គណបក្សថ្មីមួយដែលបែកចេញពីគណបក្សហ៊្វុនស៊ិនប៉ិច ហើយទើបទទួលបានសិទ្ធិអនុញ្ញាតពីក្រសួងមហាផ្ទៃនៅពេលថ្មីៗនេះបានប្រកាសសមាសភាពក្នុងថ្នាក់ដឹកនាំរបស់ខ្លួនដើម្បីត្រៀមប្រកួតប្រជែងការបោះឆ្នោតនៅពេលខាងមុខ។
អតីតអនុប្រធានគណបក្សហ៊្វុនស៊ិនប៉ិច លោក ញឹក ប៊ុនឆៃ បានសម្រេចចិត្តដើរចេញពីគណបក្សដែលខ្លួនចូលរួមតាំងពីអាណត្តិទី១ ហើយបានបង្កើតគណបក្សថ្មីមួយឈ្មោះគណបក្សខ្មែររួបរួមជាតិ។ នៅក្នុងសមាជលើកដំបូងរបស់ខ្លួននៅព្រឹកថ្ងៃទី២៦ខែកុម្ភៈនេះគណបក្សខ្មែររួបរួមជាតិបានសម្រេចដាក់ថ្នាក់ដឹកនាំរួមមានលោក ញឹក ប៊ុនឆៃ ជាប្រធាន លោក ខាន់ សាវឿន អនុប្រធាន លោក ទៀ ចំរ៉ាត់ ជាប្រធានកិត្តិយស និងលោក ស៊ឹម សុន ជាអគ្គលេខាធិការ។
កាលពីថ្ងៃទី២៤ខែកុម្ភៈឆ្នាំ២០១៦ ក្រសួងមហាផ្ទៃបានសម្រេចអនុញ្ញាតឲ្យលោក ញឹក ប៊ុនឆៃ អតីតអនុប្រធានទី២នៃគណបក្សហ៊្វុនស៊ិនប៉ិចបង្កើតគណបក្សថ្មី មួយឈ្មោះ ខ្មែររួបរួមជាតិ៕