ប្រជាជនជប៉ុនរំឮកខួប​៥ឆ្នាំ​នៃការវាយប្រហារដោយរលកស៊ូណាមី

ប្រជាជនជប៉ុនរាប់ម៉ឺននាក់នៅថ្ងៃសុក្រនេះរៀបចំពិធីកាន់ទុក្ខរំឮកខួប៥ឆ្នាំ​នៃហេតុការណ៍រញ្ជួយដី​យ៉ាងខ្លាំងនិង ការវាយប្រហារដោយ​រលកស៊ូណាមីកាលពី៥ឆ្នាំ​មុន​ដែលបណ្តាលឲ្យមនុស្សប្រមាណ​២ម៉ឺននាក់​បានស្លាប់។​

កាលពីថ្ងៃទី១១ខែមីនាឆ្នាំ២០១១ កម្លាំងរញ្ជួយ​ដី៩រិច្ឆទ័របានវាយប្រហារលើប្រទេសជប៉ុន ហើយបានបង្កជា​រលកស៊ូណាមីដែលមានកម្ពស់ប្រមាណ១៧ម៉ែត្រ ហើយបានបណ្តាលឲ្យមនុស្សជិត២ម៉ឺននាក់ស្លាប់។​ រលក​ស៊ូណាមីបានវាយប៉ះរោងចក្រផលិតថាមពលនុយក្លេអ៊ែ Fukushima Dai-ichi បង្កើតជាវិបត្តិសាយភាយវិទ្យុសកម្មចំនួន៣កន្លែងដែលធ្វើសាយភាយជាតិពុលប៉ះដល់ទឹក អាហារ និងខ្យល់​។​

កាលពី៥ឆ្នាំមុននោះប្រជាជនជប៉ុនជាង​១៦០ ០០០នាក់ត្រូវជម្លៀសទៅកន្លែងដែលមានសុវត្ថិភាព ហើយរហូតដល់ពេលនេះពួកគេប្រមាណ១០ភាគរយនៅមិនទាន់ទៅរស់នៅផ្ទះរបស់ពួកគេវិញទេដោយសារកន្លែងខ្លះនៅ​តែមានសារធាតុវិទ្យុសកម្ម។​

ហេតុការណ៍នេះបានកន្លងទៅ៥ឆ្នាំគត់បើគិតត្រឹមថ្ងៃទី១១ខែមីនានេះ តែប្រជាជនជប៉ុនពិសេសអ្នកជួបហេតុ​ការណ៍នេះអ្នកបាត់បង់សាច់ញាតិនៅតែសំដែងទុក្ខសោកការឈឺចាប់​ដែលមិនអាចបរិយាយបាន។​

នាយករដ្ឋមន្ត្រីជប៉ុនលោក ហ្ស៊ីនហ្សូ អាបេ និងព្រះចៅអធិរាជ អាគីហ៊ីតូ ដាក់បាច់ផ្កាក្នុងពិធីកាន់ទុក្ខនេះនៅក្នុងទីក្រុងតូក្យូ ហើយមានការស្មឹងស្មាតរក្សាភាពស្ងប់ស្ងាត់មួយសន្ទុះនៅម៉ោង​២និង៤៦នាទីរសៀល។​ នេះបើតាមសារព័ត៌មាន Channel News Asia៕