រដ្ឋាភិបាលសម្រេច​ដំឡើង​ប្រាក់បំណាច់ដល់មន្រ្តីតុលាការ​គ្រប់កម្រិត​​

រដ្ឋាភិបាលបាន​សម្រេចដំឡើង​ប្រាក់បំណាច់​ដល់មន្រ្តីតុលាការ​គ្រប់កម្រិត តាំងពីថ្នាក់​​​ប្រធាន​តុលាការ ចៅក្រមនិង​ព្រះរាជអាជ្ញា ដោ​យ​​អះអាង​ថា​ដើម្បី​ធានានូវ”ប្រសិទ្ធភាព​និងការបង្កើនផលិតភាពក្នុងប្រព័ន្ធយុត្តិធម៌” ដែល​ការដំឡើង​​នេះ​នឹងត្រូវអនុវត្តចាប់ពីថ្ងៃទី១ ​ខែមេសា ឆ្នាំ២០១៦។​ នេះ​បើ​យោ​ង​តាម​​អនុក្រឹត្យចុះថ្ងៃទី៩ ខែមិនា ឆ្នាំ២០​១៦ ដោយ​លោកនាយករដ្ឋមន្ត្រី ហ៊ុន សែន រដ្ឋមន្រ្តី​ក្រសួ​ងយុត្តិធម៌ ក្រសួង​មុខងារសាធារណៈនិង​ក្រសួងសេដ្ឋកិច្ច​។

បើតាមអនុក្រឹត្យនោះ ប្រធានតុលាការកំពូលនិងអគ្គព្រះរាជអាជ្ញាអមតុលាការកំពូលនឹងទទួល​បានប្រាក់បំណាច់​ ១០លានរៀល(២៥០០ដុល្លារអាមេរិក)។ អនុប្រធាន​តុលា​ការ​កំពូល ប្រធានសភានៃ​តុលាការ​កំពូល​ អគ្គព្រះរាជអាជ្ញារងអមតុលាការ​កំពូល​ ប្រធាន​សាលាឧទ្ធរណ៍​និ​ងអគ្គ​ព្រះរាជអាជ្ញាអមសាលាឧទ្ធរណ៍ ទទួល​បានប្រាក់​បំណាច់​ចំនួន​៤លាន៥សែនរៀល​​។

ចំណែក​​ចៅក្រមតុលាការកំពូល ព្រះរាជអាជ្ញាអមតុលាការកំពូល អនុប្រធានសាលាឧទ្ធរ​ណ៍ ប្រធានសភា​នៃ​សាលាឧទ្ធរណ៍​និង​អគ្គព្រះរាជអាជ្ញារងអមសាលាឧទ្ធរណ៍ទទួល​បាន​ប្រាក់បំណាច់​៤លានរៀល។ ចៅក្រមសាលាឧទ្ធរណ៍ ប្រធានសាលាដំបូង ព្រះរាជអាជ្ញាអមសាលាឧទ្ធរណ៍ ព្រះរាជអាជ្ញាអមសាលាដំបូងនិង​ព្រះរាជអាជ្ញាបម្រើការងារនៅក្រសួងយុត្តិធម៌ ទទួល​បានប្រាក់បំណាច់៣លាន៥សែនរៀល។

បើតាមអនុក្រឹត្យ​នោះ អនុប្រធានសាលាដំបូង ប្រធានតុលាការជំនាញនៃសាលាដំបូងនិង​ព្រះរាជអាជ្ញារងអមសាលា​ដំបូង ទទួលបានប្រាក់បំណាច់​៣លាន២សែនរៀលហើយចៅក្រមសាលាដំបូងទទួល​បាន​៣លានរៀល ។ ចំណែ​ក​ចៅក្រមកម្មសិក្សានិង​ព្រះរាជអាជ្ញារងកម្មសិក្សា ទទួលបានប្រាក់បំណាច់១លាន៥សែនរៀល។

រដ្ឋាភិបាល​បាន​បញ្ជាក់​ថា​ប្រាក់បំណាច់ចៅក្រមនិងព្រះរាជអាជ្ញារួមទាំងការបើកប្រាក់បៀវត្សប្រចាំខែត្រូវអនុវត្ត​តាម​ប្រព័ន្ធធនាគារ។

អនុក្រឹត្យឲ្យ​ដឹង​ថា​ប្រាក់បំណាច់ចៅក្រម​និងព្រះរាជអាជ្ញា​ រួមមាន​ប្រាក់បំណាច់​មុខងារ​ចៅក្រម​និង​ព្រះរាជអា​ជ្ញា​ ប្រាក់​បំណាច់​ឈ្នួល​ផ្ទះ ប្រាក់បំណាច់​អធិមូលជីវភាព ប្រាក់​បំណាច់​សម្រាប់​ផ្លាស់ប្តូរ​ទីតាំងការងារ ប្រាក់ថ្លៃ​ព្យាបាល​នៅក្នុងមន្ទីរពេទ្យ​និង​ប្រាក់​ឧបត្ថម្ភ​សម្រាប់​ព្យាបាល​ជំងឺ​ប្រចាំ​កាយ​រយៈ​ពេល​យូរ​របស់ចៅក្រម​និង​ព្រះរាជអាជ្ញា​​។ អនុក្រឹត្យ​បញ្ជាក់​ថា​​ប្រាក់​បំណាច់ទាំងនេះ​ត្រូវបាន​បើក​ផ្តល់​ប្រចាំខែ​។​

អ្នកនាំពាក្យ​ក្រសួង​មុខងារសាធារណៈ លោក ស សាម៉ីឌី មានប្រសាសន៍​ថា​ប្រាក់បំណាច់​គឺ​ជា​ប្រាក់បន្ថែម​លើ​ប្រាក់​​​​បៀវត្សមូលដ្ឋានរបស់​មន្រ្តីតុលាការ​។ លោក​មិន​អាច​បញ្ជាក់​ថាតើ​​ការដំឡើង​នោះស្មើនឹង​ប្រាក់​បំណាច់​បច្ចុ​ប្បន្ន​​ប៉ុន្មាននោះទេ ដោយ​លោក​ស្នើ​ឲ្យ​ទាក់ទង​ខាង​ឧត្តមក្រុមប្រឹក្សានៃ​អង្គចៅក្រមវិញ។​

អគ្គលេខាធិការរបស់ឧត្ដមក្រុមប្រឹក្សាអង្គចៅក្រម លោក សំ ប្រជាមានិត ប្រសាសន៍ថាបច្ចុប្បន្ន​ប្រធានតុលាការកំពូលទទួលបាន​ប្រាក់បំណាច់ប្រហែល​២លាន៤សែនរៀលនិង​ព្រះរាជអាជ្ញារងទទួលបានប្រាក់បំណាច់១លាន៥ សែន​រៀល។ លោក​បន្ត​ថា​ចៅក្រមកម្មសិក្សាទទួលបានប្រាក់បំណាច់៥០ម៉ឺនរៀល ចៅក្រមតុលាការជាន់ទាបទទួលបានប្រាក់បំណាច់១លាន៣សែនរៀលរហូតដល់១លាន៧សែនរៀល។​

ប្រធាន​បច្ចេកទេស​ឃ្លាំ​មើល​ការ​រំលោភ​សិទ្ធិ​មនុស្ស​របស់​អង្គការលីកាដូនិង​ជាអ្នក​តាម​ឃ្លាំមើល​ដំណើរការសវនាការ លោក អំ សំអាត ចាត់ទុក​ការដំឡើង​ប្រាក់បំណាច់ដល់​មន្រ្តីតុលាការ​គ្រាន់តែ​ជា​”ចំណែកតូចមួយ”​នៃ​ការ​លុប​បំបាត់​​​អំ​ពើពុករលួយ​ ប៉ុន្តែ​​លោកថា​មិនទាន់អាច​ធានា​ឲ្យ​តុលាការ​មានយុត្តិធម៌ពិតប្រាកដនោះទេ។ លោក​បន្តថា​ដើម្បីធានាឲ្យ​តុលាការមាន​​យុត្តិធម៌ពិតប្រាកដ ​ត្រូវ​លុបបំបាត់អំពើពុករលួយក្នុងប្រព័ន្ធ​តុលាការ បំបាត់​បក្ស​ពួកនិយម​​និង​ការរំលោភអំណាច។ លោក​បញ្ជាក់​ថា​​កំណែ​ទម្រង់ប្រព័ន្ធ​តុលាការ​ត្រូវ​មានលក្ខណៈ​ជាប្រព័ន្ធ​និង​ស្តង់ដារ។​

របាយការណ៍​របស់​វិទ្យាស្ថាន​សិទ្ធិមនុស្ស​នៃ​គណៈ​មេធាវី​អន្តរជាតិ​(IBAHRI)​ដែល​មាន​មូល​ដ្ឋាន​នៅ​ទីក្រុង​ឡុងដ៍​ប្រទេស​អង់គ្លេសនិង​បាន​ចេញផ្សាយ​នៅខែកញ្ញា ឆ្នាំ​២០១៥ឲ្យ​ដឹង​ថា​​រដ្ឋាភិបាលកម្ពុជាបាន​​ដាក់សម្ពាធ​លើ​ប្រព័ន្ធ​តុលាការ។​ វិទ្យាស្ថានបាន​ផ្តល់អនុសាសន៍​ទៅរដ្ឋាភិបាលកម្ពុជា​និង​ក្រសួងយុត្តិធម៌ ឲ្យ​បញ្ឈប់​ជា​បន្ទាន់​ការ​ដាក់សម្ពាធ​នយោបាយ​លើ​ប្រព័ន្ធ​តុលាការ​និង​ស្នើ​ឲ្យ​រដ្ឋាភិបាល​​​ប្តេជ្ញាធានា​និង​ការ​ពារ​ការ​បែង​ចែក​អំណាច​នៅកម្ពុជា​។​

​កាលពីខែតុលា ឆ្នាំ​២០១៥ លោកនាយក​រដ្ឋមន្ត្រី ហ៊ុន សែន បាន​ព្រមាន​ថានឹង​មាន​សង្គ្រាម​កើតឡើង ប្រសិនបើ​គណបក្ស​សង្រ្គោះជាតិ​បង្កើត​តុលាការ​ឯករាជ្យ​សម្រាប់​កាត់ទោស​អ្នក​រកស៊ី​ខុសច្បាប់ ដោយ​លោក​បាន​ប្រៀបធៀប​ការធ្វើកំណែទម្រង់​បែបនេះ ទៅ​នឹង​សម័យ ប៉ុល ពត​។​

 ​លោក​មានប្រសាសន៍ថា​៖ “​ប៉ុន្តែ​ដើមចោទ គេ​នឹង​ដើរ​ចង្អុ​រដូច​សម័យ​អាពត​(​ប៉ុល ពត​) ដើរ​ចង្អុល​អា​នេះ​ម្ចាស់​ដី អាហ្នឹង​ដី​វា​១០​ហិកតា​កាលពីមុន ដាក់គ្រិប ហើយ​អានេះ​គ្រូបង្រៀន អា​នេះ​សាស្ត្រាចារ្យ​។ អ៊ីចឹង​ទេ សង្គ្រាម​កើត ហើយ​កុំ​ថា​ខ្ញុំ​គំរាម ព្រោះ​រឿង​អី​ឲ្យ​សារ​មក​បែប​ហ្នឹង​ទៅហើយ​។ ច្បាប់​របស់​ប្រទេស​មួយ​ត្រូវបាន​ថែរក្សា ម៉េច​ចាំបាច់​ដល់​តែ​ឈ្នះ មិន​ប្រឹង​ពី​ឥឡូវ​ទៅ ថា​អ្នក​ណា​ខ្លះ​រកស៊ី​ខុសច្បាប់ ប្តឹង​ពី​ឥឡូវ​ទៅ ប្តឹង​ឡើង​តុលាការ​ទៅ ម៉េច​ក៏​មិន​ប្តឹង​។ ហើយ​ចាំ​ដល់​ពេល​ខ្លួន​ឈ្នះ​។ អ៊ីចឹង​ទេ អា​រឿង​អាពត​មក​ដល់​ទៀត ជឿ​ខ្ញុំ​ទៅ វា​នឹង​កើតសង្គ្រាម​សារជាថ្មី​។ គេ​ថា​និយាយ​អ៊ីចឹង​ដូចជា​បន្លាច អត់​ទេ វា​(​នឹង​)​កើត​មែន​”​។​

​ការ​ថ្លែង​របស់​លោក​នាយករដ្ឋមន្ត្រីទំនង​សំដៅ​ទៅលើ​ថ្នាក់ដឹកនាំ​គណបក្ស​សង្គ្រោះ​ជាតិ ដែល​កន្លងមក​ទាំង​លោក សម រង្ស៊ី និង​លោក កឹម សុខា សុទ្ធតែ​អះអាងថានឹង​បង្កើត​តុលាការ​ឯករាជ្យ​មួយ​ដើម្បី​ផ្តល់​យុត្តិធម៌​ដល់​ជនរងគ្រោះ ដែល​ត្រូវបាន​រំពាន​បំពាន​ដោយ​អ្នករកស៊ី​ខុសច្បាប់​៕​ ដោយ​ស៊ុន ណារិន និង​ខាន់ លក្ខិណា​

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ