មន្រ្តីជាន់ខ្ពស់គណបក្សសង្គ្រោះជាតិម្នាក់ទៀតរងការព្រមានផ្សព្វផ្សាយរឿងអាស្រូវផ្ទាល់ខ្លួនពីជនអនាមិក ខណៈគណបក្សប្រឆាំងមួយនេះអះអាងថាខ្លួនកំពុងទទួលបានការគាំទ្រច្រើនពីប្រជាពលរដ្ឋមូលដ្ឋាន។
កាលពីថ្ងៃទី ៧ ខែមិនា តំណាងរាស្រ្តគណបក្សប្រឆាំង លោក អេង ឆៃអ៊ាង បានផ្សព្វផ្សាយនៅលើទំព័រហ្វេសប៊ុករបស់ខ្លួនថាលោកទទួលបានលិខិតមកដល់ផ្ទះមួយដែលព្រមានផ្សព្វផ្សាយរឿងអាស្រូវរបស់លោកដូចរឿងអាស្រូវលោក កឹម សុខា បើលោកនៅតែព្យាយាមការពារនិងបិទបាំងរឿងអាស្រូវរបស់លោកកឹម សុខា ទៀតនោះ។
លិខិតអនាមិកនោះបានសរសេរខ្លឹមសារព្រមានថា៖ [Quote]
ឆ្លើយតបទៅនឹងបញ្ហានេះ តំណាងរាស្រ្តគណបក្សសង្គ្រោះជាតិ លោក អេង ឆៃអ៊ាង មានប្រសាសន៍ថាករណីនេះគឺជារឿងដដែលៗ ដោយលោកថាចង់ផ្សាយប៉ុន្មានដងក៏លោកមិនចាប់អារម្មណ៍។ លោកបន្ថែមថាលោកមិនប្ដឹងពីការព្រមាននោះទេ ដោយលោកថាគួរគិតរឿងការបោះឆ្នោតនិងរឿងប្រទេសជាតិសំខាន់ជាង។
[Quote2]
សាស្ត្រាចារ្យវិទ្យាសាស្ត្រនយោបាយ លោក សូ ចន្ថា យល់ឃើញថាក្នុងសង្គមប្រជាធិបតេយ្យអ្នកនយោបាយគួរតែធ្វើការប្រកួតប្រជែងដោយស្មោះត្រង់លើគោលនយោបាយហើយការព្រមានពីជនអនាមិកណាមួយទៅលើអ្នកនយោបាយនោះមិនគួរឲ្យកើតមានទេ។ លោកបន្ថែមថាបើទោះជាអ្នកនយោបាយទាំងនោះធ្វើអ្វីឲ្យមានរឿងអាស្រូវឬគ្មានក៏វាមិនប៉ះពាល់ធ្ងន់ធ្ងរដល់ស្ថាប័នរបស់របស់ខ្លួនដែរ ព្រោះវាជារឿងផ្ទាល់ខ្លួនរបស់បុគ្គលម្នាក់ៗ។
[Quote3]
គួរបញ្ជាក់ថាទាក់ទងនឹងការផ្សព្វផ្សាយរឿងអាស្រូវនេះ កាលពីចុងខែកុម្ភៈឆ្នាំ២០១៦ ប្រធានស្ដីទីគណបក្សប្រឆាំង លោក កឹម សុខា ត្រូវបានបណ្ដាញសង្គមហ្វេសប៊ុកនិងសារព័ត៌មានក្នុងស្រុកដែលភាគច្រើនគាំទ្ររដ្ឋាភិបាលបានផ្សព្វផ្សាយជាបន្តបន្ទាប់ពីខ្សែអាត់សំឡេងសន្ទនាជាមួយស្រីម្នាក់។ ទោះយ៉ាងណាមកដល់ពេលនេះមិនទាន់មាននរណាម្នាក់ដឹងច្បាស់នៅឡើយទេថាខ្សែអាត់សំឡេងសន្ទនានោះជាសំឡេងរបស់លោក កឹម សុខា ឬយ៉ាងណា៕
