រញ្ជួយដីកម្លាំង៣,១រិច្ឆទ័រវាយប្រហារកូរ៉េខាងជើង​

កម្លាំងរញ្ជួយដីទំហំ៣,១រិច្ឆទ័រវាយប្រហារនៅភាគខាងជើងនៃប្រទេសកូរ៉េខាងជើងនៅថ្ងៃចន្ទនេះនាំឲ្យមានការសង្ស័យថាប្រទេសនេះសាកល្បងអាវុធនុយក្លេអ៊ែជាថ្មីទៀតដែលធ្វើឡើងនៅក្រោមដី។​

ក្រុមមន្ត្រីជំនាញរបស់កូរ៉េខាងត្បូងបានឲ្យដឹងថាកម្លាំងរញ្ជួយដី៣,១ រិច្ឆទ័របានវាយប្រហារនៅទីក្រុងស៊ុងលីម នៅភាគខាងជើងនៃប្រទេសកូរ៉េខាងជើង។​ នេះបើតាមសារព័ត៌មាន Channel News Asia។​

ការរញ្ជួយដីនេះនាំឲ្យមជ្ឈដ្ឋានមួយចំនួនសង្ស័យថាកូរ៉េខាងជើងសាកល្បងអាវុធនុយក្លេអ៊ែជាថ្មីទៀតដែលធ្វើឡើងនៅក្រោមដី។ តែទោះយ៉ាងណាមន្ត្រីជំនាញកូរ៉េខាងត្បូងអះអាងថាពួកគេរកមិនឃើញភស្តុតាងណាមួយបញ្ជាក់ថាកូរ៉េខាងជើងសាកល្បងអាវុធនុយក្លេអ៊ែនោះទេ។​

ពួកគេបញ្ជាក់ថានេះជាការរញ្ជួយដីបែបធម្មជាតិ ហើយពួកគេរកមិនឃើញថាកូរ៉េខាងជើងសាកល្បងអាវុធនោះទេ៕