សកម្មជនសហជីពមួយក្រុមស្នើឲ្យសាលាដំបូងខេត្តកំពង់ស្ពឺទម្លាក់បទចោទដល់ពួកគេទាំង៧នាក់ដោយអះអាងថាពួកគេមិនបានធ្វើអ្វីខុសដូចពាក្យបណ្តឹងរបស់ក្រុមហ៊ុន។
ប្រធានសហជីពចលនាកម្មករលោក ប៉ាវ ស៊ីណា និងលោក ស៊ុត ចិត្ត ត្រូវសាលាដំបូងខេត្តកំពង់ស្ពឺកោះហៅឲ្យចូលបំភ្លឺនៅថ្ងៃទី២៩ខែកុម្ភៈនេះដែលដីកាបង្គាប់ឲ្យចូលខ្លួនបញ្ជាក់ថាការកោះហៅនោះដើម្បីសាកសួរពីដំណើររឿងញុះញង់ឲ្យប្រព្រឹត្តបទឧក្រិដ្ឋ ធ្វើឲ្យខូចខាតដោយចេតនា មិនគោរពសេចក្តីសម្រេចរបស់តុលាការ ហិង្សាដោយចេតនាមានស្ថានទម្ងន់ទោស។
សកម្មជនសហជីពចលនាកម្មករលោក ស៊ុត ចិត្ត ឲ្យVODដឹងក្រោយពីចេញពីតុលាការថាពួកលោកបានសុំឲ្យចៅក្រមស៊ើបសួរទម្លាក់បទចោទដោយអះអាងថា ពួកគេមិនបានប្រព្រឹត្តដូចការចោទប្រកាន់។
កាលពីថ្ងៃទី១២ខែមករាឆ្នាំ២០១៦សមត្ថកិច្ចបានចាប់ខ្លួនសកម្មជនសហជីពចលនាកម្មករ៥នាក់មានលោក ខាត់ ឡូត លោក ព្រុំ ប៊ុនថន លោក ចាំ សំណាង លោក អាន ថុណា និងលោក ម៉ៅ ម៉យ ក្រោយពីការតវ៉ាមួយបានផ្ទុះហិង្សាមុខរោងចក្រ អេដ្យាលស្វីតធើ នៅក្រុងច្បារមន ខេត្តកំពង់ស្ពឺនោះ ចោទពីបទដូចគ្នា។
ប៉ុន្តែក្រោយមកអ្នកទាំង៥រូបត្រូវបានតុលាការខេត្តនេះដោះលែងឲ្យនៅក្រៅឃុំបណ្តោះអាសន្នវិញ។ មន្ត្រីស៊ើបអង្កេតនៅសមាគមការពារសិទ្ធិមនុស្សអាកហ៊ុកប្រចាំខេត្តកំពង់ស្ពឺលោក អាន ភិន អះអាងថាពលរដ្ឋដែលដឹងហេតុការណ៍ឲ្យដឹងថា អ្នកដែលប្រើហិង្សាគឺជាមនុស្សរបស់ក្រុមនិងសហជីពមួយទៀតនៅក្នុងរោងចក្រនេះដែលលោកថាគំាទ្រក្រុមហ៊ុន ជាអ្នកកាន់ដំបង និងបំពង់ទីព វាយទៅលើក្រុម កម្មករតវ៉ា ដែលគាំទ្រលោក ប៉ាវ ស៊ីណា។
មន្ត្រីសង្គមស៊ីវិលរូបនោះបង្ហាញការសោកស្តាយនៅពេលដែលតុលាការមិនបានចាប់ជនដៃដល់គាំទ្រក្រុមហ៊ុនមកផ្ទន្ទាទោស។
លោក អាន ភិន អំពាវនាវឲ្យតុលាការប្រើវិធានការច្បាប់នេះឲ្យមានតម្លាភាពដែលលោកថាដើម្បីកុំឲ្យមជ្ឈដ្ឋាននានានៅតែមើលឃើញថាការអនុវត្តច្បាប់នៅកម្ពុជាធ្វើឡើងបែបស្តង់ដាពីរ។
យ៉ាងណាក៏ដោយលោក ស៊ុត ចិត្រ ដែលបានចូលបំភ្លឺនៅថ្ងៃចន្ទនេះអះអាងថាក្រោយពីចៅក្រមស៊ើបសួរទាញយកចម្លើយពួកគេ លោកថាចៅក្រមមិនទាន់សម្រេចយ៉ាងណានៅឡើយទេដោយគ្រាប់តែបញ្ជាឲ្យលោកមកកាន់កន្លែងធ្វើការដូចដើមវិញ៕