លោកនាយករដ្ឋមន្រ្តី ហ៊ុន សែន នៅថ្ងៃព្រហស្បតិ៍នេះ បានបញ្ជាឲ្យចាត់វិធានការលើរថយន្តដែលដឹកលើសកំណត់បើកបរលើស្ពានអ្នកលឿងនិងថាអាចឈានទៅដល់បិទក្រុមហ៊ុននោះ។
ក្នុងពេលចូលរួមជាអធិបតីភាពក្នុងពិធីបិទសន្និបាតបូកសរុបការងាររបស់ក្រសួងមហាផ្ទៃ លោក ហ៊ុន សែន បានសរសេរលើហ្វេសប៊ុករបស់លោកថា៖ “ចំពោះឡានដែលដឹកទំនិញលើសកំណត់លើស្ពានអ្នកលឿងគឺត្រូវចាត់វិធានការមិនឲ្យរួចខ្លួន ឬអាចបិទក្រុមហ៊ុនដឹកជញ្ជូនណាដែលមិនគោរពច្បាប់”។
កាលពីថ្ងៃពុធ រដ្ឋមន្រ្តីក្រសួងមហាផ្ទៃ លោក ស ខេង បានបញ្ជាឲ្យសមត្ថកិច្ចតាមចាប់ម្ចាស់រថយន្តដឹកអង្ករខ្នាតធំដែលត្រូវបានរាយការណ៍ថាបើកបរឆ្លងកាត់ផ្លូវជាតិលេខ១ធ្វើឲ្យខូចខាតស្ពានអ្នកលឿង។
ស្នងការខេត្តព្រៃវែង លោក ស្រេង ជា ប្រាប់វីអូឌីថាលោកកំពុងតែអនុវត្តតាមបញ្ជារបស់នាយករដ្ឋមន្រ្តី។ លោកបដិសេធមិនអត្ថាធិប្បាយលម្អិតលើបញ្ហានេះ។
សារព័ត៌មានក្នុងស្រុករាយការណ៍ថាកាលវេលាម៉ោង១២យប់ ចូលថ្ងៃទី២៣ ខែកុម្ភៈ រថយន្តផ្ទុកទម្ងន់ជាង៧០តោនមួយគ្រឿងបានបើកបរឆ្លងកាត់ស្ពាន ហើយឡើងមិនរួចក៏រអិលថយក្រោយវិញបំផ្លាញសាច់កៅស៊ូលើស្ពាន។ រថយន្តនោះមានស្លាកលេខ ខេត្តតាកែវ 3A-1743 មានថៅកែឈ្មោះ ចក់ និង ចែមុំ នៅតំបន់អ្នកលឿង៕