រដ្ឋាភិបាលសម្រេចកាត់ដី៥ពាន់ហិកតាក្នុងតំបន់ជម្រកសត្វព្រៃភ្នំគូលែនព្រហ្មទេព ក្នុងស្រុកជាំក្សាន្តខេត្តព្រះវិហារ ជាតំបន់សហ គមន៍ សម្រាប់ចែកជូនប្រជាពលរដ្ឋដែលរស់នៅមូលដ្ឋាន។
នៅក្នុងអនុក្រឹត្យមួយចុះថ្ងៃទី៦ ខែមករា ដោយលោកនាយករដ្ឋមន្រ្តី ហ៊ុន សែន រដ្ឋាភិបាលបានបញ្ជាក់ថាត្រូវបានកំណត់ ជាតំបន់សហ គមន៍ដែនជម្រកសត្វព្រៃគូលែន ព្រហ្មទេព លើផ្ទៃដីសរុបចំនួន៥ពាន់ហិកតា សម្រាប់ផ្តល់ជូនប្រជាពលរដ្ឋដែលរស់នៅក្នុងមូលដ្ឋាន ស្ថិតក្នុងភូមិធម្មជាតិសម្តេចតេជោ ហ៊ុន សែន ឃុំយាងនិងឃុំកន្ទួត ស្រុកជាំក្សាន្ត ខេត្តព្រះវិហារ។ អនុក្រឹត្យបញ្ជាក់ថាតំបន់នោះត្រូវបានកំណត់ជាតំបន់គ្រប់គ្រងបម្រើឲ្យការអភិវឌ្ឍសេដ្ឋកិច្ច សង្គម កិច្ចរបស់ប្រជាពលរដ្ឋមូលដ្ឋាន។
បើតាមអនុក្រឹត្យ រាល់ការចេញប័ណ្ណសម្គាល់ដីធ្លី ឬការអនុញ្ញាតឲ្យប្រើប្រាស់ដីធ្លីនៅក្នុងតំបន់នេះត្រូវមានការបញ្ជាក់យល់ព្រមជាមុនពី ក្រសួងបរិស្ថាន ដោយអនុលោមតាមច្បាប់ភូមិបាល។
អ្នកនាំពាក្យក្រសួងបរិស្ថាន លោក សៅ សុភាព មានប្រសាសន៍ថាការកំណត់ជាដីសហគមន៍ឬសម្បទានសង្គមកិច្ច ធ្វើឡើងឆ្លើយតបទៅនឹងសំណូមពររបស់ប្រជាពលរដ្ឋ។ លោកបន្តថារដ្ឋាភិបាលមានគោលនយោបាយក្នុងការផ្តល់ឱកាសដល់ប្រជាពលរដ្ឋ នៅពេលចាំបាច់ណាមួយ។
មន្រ្តីសម្របសម្រួលអាដហុកប្រចាំខេត្តព្រះវិហារ លោក ឡោ ចាន់ មានប្រសាសន៍ថាកន្លងទៅ នៅតំបន់នោះ ប្រជាពលរដ្ឋធ្លាប់ចេញមុខតវ៉ារឿងជម្លោះដីធ្លី។ លោកបន្តថាប្រជាពលរដ្ឋជាង៣០០គ្រួសារត្រូវបានបណ្តេញចេញ ហើយពួកគេបានតវ៉ាជាបន្តបន្ទាប់ទៅស្ថាប័នពាក់ព័ន្ធ៕