អាជ្ញាធរវៀតណាមកំពុងបានរៀបចំផែនការដាក់ឲ្យមានក្រុមនគរបាលពិសេសេដើម្បីការពារសុវត្ថិភាពដល់ភ្ញៀវទេសចរត្រៀមទប់ស្កាត់នឹងបទល្មើសនានារួមទាំងការលួចប្លន់ជាដើម។
ប្រធានគណៈកម្មាធិការប្រជាជនក្រុងហូជីមិញលោក ង្វៀន ថាញ់ផុង ថ្លែងក្នុងសន្និសីទមួយកាលពីថ្ងៃអង្គារថា ការពង្រឹងសមត្ថភាពនគរបាលក្នុងទីក្រុងគឺជាការសំខាន់នៅពេលនេះដើម្បីធានាដល់សន្តិសុខរបស់ភ្ញៀវទេសចរ។ នេះបើតាមសារព័ត៌មាន Thanhnien News។
លោក ផុង ថ្លែងថាទីក្រុងអាចរងសម្ពាធដោយសារបទឧក្រិដ្ឋនានារួមទាំងការលួច ប្លន់ ហើយលោកជំរុញឲ្យអាជ្ញាធរភូមិឃុំយកចិត្តទុក្ខដាក់លើបញ្ហានេះ។
លោក ផាន អាញ់មីង អគ្គនាយករងនៃនាយករដ្ឋាននគរបាលក្រុងហូជីមិញថ្លែងថាទេសចរណ៍គឺជាវិស័យមួយដែលត្រូវតែធ្វើឲ្យប្រាកដថាមានសុវត្ថិភាពបំផុត។ លោកបញ្ជាក់ថាក្រុមនេះគួរមានកម្លាំងពិសេសសម្រាប់ធ្វើការរបស់ខ្លួនមិនចាំបាច់រងចាំនគរបាលទូទៅអន្តរាគមន៍ពេលមានបញ្ហាកើតឡើងនោះទេ។
លោក ផាន អាញ់មីង ជំរុញឲ្យមានការបង្កើតច្បាប់បន្ថែមទៀតដើម្បីធានាសុវត្ថិភាពភ្ញៀវទេសចរណ៍។ លោកក៏ស្នើឲ្យមានការដាក់ទោសទណ្ឌដល់ក្រុមទេសចរណ៍ណាដែលមិនបានគិតឲ្យបានដិតដល់ក្នុងការការពារសុវត្ថិភាពភ្ញៀវ។
នាយកដ្ឋានទេសចរណ៍នៃទីក្រុងហូជីមិញបានបង្ហាញរបាយការណ៍ថាពួកគេទទួលបានកំណត់ទូតពីប្រទេស អូស្ត្រាលី កូរ៉េខាងត្បូង ជប៉ុន និងតៃវ៉ាន់ដែលបានបញ្ជាក់ថាប្រជាពលរដ្ឋរបស់ពួកគេធ្វើដំណើរកំសាន្តនៅវៀតណាមហើយបានជួបបញ្ហាចោរកម្មរាប់រយករណី៕
