រដ្ឋបាលខេត្តបាត់ដំបងបានចេញសេចក្ដីប្រកាសមួយដោយជំរុញឲ្យពលរដ្ឋក្នុងក្រុងបាត់ដំបងចូលរួមគោរពទង់ជាតិជារៀងរាល់ព្រឹកឡើងវិញទៅតាមរយៈស្នូរសំឡេងសារ៉ែន។
បើតាមសេចក្ដីជូនដំណឹងចុះថ្ងៃទី២៩ខែកុម្ភៈ គឺអាជ្ញាធរខេត្តនេះបានជំរុញឲ្យមានសកម្មភាពចូលរួមគោរពទង់ជាតិតាមរយៈស្នូរសំឡេងសារ៉ែនរៀងរាល់ម៉ោង៧ព្រឹកចាប់ផ្ដើមពីថ្ងៃទី៨ខែមីនានេះតទៅ។
សេចក្ដីប្រកាសដដែលក៏តម្រូវឲ្យពលរដ្ឋដែលធ្វើដំណើរឬធ្វើកិច្ចការផ្សេងៗតាមដងផ្លូវនានាក្នុងក្រុងបាត់ដំបងត្រូវបញ្ឈប់សកម្មភាពការងារនិងឈប់ធ្វើដំណើរចុះពីយានជំនិះដើម្បីចូលរួមគោរពទង់ជាតិចាប់ពីពេលឮស្នូរសំឡេងសារ៉ែនរហូតដល់ចប់(មួយនាទី)ទើបបន្តដំណើរនិងការងារទៀត។
សេចក្ដីប្រកាសនោះក៏បានតម្រូវជាពិសេសមន្រ្តីរាជការ សិស្សនិស្សិត និងគ្រឹះស្ថាននានាចូលរួមគោរពទង់ជាតិឲ្យបានតាមសេចក្ដីជូនដំណឹងដើម្បីជាការលើកស្ទួយកិត្យានុភាពរបស់ជាតិខ្មែរ។
កន្លងមករដ្ឋបាលខេត្តបាត់ដំបងក៏បានកំណត់ពេលវេលាក្នុងការគោរពទង់ជាតិជារៀងរាល់ម៉ោង៧ព្រឹកតាម រយៈស្នូរសំឡេងសារ៉ែនដែលបន្លឺឡើងចេញពីអង្គភាពរដ្ឋាករទឹកក្រុងបាត់ដំបង។ ប៉ុន្តែដោយសារម៉ាស៊ីនសារ៉ែននេះខូចទើបបណ្ដាលឲ្យអាកខានការគោរពទង់ជាតិនេះអស់ជាច្រើនឆ្នាំ៕