រដ្ឋាភិបាលកម្ពុជា បានអន្តរាគមន៍ចំពោះ ពលការិនីកម្ពុជា ដែលទៅធ្វើការនៅប្រទេសម៉ាឡេស៊ី ហើយជួបការលំបាកចំនួន៤នាក់បន្ថែមទៀត ឲ្យបានវិលត្រឡប់មកកម្ពុជាវិញ។
បើតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា ស្ថានឯកអគ្គរាជទូតកម្ពុជា ប្រចាំប្រទេសម៉ាឡេស៊ីបាន អន្តរាគមន៍ជួយពលករខ្មែរ៤នាក់ ដែលជួបការលំបាកក្នុងការងារនៅប្រទេសម៉ាឡេស៊ីឲ្យបានវិលត្រឡប់មកកម្ពុជាវិញនៅថ្ងៃទី ៧ មិនា វេលាម៉ោង ៧ ៥០នាទីព្រឹក តាមជើងយន្តហោះ AK ៥៣៦។
បើតាមសេចក្ដីប្រកាសព័ត៌មានឲ្យដឹងថា ដោយបញ្ហាពលការិនីនៅម៉ាឡេស៊ី និងបញ្ហាស្ត្រីខ្មែរទៅរៀបការប្តីនៅប្រទេសចិន នៅតែបន្តកើតមានសឹងតែរៀងរាល់ថ្ងៃ ដូច្នេះក្រសួងការបរទេសធ្វើការអំពាវនាវជាថ្មីដល់ឪពុក – ម្តាយ អាណាព្យបាល និងនារីគ្រប់រូបទាំងអស់ បង្កើនការប្រុងប្រយ័ត្នចំពោះឧបាយកលបោកប្រាសរបស់មេខ្យល់ និងកុំធ្វើដំណើរខុសច្បាប់ទៅកាន់ប្រទេសទាំងនោះដើម្បីជៀសវាងហានិភ័យ។
បើតាមសេចក្ដីប្រកាសព័ត៌មានដដែលឲ្យដឹងថា ពលការិនីទាំងនោះមាន ៤នាក់ មានស្រុកកំណើតនៅខេត្ត ពោធិសាត់ កំពង់ធំ និង ក្រចេះ ដែលបានទៅធ្វើការនៅប្រទេសម៉ាឡេស៊ីតាំងពីឆ្នាំ ២០១៤ និង ពលការិនីម្នាក់ទៀតមានស្រុកកំណើតនៅខេត្តកំពង់ចាមដែលបានទៅធ្វើការនៅទីនោះតាំងពីឆ្នាំ ២០១៣។
