ក្រុមយុវជនគាំទ្រ​បក្សកាន់អំណាច​ទាមទារ​ឲ្យ​លោក សម រង្ស៊ី សុំទោសជាសាធារណៈ

លោក​ ប៉ាន់ខែម ប៊ុនថន (ធ្វេង)ប្រធានប្រតិបត្តិក្រុមយុវជនសម្ព័ន្ធ​សេនានាគនិង​​ជា​ជំនួយការ​របស់នាយករដ្ឋមន្រ្តី(រូបថតពីហ្វេសប៊ុកសម្ព័ន្ធសេនានាគ)

ក្រុមសម្ព័ន្ធ​យុវជន​សេនានាគ​ដែល​គាំទ្រលោក​នាយករដ្ឋមន្រ្តី​ហ៊ុន សែន បាន​ចេញមុខ​ទាម​ទារ​ឲ្យ​ប្រធាន​គណ​បក្ស​ប្រឆាំង​ លោក សម រង្ស៊ី សុំទោស​ជាសាធារណៈចំពោះ​ពួកគេនិង​ប្រជា​ពលរដ្ឋ​ទូទៅ ដោយ​ថា​លោកប្រមាថ​ថ្នាក់ដឹកនាំនិង​ប្រជា​ជនកម្ពុជា ​រឿង​ចុចចូលចិត្ត(Likes)​លើហ្វេសប៊ុក​របស់នាយករដ្ឋមន្រ្តី។​

នៅ​ក្នុង​សេចក្តីថ្លែងការណ៍​មួយចុះថ្ងៃទី​១១ខែមីនា​​ សម្ព័ន្ធ​សេនានាគ​បានលើកឡើងថា​ក្រុមរបស់ពួកគេ​”គោរព​ ស្រឡាញ់​ អាណិត​ ចូលចិត្ត​(Likes)និង​បានគាំទ្រ​យ៉ាង​ស្មោះស្ម័គ្រពិតប្រាកដ​ប្រកប​ដោយ​ភក្តីភាព”​នូវទំព័រ​​ហ្វេសប៊ុក​របស់នាយករដ្ឋមន្រ្តី។​ ពួកគេបន្ត​ថា​លោក​ សម​ រង្ស៊ី បាន​បង្ហោះ​លើហ្វេសប៊ុក​កាលពី​ថ្ងៃទី៩ខែមីនា ថា​រកឃើញពីLikesក្លែងក្លាយ​លើទំព័រ​ហ្វេសប៊ុក​របស់​ហ៊ុន សែន”ដោយ​ភ្ជាប់នឹង​ការ​សរសេរ​ថាLikesមួយចំនួនធំបានមកពីការទិញឬ​ជួលមនុស្សក្រីក្រ អត់ការារធ្វើ សិប្បនិម្មិតក្លែងបន្លំ”

ពួកគេ​ចាត់ទុក​ថា​នេះ​ជា​ការ​ប្រើពាក្យ”​ប្រកប​ដោយ​ភាព​ខ្វះ​ការយល់ដឹង គ្មានសីលធម៌ ប្រមាថមាក់ងាយកិត្តិយស”ចំពោះ​ប្រជា​ពលរដ្ឋខ្មែរ​ រួមមាន​ព្រះសង្ឃ មន្រ្តីរាជការស៊ីវិល កងកម្លាំង​ប្រដាប់អាវុធ គ្រប់ប្រភេទ​ សិស្ស​ និស្សិត បញ្ញាវន្ត ដែលចូលទៅLikeទំព័រនាយករដ្ឋមន្រ្តី។​ ពួកគេសរសេរថា៖ “សំណេរនេះប្រកបដោយភាពអកុសលនិងអវិជ្ជា​ខ្វះ​សេចក្តីថ្លៃថ្នូរ គ្មានការទទួល​ខុសត្រូវ ប្រមាថ​មាក់ងាយ​ប្រជា​ពលរដ្ឋ​ខ្មែរ សង្គមជាតិទាំងមូលបែបនេះនិង​ប៉ះពាល់​យ៉ាងធ្នង់ធ្ងរ​ដល់កិត្តិយស​ប្រមុខ​ដឹកនាំរាជរដ្ឋាភិបាល​”

សម្ព័ន្ធសេនានាគបញ្ជាក់ថា៖ “យើងខ្ញុំសុំឲ្យ​លោក សម រង្ស៊ី ចេញមុខ​សុំទោស​ជាសាធារណៈ​ចំពោះ​យើងខ្ញុំ​ ក៏ដូចជា​ប្រជា​ពលរដ្ឋ​ទាំងក្នុង​និងក្រៅ​ប្រទេស​ដែលបានចូលLikesគេហទំព័រ​បណ្តាញសង្គម(Page Face​book)របស់សម្តេច​អគ្គមហាសេនាបតីតេជោ ហ៊ុន សែន នាយករដ្ឋមន្រ្តី​នៃ​ព្រះរាជាណាចក្រកម្ពុជាជាដាច់ខាត”

សេចក្តីថ្លែងការណ៍របស់ក្រុមយុវជននេះចុះហត្ថលេខាដោយ​លោក​ ប៉ាន់ខែម ប៊ុនថន ប្រធានប្រតិបត្តិក្រុមយុវជនសម្ព័ន្ធ​សេនានាគនិង​​ជា​ជំនួយការ​របស់នាយករដ្ឋមន្រ្តី។ លោកធ្លាប់បានចេញមុខ​តំណាងឲ្យ​អ្នកតវ៉ាទាមទារឲ្យ​ទម្លាក់លោក កឹម សុខា ពីតំណែង​ជា​អនុប្រធាន​ទី១នៃ​រដ្ឋសភា ដែលកាលនោះ​មានហិង្សា​វាយ​ដំ​លើ​តំណាងរាស្រ្ត២រូប​។​

វីអូឌីមិនទាន់អាច​ទាក់ទង​សុំការឆ្លើយតបពី​លោក សម រង្ស៊ី បានភ្លាមៗនៅឡើយទេ។

សារបង្ហោះលើហ្វេសប៊ុករបស់លោក សម រង្ស៊ី
សារបង្ហោះលើហ្វេសប៊ុករបស់លោក សម រង្ស៊ី

ពាក់ព័ន្ធ​នឹង​សារនៅលើហ្វេសប៊ុកនេះ​ រដ្ឋមន្ត្រីប្រតិភូអមនាយករដ្ឋមន្ត្រី លោក សោម សឿន ក៏​បានដាក់ពាក្យបណ្តឹងទៅតុលាការ​ ប្តឹងលោក សម រង្ស៊ី ផងដែរ។ ក្នុងពាក្យបណ្ដឹង រដ្ឋមន្រ្តីនោះបានចោទប្រធានគណបក្សសង្គ្រោះជាតិពីបទក្លែងលិខិតនៅលើFacebookនិង​បង្ហោះអត្ថបទមានខ្លឹមសារមួលបង្កាច់ខុសពីការពិត។

លោក សោម សឿន សរសេរថា ៖ “ការភ្ជាប់ជាមួយនឹងការអត្ថាធិប្បាយថា Like មួយចំនួនធំ ដែលបង្ហាញលើទំព័រ Facebook របស់សម្តេចគឺបានមកពីការទិញឬជួលមនុស្សក្រីក្រ ដែលអត់ការងារធ្វើ ឲ្យបង្កើត Accounts Facebook (គណនេយ្យហ្វេសប៊ុក) ក្លែងក្លាយដើម្បីផ្តល់ Likes សិប្បនិម្មិតក្លែងបន្លំជូនសម្តេច”

លោក សោម សឿន បានចាត់ទុកថាការបង្ហោះនៅលើ Facebook របស់លោក សម រង្ស៊ី បានធ្វើឲ្យប៉ះពាល់កិត្តិយសដល់ថ្នាក់ដឹកនាំជាតិនិងរូបលោកផ្ទាល់យ៉ាងធ្ងន់ធ្ងរ ដោយលោកស្នើទៅឲ្យតុលាការផ្តន្ទាទោសលោក សម រង្ស៊ី ទៅតាមច្បាប់ និងទាមទារសំណងជំងឺចិត្តចំនួន២០លានរៀល។

លោក សម រង្ស៊ី បានបញ្ជាក់កាលពីថ្ងៃសុក្រថាប្រទេស​កម្ពុជា​មិនមានសេរីភាព​ក្នុងកIរបញ្ចេញមតិហើយ​​ថា​រដ្ឋាភិបាល​ចង់​ដាក់គុករូ​បលោក​ ដោយ​សារតែលោក​និយាយថា​ហ៊ុន សែន ទិញLikesក្លែងក្លាយសម្រាប់ហ្វេសប៊ុករបស់លោក៕​

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered