នាយករដ្ឋមន្ត្រីហ៊ុន សែន នៅថ្ងៃសៅរ៍នេះ បានស្តីបន្ទោសមន្ត្រីរបស់ខ្លួន ករណីបណ្តែតបណ្តោលឲ្យរថយន្តដឹកទំនិញលើសកំណត់ បង្កឲ្យខូចស្ពានអ្នកលឿង និងព្រមានពីវិធានការច្បាប់។
លោកនាយករដ្ឋមន្ត្រី បានសរសេរនៅលើបណ្តាញសង្គមផ្លូវការរបស់លោកនៅថ្ងៃទី២៧ខែកុម្ភៈនេះ ដោយស្តីបន្ទោសថា ក្រុមមន្ត្រីជញ្ជីងចល័តរបស់ក្រសួងសាធារណការនិងដឹកជញ្ជូន នៅផ្លូវទៅកាន់ស្ពានអ្នកលឿងថា មិនបានទប់ស្កាត់នូវអ្វីដែលលោកថា កំពុងបំផ្លាញផ្លូវថ្នល់ និងសុវត្ថិភាពសាធារណៈ។
លោកនាយករដ្ឋមន្ត្រី រំឭកថា មន្ត្រីទាំងនោះនិងត្រូវទទួលខុសត្រូវចំពោះមុខច្បាប់ដូចអ្នកប្រព្រឹត្តបទល្មើសនោះដែរ។
ការំឭកឲ្យចាត់វិធានការផ្លូវច្បាប់លើមន្ត្រីជញ្ជីងចល័តប្រចាំផ្លូវជាតិលេខ១ ទៅកាន់ស្ពានអ្នកលឿងរបស់ប្រមុខរដ្ឋាភិបាលនេះ ធ្វើឡើងបន្ទាប់ពី បណ្តាញសង្គមបានបង្ហោះរថយន្តធន់ធំមួយគ្រឿង ដឹកទំនិញឡើងស្ពានអ្នកលឿងអត់រួច បានរអិលចុះស្ពានវិញ បង្កឲ្យខូចផ្នែកខ្លះនៃកៅស៊ូថ្នល់ កាលពីថ្ងៃទី២៣ខែកុម្ភៈឆ្នាំ២០១៦។
អ្នកនាំពាក្យក្រសួងសាធារណៈការ និងដឹកជញ្ជូនលោក វា ស៊ឹមសុវិយា សុំមិនអត្ថាធិប្បាយណាមួយលើវិធានការផ្លូវច្បាប់លើមន្ត្រី ដែលទទួលខុសត្រូវនៅទីនោះទេ ដោយគ្រាន់តែអះអាងថា ក្រសួងសាធារណៈការ និងក្រសួងមហាផ្ទៃ រួមទាំងអភិបាលខេត្តចំនួន៣ រួមមាន ខេត្តកណ្តាល តាកែវ និងព្រៃវែង បានសហការគ្នាធ្វើការស៊ើបអង្កេតរកឈ្មោះអ្នកបើកបររថយន្ត និងម្ចាស់រថយន្តដឹកទំនិញឆ្លងកាត់ស្ពានអ្នកលឿងនេះ។
ប៉ុន្តែលោកថា មកដល់ពេលនេះមិនទាន់ទទួលបានលទ្ធផលនៅឡើយ។ នៅពេលសួរថា តើក្រសួងនិងសមត្ថកិច្ច និងស៊ើបង្កេតលើក្រុមមន្ត្រីថ្លឹងជញ្ជីងរថយន្តនៅតំបន់ផ្លូវទៅស្ពានអ្នកលឿងឲ្យទទួលខុសត្រូវចំពោះមុខច្បាប់ឬយ៉ាងណា បើនៅលើហ្វេសប៊ុកបង្ហោះរូបភាព ឃើញរថយន្តដឹកទំនិញទម្ងន់រហូតដល់ជាង៧០តោន? លោក ស៊ឹម សុរិយា សុំមិនបំភ្លឺជុំវិញករណីនេះ ដោយលោកឆ្លើយយ៉ាងខ្លីថា អ្នកដែលសសេរលើហ្វេសប៊ុកផ្សាយថា រថយន្តនោះផ្ទុកទម្ងន់ជាង៧០តោនមួយគ្រឿងបានបើកបរឆ្លងកាត់ស្ពានអ្នកលឿង គឺទម្ងន់នោះមិនត្រឹមត្រូវទេ៕
