លោកនាយករដ្ឋមន្រ្តី ហ៊ុន សែន បានចេញសារាចរមួយ ដោយណែនាំឲ្យស្ថាប័នពាក់ព័ន្ធត្រួតពិនិត្យមើលលិខិតឆ្លងដែនបំពេញបេសកកម្មនិងប្រើប្រាស់ឲ្យបានត្រឹមត្រូវ។
នៅក្នុងសារាចរមួយចុះថ្ងៃទី១៤ខែមីនា លោក ហ៊ុន សែន បានលើកឡើងថាកាលពីកន្លងមកថ្មីនេះ មានមន្រ្តីកម្ពុជាមួយចំនួននៅក្នុងក្រសួង ស្ថាប័នខ្លះបានស្នើលិខិតឆ្លងដែនផ្លូវការនិងប្រើប្រាស់លិខិតឆ្លងដែនផ្លូវការដោយមិនត្រឹមត្រូវ ដែលលោកថានាំឲ្យប៉ះពាល់កិត្តិយសរដ្ឋាភិបាល។ លោកបន្តថាដើម្បីជៀសវាងកុំឲ្យមានបញ្ហាបែបនេះ លោកណែនាំឲ្យក្រសួង ស្ថាប័ននានាឲ្យពិនិត្យបេសកកម្មឲ្យបាន”ហ្មត់ចត់បំផុត” មុននឹងស្នើសុំលិខិតឆ្លងដែនផ្លូវការពីក្រសួងការបរទេស។
លោក ហ៊ុន សែន បានបញ្ជាក់ថា៖ “ក្រោយពីបញ្ចប់បេសកកម្មនៅក្រៅប្រទេស មន្រ្តីរាជការគ្រប់ក្រសួង ស្ថាប័នទាំងអស់ត្រូវរក្សាទុកលិខិតឆ្លងដែនផ្លូវការដោយខ្លួនឯង ហើយត្រូវប្រើប្រាស់លិខិតឆ្លងដែនផ្លូវការនេះឲ្យបានត្រឹមត្រូវ ជៀសវាងការប្រើប្រាស់ខុសគោលកដៅដែលនាំឲ្យប៉ះពាល់ដល់កិត្តិយសរាជរដ្ឋាភិបាលនិងព្រះរាជណាចកម្រកម្ពុជា”។
កាលពីថ្ងៃទី៤ ខែមីនា ក្រសួងការបរទេសកម្ពុជាបានចេញលិខិតមួយទៅកាន់រដ្ឋមន្រ្តីក្រសួងមហាផ្ទៃ លោក ស ខេង ដោយស្នើដកលិខិតឆ្លងដែនផ្លូវការមន្រ្តីរដ្ឋាភិបាល ពេលបញ្ចប់បេសកកម្មនៅក្រៅប្រទេស។ លិខិតបញ្ជាក់ថាក្រសួងនឹងប្រគល់លិខិតឆ្លងដែនផ្លូវការទាំងនោះទៅវិញនៅពេលមន្រ្តីនោះត្រូវមានបេសកកម្មនៅបរទេសជាថ្មី។
ក្រោយមក ក្រសួងការបរទេសបានចេញសេចក្តីជូនដំណឹងមួយទៀត ដោយថាកន្លងមកចំពោះមន្រ្តីរាជការរបស់ស្ថាប័នរដ្ឋដែលត្រូវចេញទៅបំពេញបេសកកម្មផ្លូវការឬចូលរួមកម្មសិក្សានៅក្រៅប្រទេស ក្រសួងបានចេញនូវលិខិតឆ្លងដែនផ្លូវការ ដោយផ្អែកលើលើសំណើសុំរបស់ស្ថាប័នទាំងនោះ ដោយពុំមានការបង់ថ្លៃ។ ក្រសួងបន្តថាក៏ប៉ុន្តែក្នុងរយៈពេលកន្លងមកនេះ មានមន្រ្តីរបស់អង្គភាពឬស្ថាប័នខ្លះ នៅពេលចប់បេសកកម្មផ្លូវការឬមិនបានទៅបំពេញបេសកកម្មផ្លូវការ បានប្រើប្រាស់លិខិតឆ្លងដែនផ្លូវការនោះក្នុងការធ្វើដំណើរទៅធ្វើពលករខុសច្បាប់នៅក្រៅប្រទេស។
ក្រសួងការបរទេសបានបញ្ជាក់ថា៖ “ប្រការនេះបានធ្វើឲ្យអាជ្ញាធរមានសមត្ថកិច្ចរបស់ប្រទេសនោះ មានការភ្ញាក់ផ្អើលនិងចាប់អារម្មណ៍យ៉ាងខ្លាំង ដោយមិនយល់ថាហេតុអ្វីបានជាពលរករខុសច្បាប់កាន់លិខិតឆ្លងដែនផ្លូវការហើយបានជូនព័ត៌មានមកក្រសួងការបរទេសនិងសហប្រតិបត្តិការអន្តរជាតិតាមរយៈស្ថានទូតយើង”។
អ្នកនាំពាក្យអគ្គនាយកដ្ឋានអត្តសញ្ញាណប័ណ្ណនៃក្រសួងមហាផ្ទៃ លោក ចាន់ គឹមសេង មានប្រសាសន៍ថាលិខិតឆ្លងដែននៅកម្ពុជាមានបីប្រភេទគឺលិខិតឆ្លងដែនសម្រាប់ស្ថានទូត លិខិតឆ្លងដែនផ្លូវការនិងលិខិតឆ្លងដែនធម្មតា។ លោកបន្តថាលិខិតឆ្លងដែនផ្លូវការមានលក្ខណៈពិសេសត្រង់ថាអ្នកាន់លិខិតឆ្លងដែននោះ មិនត្រូវបង់ថ្លៃទិដ្ឋាការហើយអាចធ្វើដំណើរតាមច្រកពិសេស នៅពេលទៅដល់ប្រទេសគោលដៅ។
បើតាមមន្រ្តីក្រសួងការបរទេស អ្នកកាន់លិខិតឆ្លងដែនផ្លូវការអាចស្នាក់នៅប្រទេសមួយចំនួនបាន១៥ថ្ងៃដោយមិនមានទិដ្ឋាការ ក្នុងនោះមានប្រទេសកូរ៉េខាងត្បូងផងដែរ ដោយសារប្រទេសទាំងនោះមានកិច្ចព្រមព្រៀងជាមួយរដ្ឋាភិបាលកម្ពុជា៕