប្រាក់​ដុល្លារអាមេរិកជាង៨០%ពោល​ការ​ចាយ​ប្រាក់​រៀល​របស់ខ្មែរ​មាន​ប្រ​ហែល​​តែជិត២០%ប៉ុណ្ណោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ