បុរសម្នាក់ត្រូវបានសម្លាប់ បន្ទាប់ពីឈ្លោះប្រកែកជាមួយមិត្តភក្តិពីរឿងថាតើកីឡាករ Lionel Messi ឬកីឡាករ Cristiano Ronaldo គឺជាកីឡាករល្អបំផុតនៅក្នុងពិភពលោក។
បណ្ដាញផ្សាយព័ត៌មានBBC បានចុះផ្សាយដោយដកស្រង់សម្ដីនគរបាលឥណ្ឌាថា បុរសជនជាតិនីហ្សេរីយ៉ាម្នាក់អាយុ២១ឆ្នាំឈ្មោះ Michael Chukwuma បានចាក់ជនរួមជាតិវ័យ៣៤ឆ្នាំមួយរូបឈ្មោះ Obinna Duru Chukwu នៅជាយក្រុងទីក្រុងម៉ុមបៃ។ ហេតុការណ៍នេះបានកើតឡើងបន្ទាប់ពីពិធីជប់លៀងមួយកាលពីយប់ថ្ងៃសៅរ៍។
អធិការនគរបាលមួយរូបបាននិយាយថា៖ “ពួកគេបានពិភាក្សាអំពីកីឡាករបាល់ទាត់។ មួយគឺអ្នកគាំទ្រ កីឡាករ Messi និងមួយទៀតនេះគឺអ្នកគាំទ្រកីឡាករ Ronaldo… ក្នុងអំឡុងការសន្ទនាគ្នានោះ ការឈ្លោះប្រកែកគ្នាមួយបានកើតឡើង។ ជនដែលបានស្លាប់បានចោលកែវទៅលើផ្ទៃមុខរបស់ជនជាប់ចោទ។ កែវនោះបានបែកហើយបណ្ដាលឲ្យមានរបួសបន្តិចបន្តួច”។
មន្ត្រីនគរបាលដដែលបន្ថែមទៀតថា៖ “បន្ទាប់មក ជនជាប់ចោទបានយកបំណែកកែវ និងបានវាយប្រហារទៅលើជនរងគ្រោះដែលបានស្លាប់ដោយសារការហូរឈាមខ្លាំង”។
កីឡាករលំដាប់អន្តរជាតិសញ្ជាតិអាហ្សង់ទីន លោក Messi អាយុ២៨ឆ្នាំគឺជាម្ចាស់ពាន the Ballon d’Or ៥ដង ដែលពានរង្វាន់ប្រចាំឆ្នាំនេះ បានផ្ដល់ឱ្យទៅអ្នកលេងល្អបំផុតរបស់ពិភពលោកដោយគណៈអភិបាលរបស់ FIFA ។ ចំណែកឯប្រធានក្រុមជម្រើសជាតិប៉ទុយហ្កាល់កីឡាករ Ronaldo អាយុ ៣១ឆ្នាំបានឈ្នះពានរង្វាន់នេះចំនួនបីដង៕
ប្រភព៖ BBC
