សមាជិកព្រឹទ្ធសភាគណបក្សសម រង្ស៊ី ព្រមដាក់លិខិតឆ្លងដែនពីរដើម្បីសុំនៅក្រៅឃុំ

លោក ហុង សុខហួរ ត្រូវបានបញ្ជូនមក​សាលសវនការ​របស់តុលាការកំពូលនៅព្រឹកថ្ងៃ​សុក្រនេះ(រូបថតដោយកាន់ វិច្ឆិកា)

អតីត​សមាជិក​ព្រឹទ្ធសភា​គណបក្ស​សមរង្ស៊ី​ លោក ហុង សុខហួរ នៅព្រឹក​នេះ​បាន​ថ្លែង​ក្នុង​សាល​សវនាការ​តុលាការ​កំពូល​ថាលោកស្នើ​នៅ​ក្រៅ​ឃុំ​បណ្ដោះ​អាសន្ន​ដោយ​សារ​លោក​មាន​បញ្ហា​សុខភាព ហើយ​លោក​យល់​​ព្រម​ដាក់​លិខិត​ឆ្លងដែន​​របស់​លោក​ចំនួន​២និងប្រាក់មួយចំនួន​សម្រាប់​ការ​សុំនៅក្រៅឃុំ។​

លោក ហុង សុខហួរ ត្រូវបានឃុំខ្លួនបណ្តោះអាសន្ននៅពន្ធនាគារព្រៃស តាមការចោទប្រកាន់៣ករណីគឺបទក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយនិងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។

លោក ហុង សុខហួរ បាន​ថ្លែង​ក្នុង​បន្ទប់​សវនាការ​ថាមូល​ហេតុ​ដែល​លោក​សុំ​នៅ​ក្រៅ​ឃុំ គឺដោយសារ​លោក​កំពុង​មាន​ជំងឺ​លើស​ឈាមនិង​មានបញ្ហាក្រពះ​ដែល​ត្រូវ​ទទួលការ​ព្យាបាល​ឲ្យ​បាន​ដិត​ដល់។ លោក​បន្ថែម​ថា ​ដើម្បី​ជាការធានាដល់​ការ​សុំ​នៅ​ក្រៅ​ឃុំ លោកនឹង​ដាក់​តម្កល់​លិខិត​​ឆ្លង​ដែន​ទាំងបារាំងនិង​ខ្មែររបស់​លោក​ រួម​នឹង​ប្រាក់​ចំនួន​២០​លាន​រៀល។

លោក​មេធាវី ជូង ជូងី មានប្រសាសន៍​ក្រោ​យ​​ចេញពី​សាល​សវនាការ​ថា​លោក​សោក​ស្តាយ​ដែល​តុលា​ការ​តែង​លើកឡើង​ថា លោក ហុង សុខហួរ​ មាន​បទ​ល្មើស​ទាំង​​មិន​ទាន់​មានសាលក្រម ឬ​សាលដីកាណាមួយ​​ចូលជាស្ថាពរនៅឡើយ។ លោកបន្ត​ថា​លោក ហុង សុខហួរ មាន​តួនាទី​សំខាន់​ក្នុងការ​អនុវត្ត​ការងារ​សង្គម ហើយ​ក៏​កំពុង​មាន​ជំងឺ ដូច្នេះ​តុលាការ​គួរ​អនុញ្ញាតឲ្យ​លោក​នៅ​ក្រៅ​ឃុំ​ ជាជាងឃុំ​ខ្លួន​លោកក្នុង​ពន្ធនាគារ។

លោកមានប្រសាសន៍ថា៖ “តួនាទីគាត់​ក្នុង​សង្គម​វាសំខាន់ណាស់ប្រៀបធៀបទៅនឹងការ​ចោទប្រកាន់គាត់ហ្នឹង ចឹងការ​ចោទប្រកាន់គាត់នេះ​គឺ​រហូត​មក​ដល់ពេលនេះ​គឺ​ផ្លូវច្បាប់​គាត់មិនទាន់មានការ​ចោទប្រកាន់​នៅឡើយ ចឹងឃុំ​ខ្លួនគាត់ជាសមា​ជិកព្រឹទ្ធសភា​មានអភ័យ​ឯកសិទ្ធិផង ឃុំ​ខ្លួន​គាត់ដែល​គាត់​មិនទាន់មានទោស​ផង ចឹងខ្ញុំមានការ​សោក​ស្តាយ​​ត្រង់ថា​មនុស្ស​ម្នាក់ដែលមានតួនាទីសំខាន់ក្នុងសង្គម ជួយ​ធ្វើ​ច្បាប់​សម្រាប់សង្គមជាតិ បែរ​ជា​តុលាការ​ឃុំ​ខ្លួនដែលគាត់​អត់ទាន់មានកំហុស​នៅ​ឡើយ”

Hong-Sokhua
លោក ហុង សុខហួរ ត្រូវបានបញ្ជូនមក​សាលសវនការ​របស់តុលាការកំពូលនៅព្រឹកថ្ងៃ​សុក្រនេះ(រូបថតដោយកាន់ វិច្ឆិកា)

ភរិយារបស់​លោក ហុង សុខហួរ គឺលោកស្រី គុណ លំអង មានប្រសាសន៍​ថាប្រសិនបើស្វាមីរបស់អ្នកស្រីនៅក្រៅឃុំ នោះស្ថានភាព​សុខភាពនឹងល្អប្រសើរ។

តុលាការកំពូល​ថានឹង​ប្រកាស​សាលដីកា​ករណីនេះនៅព្រឹកម៉ោង​៨ ថ្ងៃទី០៤ ខែ​មីនា ឆ្នាំ​២០១៦។

គួរបញ្ជាក់​ថា​លោក ហុង សុខហួរ ត្រូវបានសមត្ថកិច្ចចាប់ខ្លួន ពីរថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន បានចេញបញ្ជាឲ្យចាប់ខ្លួន ដោយចោទថាក្លែងឯកសារសន្ធិសញ្ញាកម្ពុជានិងវៀតណាមនៅឆ្នាំ១៩៧៩។ ប៉ុន្តែគណបក្សសង្គ្រោះជាតិបានចាត់ទុកករណីនេះជារឿងនយោបាយ មិនមែនជាបទល្មើសជាក់ស្តែងនិងជាការសម្តែងមតិរបស់សមាជិកព្រឹទ្ធសភា។ សង្គមស៊ីវិលមួយចំនួននិងគណបក្សសង្រ្គោះជាតិចាត់ទុកករណីនេះជារឿងនយោបាយ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered