លោក ហ៊ុន ម៉ាណែត ថាការចូលរួម​កម្មវិធីចូលឆ្នាំខ្មែរនៅអាមេរិក​មិនពាក់ព័ន្ធនឹងរឿងនយោបាយ

លោក ហ៊ុន ម៉ាណែត កាលពីកន្លងទៅ(រូបថតពីហ្វេសប៊ុក​របស់​លោក​)

កូន​ប្រុស​នាយក​រដ្ឋមន្រ្តី លោក ហ៊ុន ម៉ាណែត នៅថ្ងៃ​អាទិត្យ​នេះ ​បាន​បក​ស្រាយ​ថា​ការសម្រេច​ចិត្ត​​ចូលរួម​កម្មវិធី​ចូលឆ្នាំខ្មែរនៅទីក្រុងឡុងប៊ិចដែលរៀបចំដោយ​​ពលរដ្ឋ​ខ្មែរអាមេរិកកាំង មិនពាក់ព័ន្ធ​នឹងរឿងនយោ​បាយ​​នោះទេ ដោយ​លោក​ស្នើ​ឲ្យ​មាន​ការ​អញ្ជើញ​តំណាងពីគណបក្ស​ប្រឆាំង​ចូលរួម​ផងដែរ។​

លោក​ ហ៊ុន ម៉ាណែត ជាប្រធានក្រុមការងាររៀបចំអង្គការចាត់តាំងយុវជនក្រៅប្រទេសនិងជាមេបញ្ជាការរងកងទ័ពជើង​គោក នឹងអញ្ជើញទៅសហរដ្ឋ​អាមេរិក ដើម្បីចូលរួមពិធីក្បួនដង្ហែបុណ្យចូលឆ្នាំប្រពៃណីខ្មែរ នៅទីក្រុងឡុងប៊ិច រដ្ឋកាលីហ្វញ៉ា នៅខែមេសាខាងមុខ​នេះ តាមការ​អញ្ជើញ​របស់​គណៈកម្មាធិការ​បុរីកម្ពុជា។ ការដង្ហែក្បួនចូលឆ្នាំខ្មែរ ដែលគ្រោងធ្វើឡើងនៅថ្ងៃទី១០ ខែមេសា មានគោលបំណងដើម្បីលើកស្ទួយវប្បធម៌និងប្រពៃណីខ្មែរ។

កាលពីថ្ងៃសុក្រ​ ប្រជា​ពលរដ្ឋខ្មែរអាមេរិកកាំង​បាន​ចេញមុខតវ៉ា​ប្រឆាំង​នឹង​ការអញ្ជើញនេះ។ លោកហ៊ុន ម៉ាណែត បានពន្យល់​ថា​ការដែល​លោក​សម្រេចចូលរួម​តាមការអញ្ជើញ​របស់​គណៈកម្មាធិការ​បុរីកម្ពុជា ដោយ​សារ​លោក​ចង់​បង្ហាញពីវប្បធម៌ខ្មែរ​ទៅ​ឲ្យ​ជាតិ​សាសន៍​ដទៃទៀត​បានដឹង។

លោក ហ៊ុន ម៉ាណែត បានសរសេរនៅលើហ្វេសប៊ុក​របស់​លោកថា៖ មិនសំខាន់ថាបងប្អូនម្ខាងៗមានហេតុផលយ៉ាងណានោះទេ ប៉ុន្តែអ្វីដែលសំខាន់ គឺវាបង្ហាញឲ្យ​ឃើញនូវការបែកបាក់សាមគ្គីរវាងខ្មែរនិងខ្មែរ ក្នុងពេលមួយដែលយើងគួររួបរួមគ្នា មិនប្រកាន់គ្នាដើម្បីធ្វើការរួមគ្នាលើកស្ទួយជាតិរបស់យើង តាមរយៈការរួមគ្នាបង្ហាញអំពីវប្បធម៌និងអរិយធម៌ដ៏ឧត្តុងឧត្តមរបស់ខ្មែរយើង ឲ្យ​ប្រជាជនអាមេរិកាំងនិងជាតិសាសន៍ដទៃទៀតបានឃើញ”

លោក​បញ្ជាក់ថា​ការចូលរួមនេះ​គឺដើម្បីបង្ហាញ”ការគាំទ្រយ៉ាងពេញទំហឹងរបស់ខ្ញុំ”ចំពោះគោលគំនិតរបស់គណៈកម្មាធិការ ដែលលោក​ថា​ចង់ឃើញខ្មែររួបរួមគ្នា ដោយមិនប្រកាន់ទីកន្លែងរស់នៅ(នៅអាមេរិក នៅស្រុកខ្មែរឬនៅ​ប្រទេសណាទេ) និន្នាការនយោបាយនិង​សាសនា។

បើ​តា​ម​លោក ហ៊ុន ម៉ាណែត កម្មវិធីនេះត្រូវបានបង្កើតឡើងនៅឆ្នាំ២០០៥ ហើយគណៈកម្មាធិការបុរីកម្ពុជាធ្លាប់បានអញ្ជើញមន្ត្រីតំណាងរាជរដ្ឋាភិបាល សង្គមស៊ីវិល វិស័យឯកជន ហើយ​លោក កឹម សុខា អនុប្រធាន​គណបក្ស​សង្រ្គោះជាតិ ក៏​ធ្លាប់បានចូលរួមជាភ្ញៀវកិត្តិយសនៅឆ្នាំ២០១០ផងដែរ។​ លោក ហ៊ុន ម៉ាណែត បានអំពាវនាវឲ្យ​បញ្ចប់​ការ​ខ្វែងគំនិតលើ​ការ​អញ្ជើញ​រូ​ប​លោក​ឲ្យ​ចូល​រួ​ម​កម្មវិធីនេះ​។

លោក​មានប្រសាសន៍ថា៖ “ដូច្នេះខ្ញុំសង្ឃឹមថាការខ្វែងគំនិតរវាងបងប្អូនជនរួមជាតិទាំងអស់ទាក់ទងប្រធានបទនេះនឹងអាចត្រូវបញ្ចប់ ហើយជំនួសវិញដោយការចូលរួមមតិយោបល់ថាតើធ្វើយ៉ាងណាអោយយើងអាចទាញយកផលចំណេញពីកម្មវិធីនេះ ដើម្បីផ្សព្វ​ផ្សាយពីការរីកចម្រើន​របស់ប្រទេសរបស់យើង ពីវប្បធម៌និងអរិយធម៌ខ្មែរយើងឲ្យ​ជនជាតិបរទេសបានដឹងនិងបានយល់”

លោក​បានស្នើ​ថា៖ “ខ្ញុំក៏សូមឲ្យ​គណៈកម្មាធិការបុរីកម្ពុជា មេត្តាពិចារណាក្នុងការអញ្ជើញថ្នាក់ដឹកនាំរបស់គណបក្សសង្គ្រោះជាតិ ចូលរួមជាមួយគ្នាក្នុងឱកាសចូលឆ្នាំថ្មី ប្រពៃណីជាតិដ៏ថ្លៃថ្លារបស់យើងនេះ ដើម្បីបង្ហាញពីសាមគ្គីភាពរវាងគ្នានិងគ្នាក្នុងនាមមហាគ្រួសារខ្មែរតែមួយ”

ប្រជាពលរដ្ឋខ្មែរអាមេរិកកាំងជាង​​២០០នាក់រស់នៅទីក្រុងឡុងប៊ិច​ កាលពីថ្ងៃសុក្រ បាន​ជួប​ពិភាក្សា​ជាមួយ​អ្នករៀបចំ​កម្មវិធី​​ចូលឆ្នាំខ្មែរ ដោយពួកគេមួយចំនួន​បាន​​សម្តែង​ការខឹង​សម្បានឹង​ក្រុមការងាររៀបចំ​ដែលអញ្ជើញកូនប្រុសច្បងរបស់លោកនាយករដ្ឋមន្រ្តី ហ៊ុន សែន ចូលរួមកម្មវិធីចូលឆ្នាំខ្មែរ។​

តាមវីដេអូឃ្លីប​ដែលវីអូឌីទទួលបាន ស្រ្តីម្នាក់ដែល​តវ៉ា​ប្រឆាំង​នឹង​វត្តមាន​របស់​លោក ហ៊ុន ម៉ាណែត បានលើកឡើង​ដោយ​ខឹងសម្បាថា៖ “អ្នក​ឯង​ អត់ដឹង​ព័ត៌មាន​នៅ​ស្រុក​ខ្មែរ​ដល់កម្រិត​ណាទេ ខ្ញុំទទួលស្គាល់​ថាអ្នកឯង​ក្រណាត់ស តែខ្ញុំឈឺចាប់ណាស់ ខ្ញុំប្រាប់អ្នកឯងឲ្យ​ដឹង​ ខ្ញុំឈឺចាប់ណាស់ អត់ដី អស់ផ្ទះណា ខ្ញុំប្រាប់អ្នកឯង​ឲ្យដឹងណា។ អ្នក​ឯង​កុំគាំទ្រ​មនុស្សប្រភេទហ្នឹង…កុំយកមនុស្សអញ្ចឹងមកលោក​។ អ្នកស្រុកមានច្រើនណាស់ ល្អៗអញ្ជើញទៅ កុំយកគណបក្ស​ណាចូលរួម​”

បើតាមវីដេអូឃ្លីប​ លោក ស្ទីវ ម៉េង(Steve Meng) តំណាងគណៈកម្មការបុរីកម្ពុជា(Cambodia Town)បានលើកឡើង​ថា​ក្រុមការងារ​បាន​អញ្ជើញលោក ហ៊ុន ម៉ាណែត ​មកមែន តែ​មិនទាន់ដឹង​ថា​តើ​លោកនឹង​អាចអញ្ជើញចូលរួមនោះទេ។ លោក​​បន្ត​ថា​លោក​អញ្ជើញតំណាងមកពីស្ថាប័ន​ផ្សេងៗនៅកម្ពុជាមិន​មែនតែ​លោក​ ហ៊ុន ម៉ាណែត នោះទេ។​

លោកមានប្រសាសន៍​ថា៖ “ខ្ញុំឯកភាពគ្នាទាំងអស់គ្នា​ទាំងសមាជិកទាំងអស់ហ្នឹង ហៅទាំងអស់ គ្រប់ស្ថាប័នទាំងអស់ មិនថាស្រុកខ្មែរទេ ស្រុកណាក៏ហៅមកដែរបង តាំងពីក្រសួងទេសចរណ៍ ក្រសួងពាណិជ្ជកម្ម ក្រសួងវប្បធម៌ហើយ​និងគ្រប់ប៉ុស្តិ៍TV(ទូរទស្សន៍)នៅស្រុកខ្មែរទាំងអស់។  ក៏ប៉ុន្តែ​បងត្រូវដឹងថាស្រុកខ្មែរ​យើង ហៅ​មកមែន ប៉ុន្តែ​មិនបានមកទេ ត្រូវសម្ភាសន៍ជាមួយ​ទូតអាកាំង​ទៀត បានអាចមក។ ដូច្នេះពេលនេះឥឡូវ ហៅអញ្ជើញ​មកមែន តែមិនទាន់ដឹង​ដំណឹង​ថា​ពួកគេអញ្ជើញមក មិនទាន់ដឹងនៅឡើយទេ​ ព្រោះវីហ្សា​មិនទាន់ដឹង”

ភ្លាមៗនោះ ពលរដ្ឋម្នាក់បានលើកឡើង​ជាការព្រមាន​ថា​ប្រសិនបើ​លោក ហ៊ុន ម៉ាណែត អញ្ជើញមកនឹងមាន​បញ្ហា​ដែល​លោកថា”មិនត្រូវការគាំទ្រអ្នកដែលដឹកនាំរបៀបហ្នឹង”។ អ្នកខ្លះលើកឡើងថាមិនត្រូវការ”របបកុម្មុយនីស្តជាដាច់ខាត”

អ្នកនាំពាក្យ​គណបក្ស​ប្រជាជនកម្ពុជា លោក សុខ ឥសាន មានប្រសាសន៍ថា​នេះ​ជា​ការអញ្ជើញផ្លូវការរបស់​ពល​រដ្ឋខ្មែរនៅទីនោះ​ហើយ​រដ្ឋាភិបាល​អាមេរិកជាអ្នកផ្តល់វីហ្សា​​សម្រាប់​លោក ហ៊ុន ម៉ាណែត។ លោក​មានប្រសាសន៍ថា​៖ “អញ្ចឹងប្រសិន​បើ​មាន​រឿងអ្វីមួយកើតឡើង ពួកគាត់ត្រូវទទួលខុសត្រូវចំពោះមុខ​ច្បាប់”។ លោកបញ្ជាក់ថា៖ “ក្រោយឆ្នាំ​១៩៩៣ ប្រទេស​កម្ពុជា​ប្រកាន់​យក​របប​លទ្ធិ​ប្រជា​ធិបតេយ្យ  តើរបបកុម្មុយនីស្តមកពីណាទៀត​ បើរដ្ឋធម្មនុញ្ញចែងមកអញ្ចឹងហើយ”។​

ប្រធានអង្គការសម្ព័ន្ធមិត្តខ្មែរអាមេរិកកាំង លោក ទូច វិបុល ​ប្រាប់វីអូឌី(VOD)​ថាសមាជិកនៃ​គណៈកម្មការបុរីកម្ពុជាឈ្មោះ Rich​er ​Sanដែលលោកថាស្និទ្ធិ​នឹង​គណបក្សប្រជាជន​កម្ពុជា បានអញ្ជើញលោក ហ៊ុន ម៉ាណែត ឲ្យ​ចូលរួមកម្មវិធីនេះ​។ លោកបញ្ជាក់បន្ថែម​ថា៖ “ការ​មកហ្នឹងខុសក្បួន នេះជាកម្មវិធីវប្បធម៌ ហើយគាត់(ហ៊ុន ម៉ាណែត​)មិនមែន​ជាអ្នក​ជំនាញវប្បធម៌ណា ជាកងទ័ពតើ​។ តាមដឹងគោលបំណងមកហ្នឹង​ដើម្បីពង្រីកបណ្តាញពលរដ្ឋនៅអាមេរិកកាំង”

គួរ​បញ្ជាក់​ថា​កាលពីពាក់កណ្តាលកុម្ភៈ ឆ្នាំ២០១៦ ប្រជា​ពលរដ្ឋខ្មែរ​អាមេរិកកាំង​រាប់​រយនាក់បាន​ធ្វើបាតុកម្មប្រឆាំង​នឹងវត្តមាន​របស់​​លោក​នាយករដ្ឋមន្រ្តី ហ៊ុន សែន ដែល​ចូលរួមកិច្ចប្រជុំ​កំពូលអាមេរិក-អាស៊ាន​ ដោយ​លើក​ឡើង​ថា​រដ្ឋាភិបាល​មិន​គោរព​សិទ្ធិមនុស្ស​និង​លទ្ធិប្រជា​ធិបតេយ្យ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ