អន្តរជាតិ

ចារកម្មអាមេរិកថាចិនដាក់ពង្រាយយន្តហោះចម្បាំងនៅលើកោះមានជម្លោះសមុទ្រចិនខាងត្បូង

ដោយ វីអូឌី
| ២៥ កុម្ភៈ ២០១៦
ម៉ោង ០៩:៤៨

(រូបភាពពី CNN)

ពួកមន្ដ្រីអាមេរិកបាននិយាយថាប្រទេសចិនបានដាក់ពង្រាយយន្ដហោះចម្បាំងនៅលើកោះមួយនៃសមុទ្រចិនខាងត្បូងដែលនៅទីនោះចិនបានដាក់ពង្រាយរួចហើយនូវកាំជ្រួចបាញ់យន្ដហោះ។

មន្ដ្រីសហរដ្ឋអាមេរិក២រូបដែលសុំមិនបញ្ចេញឈ្មោះបានប្រាប់បណ្ដាញផ្សាយព័ត៌មាន Fox News ថាក្រុមចារកម្មរបស់អាមេរិកបានថតរូបភាពនិងរកឃើញយន្ដហោះចម្បាំងរបស់ចិននោះចំនួនពីរគ្រឿងគឺប្រភេទ Shenyang J-11 និង Xian Jh-7 ស្ថិតនៅលើកោះ Woody នៅក្នុងតំបន់ជំលោះនៃប្រជុំកោះប៉ារ៉ាហ្ស៊ែលដែលយន្ដហោះទាំង២នេះបានទៅចុះចតប៉ុន្មានថ្ងៃមកនេះ។

អ្នកនាំពាក្យម្នាក់នៃមេបញ្ជាកងទ័ពអាមេរិកប្រចាំតំបន់ប៉ាស៊ីហ្វិចអនុសេនីយ៍ឯក Darryn James បានបញ្ជាក់បន្ថែមលើសេចក្ដីរាយការណ៍នេះប៉ុន្ដែលោកថាយន្ដហោះចម្បាំងរបស់ចិនទាំងនេះធ្លាប់ហោះចុះចតលើកោះទាំងនោះរួចមកហើយ។

លោកអនុសេនីយ៍ឯករូបនេះបានបញ្ជាក់ទៀតថាកោះ Woody គឺទាំងប្រទេសវៀតណាមនិងកោះតៃវ៉ានថាស្ថិតក្នុងដែនទឹករបស់ខ្លួនដែលពួកគេអះអាងដូចនេះតាំងពីទសវត្ស១៩៩០មក។

សេចក្ដីរាយការណ៍នេះបានធ្វើឡើងស្របពេលដែលលោករដ្ឋមន្ដ្រីការបរទេសចិន វ៉ាងយី ជួបសមភាគីអាមេរិក ចន ឃើរី នៅទីក្រុងវ៉ាស៊ីនតោន។

សហរដ្ឋអាមេរិកនិងប្រទេសចិនស្ថិតក្នុងស្ថានភាពតានតឹងនៅដំណាក់កាលចុងក្រោយនេះករណីជំលោះសមុទ្រចិនខាងត្បូងគឺបន្ទាប់ពីអាមេរិកបានបញ្ជូននាវាចម្បាំងទៅកាន់តំបន់នោះដែលទីក្រុងប៉េកាំងប្រកាសថ្កោលទោស ហើយក្រោយមកក្រុងប៉េកាំងបានពង្រាយកាំជ្រួចជាច្រើនដើមនៅលើកោះ Woody ដើម្បីការពារដែនអធិបតេយ្យរបស់ខ្លួន៕

ប្រភព: BBC

អន្តរជាតិ, អាមេរិក

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។