ក្រុមយុវជនដែលអះអាងថា ជាក្រុមនិស្សិតប្រមាណ១០នាក់នៅបន្តទាមទារនៅវេទិកា គណបក្សសង្គ្រោះជាតិនៅព្រឹកនេះឲ្យលោកកឹម សុខា បកស្រាយរឿងខ្សែអាត់សំឡេងពាក់ព័ន្ធរឿងស្នេហាលួចលាក់ជាមួយស្រីក្មេង។
នៅព្រឹកថ្ងៃអាទិត្យនេះ លោក កឹម សុខា ប្រធានស្តីទីគណបក្សសង្គ្រោះជាតិ បានជួបអ្នកគាំទ្ររបស់ខ្លួននៅសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
ប្រធានប្រតិបត្តិគណបក្សសង្គ្រោះជាតិ នៅរាជធានីភ្នំពេញលោក ម៉ម ផល្លា ជាអ្នកដែលបានចូលរួមក្នុងវេទិកានៅព្រឹកនេះដែរ ប្រាប់វីអូឌី(VOD)ថា មានយុវជនប្រមាណ១០នាក់ ប្រើឧបករណ៍បំពងសំឡេងស្រែកទាមទារឲ្យលោក កឹម សុខា បកស្រាយខ្សែអាត់សំឡេង។ ប៉ុន្តែលោកបញ្ជាក់ថា យុវជនទាំងនោះ មិនបានចូលទៅជិតវេទិកាទេគឺនៅស្រែកពីចម្ងាយ។
លោកម៉ម ផល្លា បញ្ជាក់ថា ក្រុមយុវជនដែលតវ៉ានៅព្រឹកនេះ គឺជាក្រុមតែមួយរបស់ក្រុមដែលតវ៉ានៅមុខស្នាក់គណបក្សសង្គ្រោះជាតិ កាលពីថ្ងៃស្រុក និង ក្រុមដែលតវ៉ានៅក្នុងវេទិកាដែលលោកកឹម សុខា ជួបអ្នកគាំទ្រនៅខេត្តព្រះសីហនុកាលពីថ្ងៃសៅរ៍។
ការតវ៉ារបស់ក្រុមយុវជននេះ កាលពីថ្ងៃសុក្រ និង ថ្ងៃសៅរ៍មានចំនួនប្រមាណ៥០នាក់ តែនៅព្រឹកថ្ងៃអាទិត្យនេះ ចំនួនបានថយចុះមកប្រមាណ១០នាក់វិញ៕
