ក្រសួងសុខាភិបាលនិងអង្គការអន្តរជាតិខាងផ្នែកសុខភាពឲ្យដឹងថាមនុស្ស៤នាក់ប៉ុណ្ណោះដែលត្រូវបានរកឃើញថាឆ្លងមេរោគអេដស៍នៅឃុំសំបួរមាស ស្រុកមុខកំពូល ខេត្តកណ្តាល ដោយចាត់ទុកថានេះមិនមែនជាករណីផ្ទុះនៃការឆ្លងមេរោគអេដស៍នោះទេ។
នៅក្នុងសេចក្តីប្រកាសព័ត៌មានមួយបស់ក្រសួងសុខាភិបាលនិងអង្គការសុខភាពពិភពលោករួមនិងអង្គការសហប្រជាជាតិប្រយុទ្ធប្រឆាំងនឹងជំងឺអេដស៍ដែលចេញផ្សាយនៅថ្ងៃពុធនេះ ក្រសួងបានឲ្យដឹងថាផ្អែកតាមការចុះស្រាវជ្រាវនៅថ្ងៃទី២២ខែកុម្ភៈ ក្នុងចំណោមអ្នកស្ម័គ្រចិត្តធ្វើតេស្តឈាមរកមេរោគអេដស៍ចំនួន២៧៩នាក់ មានតែ៤នាក់ប៉ុណ្ណោះដែលមានផ្ទុកមេរោគអេដស៍។ ក្រសួងបន្ថែមថាក្នុងចំណោមអ្នកធ្វើតេស្តរកមេរោគអេដស៍នោះ មានស្រ្តី១៧១នាក់និងកុមារចំនួន១១២នាក់។ ក្រសួងសុខាភិបាលបានច្រានចោលរបាយការណ៍ដែលថាពលរដ្ឋ១៤នាក់បានធ្វើតេស្តឈាមហើយមានផ្ទុកមេរោគអេដស៍។
ក្រសួងបញ្ជាក់ថា៖ “ទិន្នន័យនេះមិនបញ្ជាក់អំពីការបារម្ភនូវការឆ្លងរាលដាលមេរោគអេដស៍នោះទេ។ កត្តានេះបញ្ជាក់ពីសារសំខាន់នៃការកើនឡើងនូវការយល់ដឹងអំពីការធ្វើតេស្តឈាមរកមេរោគអេដស៍ដោយស្ម័គ្រចិត្តនិងរក្សាការសម្ងាត់ដែលជាមធ្យោបាយដ៏សំខាន់ក្នុងការបង្កើនការរកឃើញអ្នកផ្ទុកមេរោគអេដស៍ដែលមិនទាន់ដឹងពីស្ថានភាពខ្លួនឯង”។
រដ្ឋមន្រ្តីក្រសួងសុខាភិបាល លោក ម៉ម ប៊ុនហេង មានប្រសាសន៍នៅក្នុងសេចក្តីប្រកាសព័ត៌មាននោះថា៖ “រាជរដ្ឋាភិបាលនឹងបន្តការខិតខំប្រឹងប្រែងដោយផ្តល់ការគាំទ្រដល់កម្មវិធីបង្ការ ថែទាំព្យាបាលជំងឺអេដស៍ ដោយបញ្ចៀសនូវការមាក់ងាយ រើសអើងអ្នកផ្ទុកមេរោគអេដស៍”។
កាលពីខែមករា ឆ្នាំ២០១៥ អង្គការដែលធ្វើការលើផ្នែកសុខភាព ឈ្មោះខេមរា បានចុះទៅធ្វើតេស្តឈាមប្រជាពលរដ្ឋនៅឃុំសំបួរមាស ដោយរកឃើញថាមនុស្សជាង១០នាក់មានផ្ទុកមេរោគអេដស៍។ មន្រ្តីក្រសួងសុខាភិបាលឲ្យដឹងថាការធ្វើតេស្តឈាមនេះមិនបានសុំការអនុញ្ញាតពីមន្ទីរសុខាភិបាលខេត្តកណ្តាលនោះទេ។
វីអូឌីមិនទាន់អាចទាក់ទងអង្គការខេមរា ដើម្បីសុំការបញ្ជាក់ភ្លាមៗបាននៅឡើយទេ។
កាលពីថ្ងៃទី២២ ខែកុម្ភៈ ប្រជាពលរដ្ឋរាប់សិបនាក់នៅស្រុកមុខកំពូល បានចាប់ផ្តើមទៅពិនិត្យឈាម នៅមណ្ឌលសុខភាពក្នុងភូមិពាម ឃុំសំបួរមាស ដោយពួកគេថាដើម្បីចង់ដឹងថាតើពួកគេមានផ្ទុកមេរោគអេដស៍ឬក៏អត់។ ការផ្អើលទៅពិនិត្យឈាមនេះ ក្រោយពីមានរបាយការណ៍ថាពលរដ្ឋច្រើននាក់បានធ្វើតេស្តឈាមហើយរកឃើញថាមានផ្ទុកមេរោគអេដស៍។
គួរបញ្ជាក់ថាកាលពីខែធ្នូ ឆ្នាំ២០១៤ មានករណីរីករាលដាលឆ្លងមេរោគអេសដស៍នៅឃុំរកា ស្រុកសង្កែ ខេត្តបាត់ដំបង ដែលមានមនុស្សប្រមណា២៩០នាក់ត្រូវបានរកឃើញថាផ្ទុកមេរោគអេដស៍។ ករណីនេះ តុលាការបានកាត់ទោសគ្រូពេទ្យភូមិម្នាក់ ឈ្មោះ ញ៉ែម ជ្រិន ឲ្យជាប់គុក២៥ឆ្នាំ ដោយចោទថាជាអ្នកព្យាបាអ្នកភូមិធ្វេសប្រហែសបង្កឲ្យឆ្លងរោគអេដស៍តគ្នា៕
