រដ្ឋាភិបាលប្រទេសស្វីសចុះហត្ថលេខាបន្ដផ្ដល់ជំនួយដល់មន្ទីរពេទ្យ​គន្ធបុប្ផា

លោក Beat Richner ស្ថាបនិក​មន្ទីរពេទ្យ​គន្ធបុប្ផា (រូបថតពីហ្វេសប៊ុក​របស់​លោក​)

រដ្ឋាភិបាល​កម្ពុជា​និង​ស្វីស នៅ​រសៀល​ថ្ងៃ​អង្គារនេះ នឹង​​ចុះ​ហត្ថលេខាលើកិច្ចព្រមព្រៀងស្ដីពីកិច្ចសហប្រតិបត្ដិការបច្ចេកទេស ហិរញ្ញវត្ថុសេដ្ឋកិច្ចនិងជំនួយមនុស្សធម៌ ​ដែល​ក្នុងនោះ​មាន​ការផ្តល់ជំនួយ​ដល់មន្ទីរពេទ្យ​គន្ធ​បុប្ផា​ផងដែរ។​

សេចក្ដីជូនព័ត៌មានមួយចុះ​ថ្ងៃទី១៤ ខែមីនា បានឲ្យដឹងថានៅថ្ងៃទី១៥ ខែមីនា វេលាម៉ោង៣និង​៣០នាទីរសៀលនេះ​ នៅទីស្ដីការក្រសួងការបរទេស លោក ហោ ណាំហុង រដ្ឋមន្ដ្រីការបរទេសកម្ពុជា​និងលោក អ៊ីវ៉ូ ស៊ីបី(Ivo SIEBER)ឯកអគ្គរដ្ឋទូតស្វីសប្រចាំប្រទេសកម្ពុជា នឹងចុះហត្ថលេខាលើកិច្ចព្រមព្រៀងរវាងរដ្ឋាភិបាលកម្ពុជានិងរដ្ឋាភិបាលសហព័ន្ធស្វីស ស្ដីពីកិច្ចសហប្រតិបត្ដិការបច្ចេកទេស ហិរញ្ញវត្ថុសេដ្ឋកិច្ចនិងជំនួយមនុស្សធម៌។

សេចក្ដីជូនព័ត៌មានបានឲ្យដឹងទៀតថាការចុះហត្ថលេខាលើកិច្ចព្រមព្រៀងនេះបានបញ្ជាក់ជាថ្មីម្ដងទៀតពីការប្ដេជ្ញាចិត្ដរបស់ប្រទេសស្វីសក្នុងការជួយដល់ការអភិវឌ្ឍកម្ពុជា។ ក្រសួងបានបន្ដថាបច្ចុប្បន្នជំនួយហិរញ្ញវត្ថុប្រចាំឆ្នាំរបស់ស្វីសចំពោះកម្ពុជាមានចំនួន១២លានដុល្លារអាមេរិក ដែលផ្ដោតលើអភិបាលកិច្ចមូលដ្ឋាននិងការចូលរួមរបស់ពលរដ្ឋ កសិកម្មនិងសន្ដិសុខស្បៀង ការអភិវឌ្ឍជំនាញនិងការងារនិងជួយ​ដល់​មន្ទីរពេទ្យគន្ធបុប្ផា។

បើ​តាម​ក្រសួង​ការបរទេស​កម្ពុជា រដ្ឋាភិបាលស្វីសបានជួយគាំទ្រដល់មន្ទីរពេទ្យគន្ធបុប្ផា ចាប់តាំងពីឆ្នាំ១៩៩៤ ក្នុងថវិកាសរុបចំនួន៥៥លានដុល្លារអាមេរិក។ ថវិការួមវិភាគទានប្រចាំឆ្នាំរបស់ស្វីសដល់មន្ទីរពេទ្យគន្ធបុប្ផា មានចំនួន៤លានដុល្លារអាមេរិក៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ