លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ បានថ្លែងថាលោកមិនយល់ស្របនឹងការលើកឡើងថាគ្រូពេទ្យខ្មែរភាគច្រើន”អាក្រក់” ដែលលោកថ្លែងបែបនេះសំដៅទៅរកលោកឧកញ៉ាគួច ម៉េងលី ដែលធ្លាប់បានរិះគន់វិស័យសុខាភិបាលកម្ពុជា។
ក្នុងពិធីសម្ពោធដាក់ឲ្យប្រើប្រាស់ជាផ្លូវការមន្ទីរពេទ្យបង្អែកខេត្តព្រះសីហនុ លោក ហ៊ុន សែន បានថ្លែងថាលោកទទួលស្គាល់ថាមានពេទ្យមួយចំនួនតូចដែលលោកថាមិនមានក្រមសីលធម៌ សម្តីមិនល្អនិងគិតតែពីលុយ។ ទោះជាយ៉ាងណា លោកថាចំនួនគ្រូពេទ្យនោះមិនច្រើនដល់ថ្នាក់៩០ឬ៩៩ភាគរយនោះទេ។ លោកចាត់ទុកការថ្លែងរិះគន់ថាពេទ្យខ្មែរភាគច្រើនអាក្រក់ជា”ការមិនអាចទទួលយកបាន”និង”ការប្រមាថមួយ”។
លោកមានប្រសាសន៍ថា៖ “អញ្ចឹងភាគច្រើននៃគ្រូពេទ្យរបស់យើងមានក្រមសីលធម៌ មានវិជ្ជាជីវៈ ប្រកបដោយការទទួលខុសត្រូវនិងមានការលះបង់ដើម្បីជួយអ្នកជំងឺ។ ក៏ប៉ុន្តែមានគ្រួពេទ្យមួយចំនួនតូចដែលប្រព្រឹត្តមិនគប្បី បង្កើតជាបញ្ហា ហើយអ្នកដែលមើលឃើញបញ្ហាក្នុងចំណោម១០០មានមួយនាក់ បង្កើតបញ្ហា ពួកគេបានមើលស្រាលចំពោះគ្រូពេទ្យនិងមន្រ្តីសុខាភិលបាលរបស់យើងប្រមាណ២ម៉ឺននាក់”។
លោកបញ្ជាក់បន្ថែមថា៖ “ខ្ញុំមិនយល់ស្របទេ នូវការលើកឡើងថា…បើ១០០ខូចអស់៩០ទៅហើយ សួរថាពេទ្យហ្នឹងដំណើរការបានទៅអត់”។ លោកបញ្ជាក់ថា៖ “១០០ខូចដល់៩៩ហើយ វាចប់ហើយ”។
លោកនាយករដ្ឋមន្រ្តីបានអំពាវនាវឲ្យឲ្យគ្រពេទ្យទាំងអស់ជួយកែគ្នាទៅវិញទៅមក ដែលលោកជាយន្តការមួយដើម្បីកុំឲ្យគ្រូពេទ្យមួយតូចបំផ្លាញកេរ្តិ៍ឈ្មោះគ្រូពេទ្យផ្សេងៗទៀត។ លោក ហ៊ុន សែន ក៏បានលើកឡើងថាមានអ្នកខ្លះបានញុះញង់ឲ្យមានបដិវត្តន៍លើគ្រូពេទ្យដែលលោកថានេះជាការញុះញង់ឲ្យមានបាតុកម្មមួយ។ លោកបន្ថែមថា៖ “បើសិនជាគ្រូពេទ្យនេះ នាំគ្នាធ្វើបាតុកម្មទៅប្រឆាំងនោះ រាជរដ្ឋាភិបាលប្រហែលជាពិបាកការពារណាស់”។
គួររំឭកថា កន្លងទៅ លោក គួច ម៉េងលី ជាស្ថាបនិកនិងជានាយកក្រុមហ៊ុន Mengly J. Quach Holdingនិងម្ចាស់សាលាអន្តរទ្វីបអាមេរិកកាំងផងដែរ បានប្រាប់កាសែតភ្នំពេញប៉ុស្តិ៍ថា៖ “ខ្ញុំអត់ដែលជួបពេទ្យណាអាក្រក់សែនអាក្រក់ដូចពេទ្យនៅស្រុកខ្មែរយើងទេ។ គាត់គ្មានវិជ្ជាជីវៈគ្មានភាពទន់ភ្លន់ គ្មានមេត្តាធម៌ នេះខ្ញុំមិនមែននិយាយទាំងអស់ទេ ខ្ញុំនិយាយបើខ្ញុំបានជួប១០មានអាក្រក់៩។ បើមានអាកប្បកិរិយាមារយាទអំនួត អឿ ឈ្លើយ ម៉ាកាវ តើកូនខ្មែរយើងអភ័ព្វយ៉ាងដូចម្តេទៅ។ ពេលគេទៅព្យាបាលម្តង សឹងតែលុតជង្គង់អង្វរគាត់(ពេទ្យ)។ ពេទ្យដែលគ្មានជំនាញវិជ្ជាជីវៈ ក្រមសីលធម៌ហើយជាអ្នកសម្លាប់មនុស្ស”។
លោក គួច ម៉េងលី ត្រូវបានដកស្រង់សម្តីចុះផ្សាយថា៖ “វិស័យសុខាភិបាលយើង បើខ្ញុំឲ្យពិន្ទុពី១ដល់ ១០ ខ្ញុំឲ្យ២ពិន្ទុ។ បើអ្នកក្រទៅពេទ្យខ្ញុំហ៊ានធានាគេនឹងដេកនៅចិញ្ចើមផ្លូវនោះជាអ្វីដែលខ្ញុំឃើញទិដ្ឋភាពដោយផ្ទាល់។ ស្រីសម្រាលកូនខ្លះកូនអាចស្លាប់ក្នុងពោះបើគ្មានលុយវះ។ សំណួរដែលត្រូវសួរខ្លួនឯងពេលនេះគឺថាក្នុងសតវត្សរ៍ទី២១ តើកម្ពុជាយើងត្រូវឆ្លងកាត់ភាពវេទនានេះបន្ដទៀតឬយ៉ាងណា”?
ក្រោយពីការបញ្ចេញយោបល់នោះ គណៈវិជ្ជាជីវៈសុខាភិបាលបានចេញលិខិតមួយដោយស្នើឲ្យលោក គួច ម៉េងលី សុំទោសជាសាធារណៈចំពោះអ្វីដែលលោកបានលើកឡើង។
ទោះជាយ៉ាងណា លោក គួច ម៉េងលី មិនបាននិយាយសុំទោសនោះ តែលោកបានឆ្លើយតបនឹងលិខិតរបស់គណៈវិជ្ជាជីវិៈសុខាភិបាល ដោយថាអ្វីដែលលោកបានលើកឡើងតាមបណ្តាញព័ត៌មានគឺផ្អែកលើការជួបប្រទះផ្ទាល់របស់លោកនូវស្ថានភាពមួយចំនួននាពេលកន្លងមក។ លោកបញ្ជាក់ថាការបកស្រាយពីការជួបប្រទះផ្ទាល់ខ្លួននេះមិនបណ្តាលឲ្យប៉ះពាល់ដល់អ្នកប្រកបវិជ្ជាជីវៈសុខាភិបាលទាំងអស់នោះទេ។ លោកក៏ទទួលស្គាល់ថាមានពេទ្យដែលប្រកបអាជីពដោយសមត្ថភាពនិងក្រមសីលធម៌ល្អជាច្រើនដែលបាននិងកំពុងបំពេញតួនាទីយ៉ាងសកម្មក្នុងការសង្គ្រោះជីវិតប្រជាពលរដ្ឋខ្មែរ។
បន្ទាប់ពីគណៈវិជ្ជាជីវៈសុខាភិបាលកម្ពុជាបានចេញលិខិតឲ្យលោក គួច ម៉េងលី សុំទោស អ្នកលេងហ្វេសប៊ុកភាគច្រើនបានផ្តល់យោបល់ថាលោក គួច ម៉េងលី មិនគួរសុំទោសចំពោះការលើកឡើងរបស់លោកនោះទេ ដោយថាការលើកឡើងរបស់លោកឆ្លុះបញ្ចាំងពីតថភាពសម្រាប់វិស័យសុខាភិបាលនៅកម្ពុជា៕
