ក្រសួង​កសិកម្មព្រមាន​ចាត់ការ​លើជន​បង្កឲ្យ​មានភ្លើងឆេះព្រៃ

ក្រសួង​កសិកម្ម​ រុក្ខា​ប្រមាញ់និងនេសាទ បានដាក់វិធានការ​មួយ​ចំនួនក្នុងការ​ទប់ស្កាត់​ភ្លើងឆេះព្រៃ​ ​ដល់​មន្រ្តី​រដ្ឋបាលព្រៃឈើ​និង​មន្រ្តីរដ្ឋបាលជលផល​ ដោយ​រំឭកពី​ចំណាត់ការផ្លូវច្បាប់​លើជនណា​ដែល​បង្ក​ឲ្យ​មានភ្លើង​ឆេះព្រៃ​ដោយចេតនា។​

នៅក្នុង​សេចក្តី​ណែនាំ​មួយ​ចុះថ្ងៃទី​២១ខែមករា ហើយវីអូឌី​(VOD)ទទួល​បាន​នៅថ្ងៃ​ពុធនេះ ក្រសួងកសិកម្ម​បាន​លើក​ឡើង​ថាភ្លើង​ឆេះ​ព្រៃ​​ជា​រៀង​រាល់​ឆ្នាំ​បាន​បង្ក​ឲ្យ​មាន”​បញ្ហា​ដ៏ធ្ងន់ធ្ងរ​ដល់​ការ​បាត់​បង់ធនធានព្រៃឈើ​និងព្រៃលិចទឹក​”ហើយ​បានបង្ក”​វិនាសកម្ម​និង​ការ​ខាតបង់​យ៉ាងធ្ងន់ធ្ងរ​ដល់សង្គម​សេដ្ឋកិច្ច​ជន​បទ សេដ្ឋកិច្ចជាតិ​ ធនធានធម្មជាតិ​និងបរិស្ថាន”។​ ក្រសួង​បន្ត​ថា​កត្តា​ចម្បង​ដែល​បង្ក​ឲ្យ​មាន​ភ្លើង​ឆេះ​ព្រៃ​ញឹក​​ញាប់​បំផុត​នា​រដូវ​ប្រឆាំង ​តាមរយៈ​សកម្មភាព​ដូចជា​ការ​កាប់ឆ្ការដុត​រានព្រៃ ដើម្បីដាំ​ដំណាំ​កសិកម្មផ្សេងៗ ការធ្វើកសិកម្មពនេចរ ការតាំងទីលំនៅ​ដ្ឋានថ្មី ការដុតព្រៃដើម្បី​ចាប់សត្វ ការ​បន្សល់​ដើមភ្លើង​នៅក្នុងព្រៃ​​តាម​រយៈ​ការធ្វេស​ប្រហែស​រប​ស់មនុស្ស។​

បើតាម​សេចក្តីណែនាំនោះ ក្រសួង​បាន​ដាក់វិធានការមួយចំនួន​ដូចជា​ទប់​ស្កាត់​ការ​ប្រើ​ប្រាស់​ភ្លើង​ជា​មធ្យោ​បាយ​​ដើម្បីយកឃ្មុំ​ ការដុត​ស្ទាក់​ចាប់​សត្វនិង​ការ​ដុត​វាល​ស្មៅ​ដើម្បី​យក​ល្បាស់​ធ្វើចំណីសត្វ​ពាហនៈ​ ទប់​ស្កាត់​​កា​រ​កាប់​ឆ្ការ​ គាស់​រាន ឈូស​ឆាយ ដុតព្រៃ​ឈើ និង​ព្រៃលិច​ទឹក​ដើម្បីពង្រីក​ផ្ទៃ​ដី​ដំណាំ​កសិកម្ម​ឬ​ក្នុង​គោល​បំណង​ផ្សេងៗ​ទៀត។​ ក្នុង​ករណី​ចាំបាច់​ដែលត្រូវប្រើ​ភ្លើង​ជា​មធ្យោបាយ​ក្នុងការ​ដុត​កា​ក​សំណង់​ឈើ​​ព្រៃ​ ក្រោម​គោល​បំណង​ដាំ​ដំណាំ​កសិកម្ម​និង​សកម្មភាព​ស្រប​ច្បាប់ផ្សេង​ទៀត ត្រូវ​ជូន​ដំណឹង​ដល់​សង្កា​ត់​រដ្ឋ​បាល​ព្រៃឈើឬ​សង្កាត់​រដ្ឋបាល​ជល​ផល​សាមី

ក្រសួងណែនាំបន្ត​ថា​ការ​រុក​រក​ផល​ អនុ​ផល​ព្រៃឈើ​ជា​ប្រពៃណី​និង​សកម្មភាព​ផ្សេង​ទៀត​ដែល​ចាំ​បាច់​ត្រូវ​ប្រើ​ភ្លើង​ជាមធ្យោបាយ​(ដុត​រណ្តៅជ័រ) ត្រូវ​ពន្លត់​ភ្លើង​ឲ្យ​អស់​ជា​ចាំបាច់មុន​ពេល​ចាក​ចេញ​ពី​ដើម​ឈើ​ច្បោះជ័រ​។

ក្រសួងកសិកម្ម​បាន​បញ្ជាក់ថា៖ “អនុ​លោក​តាមច្បាប់​ស្តីពីព្រៃឈើ​និងច្បាប់ស្តីពីជល​ផល​ ប្រជា​ពលរដ្ឋ​កង​កាម្លំាង​ប្រដាប់អាវុធ​និងអាជ្ញាធ​រដែន​ដីគ្រប់​ថ្នាក់​ត្រូវ​មាន​ករណីកិច្ច​ទទួល​ខុសត្រូវ​ថែ​រក្សា​ ការពារ​ព្រៃឈើ​ បង្ការនិង​ប្រយុទ្ធ​នឹង​ភ្លើង​ឆេះ​ព្រៃ ចូលរួម​ថែករក្សា​ជម្រក​មច្ឆជាតិ ការពារ​បង្ការ​និង​ប្រយុទ្ធ​នឹង​ភ្លើង​ឆេះព្រៃ​លិច​ទឹក​នៅ​តាម​មូលដ្ឋានរៀងៗខ្លួន​”។ ក្រសួង​បន្ថែមថា៖ “ជន​ណា​ដែល​បានប្រព្រឹត្ត​ឬ​បង្ក​ឲ្យ​មានភ្លើង​ឆេះព្រៃ​ឬ​ភ្លើង​ឆេះព្រៃ​លិចិត​ទឹក​ដោយ​ចេតនា​ ត្រូវផ្តន្ទាទោស​ករោម​បទល្មើសព្រៃឈើ​ថ្នាក់ទី១ ឬ​បទល្មើសជលផល​ថ្នាក់ទី១ដែល​ត្រូវ​ជាប់ពន្ធនាគារ​ពី​៣ឆ្នាំ​ទៅ​៥ឆ្នាំ​ឬ​ពី​៥​ឆ្នាំ​ទៅ​១០ឆ្នាំ”

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ