កងទ័ពរបស់សហរដ្ឋអាមេរិក បានរាយការណ៍ថា នាវាចម្បាំងរបស់កូរ៉េខាងជើង បានបាត់ដោយពួកគេសង្ស័យថា បានលិច ស្របពេលដែលសមយុទ្ធរវាងកូរ៉េខាងត្បូង និងសហរដ្ឋអាមេរិកនៅតែបន្ត។
នាវាសហប្រតិបត្តិការរបស់សហរដ្ឋអាមេរិកនៅជិតនាវារបស់កូរ៉េខាងជើងបានរាយការណ៍ថា នាវារបស់កូរ៉េខាងជើងបានបាត់ជាច្រើនថ្ងៃមកហើយ។ នេះបើតាមសារព័ត៌មានBBC News។
ហេតុការណ៍នៃការបាត់នាវាចម្បាំងរបស់កូរ៉េខាងជើងនេះ ធ្វើឲ្យកម្រិតនៃភាពតានតឹងកាន់តែកើនឡើងខ្ពស់ ដោយសារអាមេរិក និង កូរ៉េខាងត្បូងនៅតែបន្តធ្វើសមយុទ្ធយោធាកម្រិតខ្នាតធំ។ កូរ៉េខាងជើង ក៏បានព្រមានធ្វើសង្គ្រាមដោយសារតែការធ្វើសមយុទ្ធនេះដែរ។ កូរ៉េខាងជើងថ្លែងថា ពួកគេត្រៀមរៀបចំដើម្បីវាយប្រហារមុនចំពោះសញ្ញានៃការវាយប្រហារកើតឡើង។
តាមការគត់សម្គាល់របស់មន្ត្រីយោធាជើងទឹករបស់អាមេរិក បញ្ជាក់ថា ពួកគេបានដឹងភ្លាមៗតាំងពីថ្ងៃនៃការបាត់នាវារបស់កូរ៉េខាងជើង។ ពួកគេថ្លែងថា កូរ៉េខាងជើងបានចល័តនាវាចម្បាំងជាច្រើនប្រភេទរបស់ខ្លួនជាង៧០គ្រឿង បន្ទាប់ពីបាត់នាវារបស់ខ្លួន១គ្រឿងនោះ។
សារព័ត៌មានCNNចុះផ្សាយថា នាវាអាមេរិកបានតាមដានយ៉ាងដិតដល់ពីសកម្មភាពយោធាកូរ៉េខាងជើងស្វែងរកនាវាចម្បាំងដែលបាត់នោះ។
សារព័ត៌មានBBC News ចុះផ្សាយថា នាវាចម្បាំង២គ្រឿងរបស់កូរ៉េខាងជើង ដាក់ប្រចាំការនៅសមុទ្រខាងកើត ប្រឈមមុខជាមួយជប៉ុន ហើយនាវានោះតែងធ្វើប្រតិបត្តិការនៅក្បែរៗតំបន់នោះ៕
