ក្រសួងមហាផ្ទៃជំរុញជាថ្មីទៀតទៅមន្ត្រីនគរបាលចរាចរណ៍ផ្លូវគោកបង្កើនសកម្មភាពថែមទៀត នៅថ្ងៃទី១៥ ខែមីនា ដោយធ្វើការត្រួតពិនិត្យការអនុវត្តច្បាប់ និងធ្វើការផាកពិន័យចំពោះអ្នកបើកបរមិនគោរពច្បាប់ ដោយអះអាងថា ដើម្បីកាត់បន្ថយគ្រោះថ្នាក់ចរាចរណ៍។
ក្នុងសេចក្តីជូនដំណឹងរបស់ប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកនៃក្រសួងមហាផ្ទៃ ចុះកាលពីថ្ងៃទី១១ខែមីនា ឆ្នាំ២០១៦នេះ បានឲ្យដឹងថា អ្នកប្រើប្រាស់ផ្លូវមួយចំនួននៅតែមានការធ្វេសប្រហែស ឬខ្ជីខ្ជា មិនអើពើចំពោះការអនុវត្តច្បាប់ ដូចជា ការជិះទោចក្រយានយន្តមិន ពាក់មួយសុវត្ថិភាព បើកបរលើសល្បឿនកំណត់ បើកបរក្រោមឥទ្ធិពលនៃជាតិស្រវឹង មិនគោរពសិទ្ធិ អាទិភាព និងការដឹកជញ្ជូនលើសចំណុះ។ គណៈកម្មាធិការជាតិសុវត្ថិភាពចរាចរណ៍ផ្លូវគោក បានជំរុញទៅមន្ត្រីនគរបាលចរាចរណ៍ផ្លូវគោកទាំងអស់បន្តអនុវត្តច្បាប់ ដោយធ្វើការផាកពិន័យយ៉ាងម៉ឺងម៉ាត់ ចំពោះអ្នកដែលមិនគោរពច្បាប់ទាំងនោះ ដើម្បីកាត់បន្ថយគ្រោះថ្នាក់ចរាចរណ៍ជាអតិបរមា។
សេចក្តីជូនដំណឹងដដែលឲ្យដឹងទៀតថា កន្លងទៅមានសាធារណៈជនមួយចំនួនបានចូលរួមគោរព និងអនុវត្តច្បាប់ស្តីពីចរាចរណ៍ផ្លូវគោកយ៉ាងផុសផុល ដូចជា ការយកយាន្តយន្តជាច្រើនចុះបញ្ជីត្រួតពិនិត្យ លក្ខណៈបច្ចេកទេស ធ្វើលិខិតអនុញាត ធ្វើអាជីវកម្មដឹកជញ្ជូន និងការប្រឡងយកប័ណ្ណបើកបរ។ ប៉ុន្តែ គណៈកម្មាធិការជាតិសុវត្ថិភាពចរាចរណ៍ផ្លូវគោករកឃើញថា អ្នកបើកបរនៅតែមានការធ្វេសប្រហែស មិនគោរពច្បាប់បានល្អនៅឡើយ។
អនុប្រធាននាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ លោក សុខ ណុប លទ្ធផលត្រួតពិនិត្យការអនុវត្តច្បាប់ចរាចរណ៍រយៈពេល៥៥ថ្ងៃ គិតពីថ្ងៃទី១ ខែមករា ដល់ថ្ងៃទី២៤ ខែកុម្ភៈ ឆ្នាំ២០១៦ យានយន្តចូលគោលដៅត្រួតពិនិត្យចំនួន១,៩២៣,៣៥០ គ្រឿង ក្នុងនោះមានយានយន្តល្មើសចំនួន៤០៧,៣៨៩គ្រឿង អប់រំចំនួន១៨៤,៩៦១គ្រឿងនិងពិន័យ២២២,៤២៨គ្រឿង។ ប្រាក់ពិន័យសរុបមានចំនួនជាង៤ពាន់លានរៀល(៤,១១១,០៩៥,០០០)ឬស្មើនឹងជាង១លានដុល្លារអាមេរិក។
លោក សុខ ណុប បញ្ជាក់ថា ប្រាក់ពិន័យនេះនឹងត្រូវបែងចែក៩៥ភាគរយដល់អង្គភាពមានសមត្ថកិច្ចនិងមន្ត្រីអនុវត្តផ្ទាល់ ចំណែក៥ភាគរយនៅសល់ត្រូវផ្តល់ទៅក្រសួងសេដ្ឋកិច្ចនិងហិរញ្ញវត្ថុ៕
