ក្រសួងការបរទេសកម្ពុជាបានឲ្យដឹងថាមន្រ្តីរបស់ស្ថាប័នមួយចំនួនបានប្រើប្រាស់លិខិតឆ្លងដែនផ្លូវការដែលក្រសួងបានចេញឲ្យ ទៅធ្វើជាពលករនៅក្រៅប្រទេស។
កាលពីថ្ងៃទី៤ ខែមិនា ក្រសួងការបរទេសកម្ពុជាបានចេញលិខិតមួយទៅកាន់រដ្ឋមន្រ្តីក្រសួងមហាផ្ទៃ លោក ស ខេង ដោយស្នើដកលិខិតឆ្លងដែនផ្លូវការមន្រ្តីរដ្ឋាភិបាល ពេលបញ្ចប់បេសកកម្មនៅក្រៅប្រទេស។ លិខិតបញ្ជាក់ថាក្រសួងនឹងប្រគល់លិខិតឆ្លងដែនផ្លូវការទាំងនោះទៅវិញនៅពេលមន្រ្តីនោះត្រូវមានបេសកកម្មនៅបរទេសជាថ្មី។ ក្រសួងការបរទេសមិនបានបញ្ជាក់ពីមូលហេតុនៃចំណាត់ការនេះនោះទេ។
ទោះជាយ៉ាងណា នៅក្នុងសេចក្តីជូនព័ត៌មានមួយចេញផ្សាយនៅថ្ងៃពុធនេះ ក្រសួងការបរទេសបានឲ្យដឹងថាកន្លងមកចំពោះមន្រ្តីរាជការរបស់ស្ថាប័នរដ្ឋដែលត្រូវចេញទៅបំពេញបេសកកម្មផ្លូវការឬចូលរួមកម្មសិក្សានៅក្រៅប្រទេស ក្រសួងបានចេញនូវលិខិតឆ្លងដែនផ្លូវការ ដោយផ្អែកលើលើសំណើសុំរបស់ស្ថាប័នទាំងនោះ ដោយពុំមានការបង់ថ្លៃ។ ក្រសួងបន្តថាក៏ប៉ុន្តែក្នុងរយៈពេលកន្លងមកនេះ មានមន្រ្តីរបស់អង្គភាពឬស្ថាប័នខ្លះ នៅពេលចប់បេសកកម្មផ្លូវការឬមិនបានទៅបំពេញបេសកកម្មផ្លូវការ បានប្រើប្រាស់លិខិតឆ្លងដែនផ្លូវការនោះក្នុងការធ្វើដំណើរទៅធ្វើពលករខុសច្បាប់នៅក្រៅប្រទេស។
ក្រសួងការបរទេសបានបញ្ជាក់ថា៖ [Quote]
បើតាមសេចក្តីជូនព័ត៌មាន ដើម្បីការពារកិត្តិយសនិងកិត្យានុភាពជាតិនិងតម្លៃរបស់លិខិតឆ្លងដែនផ្លូវការក្រសួងការបរទេសបានស្នើសុំការសម្រេចពីនាយករដ្ឋមន្រ្តីដើម្បីរក្សាទុកលិខិតឆ្លងដែនផ្លូវការទាំងនោះ។
ក្រសួងបញ្ជាក់ថា៖ [Quote2]
វីអូឌី(VOD)មិនទាន់អាចសុំការបញ្ជាក់បន្ថែមពីអ្នកនាំពាក្យក្រសួងការបរទេសកម្ពុជា លោក ជុំ សន្ទរី បាននៅឡើយទេ។
អ្នកនាំពាក្យអគ្គនាយកដ្ឋានអន្តោប្រវែសន៍ លោក ចាន់ វណ្ណថន មានប្រសាសន៍ថារហូតមកដល់ពេលនេះ លោកមិនទាន់ឃើញលិខិតរបស់ក្រសួងបរទេសនៅឡើយទេ តែលោកថានៅពេលទទួលបាន អគ្គនាយកដ្ឋាននឹងចាត់វិធានការតាមការស្នើសុំនោះ។
អ្នកនាំពាក្យអគ្គនាយកដ្ឋានអត្តសញ្ញាណប័ណ្ណនៃក្រសួងមហាផ្ទៃ លោក ចាន់ គឹមសេង មានប្រសាសន៍ថាលិខិតឆ្លងដែននៅកម្ពុជាមានបីប្រភេទគឺលិខិតឆ្លងដែនសម្រាប់ស្ថានទូត លិខិតឆ្លងដែនផ្លូវការនិងលិខិតឆ្លងដែនធម្មតា។ លោកបន្តថាលិខិតឆ្លងដែនផ្លូវការមានលក្ខណៈពិសេសត្រង់ថាអ្នកាន់លិខិតឆ្លងដែននោះ មិនត្រូវបង់ថ្លៃទិដ្ឋាការហើយអាចធ្វើដំណើរតាមច្រកពិសេស នៅពេលទៅដល់ប្រទេសគោលដៅ។
បើតាមមន្រ្តីក្រសួងការបរទេស អ្នកកាន់លិខិតឆ្លងដែនផ្លូវការអាចស្នាក់នៅប្រទេសមួយចំនួនបាន១៥ថ្ងៃដោយមិនមានទិដ្ឋាការ ក្នុងនោះមានប្រទេសកូរ៉េខាងត្បូងផងដែរ ដោយសារប្រទេសទាំងនោះមានកិច្ចព្រមព្រៀងជាមួយរដ្ឋាភិបាលកម្ពុជា។
អ្នកសម្របសម្រួលនៃបណ្តាញរួបរួមដើម្បីគណនេយ្យភាពសង្គមនៅអាស៊ីបូព៌ានិងប៉ាស៊ីហ្វិកប្រចំាកម្ពុជាលោក សន ជ័យ មានប្រសាសន៍ថាការស្នើដកលិខិតឆ្លងដែនផ្លូវការពីមន្រ្តីបែបនេះអាចបណ្ដាលមកពីមន្រ្តីទាំងនោះប្រើប្រាស់លិខិតឆ្លងដែនផ្លូវការនោះជាលក្ខណៈបុគ្គលផ្ទាល់ខ្លួនច្រើនពេក។ លោកបន្ថែមថាក្រសួងការដកហូតលិខិតឆ្លងដែនផ្លូវការនេះហាក់ដូចជាប៉ះពាល់សិទ្ធិសេរីភាពរបស់មន្ត្រី តែថាវាមានភាពល្អប្រសើរក្នុងការរៀបចំសណ្ដាប់ធ្នាប់តម្លាភាពក្នុងការប្រើប្រាស់លិខិតឆ្លងដែនផ្លូវការ។
[Quote3]
ទាក់ទងនឹងបញ្ហាលិខិតឆ្លងដែនផ្លូវការនេះ កន្លងមកមានសារព័ត៌មានក្នុងស្រុកមួយបានចុះផ្សាយថាមន្ត្រីកម្ពុជាកំពុងខ្វែងដៃខ្វែងជើងក្នុងការធ្វើលិខិតឆ្លងដែនផ្លូវការខុសច្បាប់ឲ្យពលករខ្មែរទៅធ្វើការនៅប្រទេសកូរ៉េខាងត្បូង។ យ៉ាងណាក្រសួងការបរទេសក៏បានចេញសេចក្ដីថ្លែងការណ៍បដិសេធទាំងស្រុងចំពោះព័ត៌មាននោះដោយក្រសួងបានលើកឡើងថាការចេញលិខិតឆ្លងដែនផ្លូវការនោះផ្ដល់ជូនសម្រាប់តែមន្រ្តីរាជការក្នុងការបំពេញបេសកកម្មផ្លូវការនិងចូលរួមវគ្គសិក្សានៅក្រៅប្រទេសតែប៉ុណ្ណោះ៕