មនុស្សរាប់លាននាក់ចាប់អារម្មណ៍សូគ្រាសនៅអាស៊ី​និង​ប៉ាស៊ីហ្វិក​​

មនុស្សរាប់លាននាក់នៅក្នុងប្រទេសឥណ្ឌូនេស៊ីនិងតំបន់ប៉ាស៊ីហ្វិចចាប់អារម្មណ៍​ទស្សនាហេតុការណ៍​សូគ្រាស នៅថ្ងៃពុធនេះដែលព្រះចន្ទបាំងពន្លឺព្រះអាទិត្យនាំឲ្យមានភាពងងឹតផ្នែកខ្លះនៃភពផែនដី។​

តាមការផ្សាយរបស់សារព័ត៌មាន ​BBC News ចុះផ្សាយថាសូគ្រាសចាប់ផ្តើម​នៅម៉ោង៦:១៩នាទីម៉ោងក្នុងតំបន់ ជាពេលដែលព្រះចន្ទចាប់ស្ថិតក្នុងគន្លងជាមួយគ្នាគឺនៅចន្លោះព្រះអាទិត្យនិងផែនដី។​ ពេលនោះព្រះចន្ទបាំងពន្លឺព្រះអាទិត្យមិនឲ្យចាំងដល់ផែនដីធ្វើឲ្យផែនដីងងឹតដូចយប់។​

នៅក្នុងខេត្តបេលីតុងរបស់ឥណ្ឌូនេស៊ីគឺមានហ្វូងមនុស្សប្រមូលផ្តុំគ្នានៅឆ្នេរសមុទ្រដើម្បីមើលហេតុការណ៍សូគ្រាស។​

សូគ្រាសបានកើតឡើងនៅចំប្រទេសឥណ្ឌូនេស៊ីនិងភាគកណ្តាលនៃមហាសមុទ្រប៉ាស៊ីហ្វិក ហើយសូគ្រាសនេះក៏បានប៉ះចំផ្នែកខ្លះនៃប្រទេសអូស្ត្រាលីនិងប៉ែកខាងកើតនៃទ្វីបអាស៊ីផងដែរ។​ សូគ្រាសនេះនឹងបញ្ចប់នៅពេលថ្ងៃលិចតាមម៉ោងនៅក្នុងតំបន់ដែលត្រូវនឹងម៉ោង​សកល៤:៣៤នាទីនៅភាគខាងជើងនៃរដ្ឋហាវ៉ៃ។​​

ប្រជាពលរដ្ឋរស់នៅប្រទេសឥណ្ឌូនេស៊ី​ក្នុងតំបន់ចម្ងាយ១៥០ គីឡូម៉ែត្រពីកោះស៊ូម៉ាត្រា កោះប័រណេអូ និងកោះស៊ូឡាវេស៊ីស្ថិតក្នុងគន្លងនៃសូគ្រាសនឹងជួបសូគ្រាសឬភាពងងឹតរយៈពេល៤ម៉ោងនៅព្រឹកថ្ងៃពុធនេះ។​ ចំណែកនៅកោះម៉ាបានិងកោះម៉ាឡូកូនឹងជួបភាពងងឹតប្រមាណ​៣នាទី ហើយតំបន់ខ្លះទៀត​នៃប្រទេសឥណ្ឌូនេស៊ី​នឹងត្រូវងងឹត១ឬ២នាទី។​

ចំណែកនៅភាគខាងត្បូងនៃប្រទេសចិន  អាស៊ីអាគ្នេយ៍ រដ្ឋហាវ៉ៃ និងរដ្ឋអាឡាស្កានឹងត្រូវជួបភាពងងឹតខ្លះដោយ​សារត្រូវជាប់ជាយនៃសូគ្រាស៕