អ្នកស៊ើបអង្កេតសិទ្ធិមនុស្សអង្គការសហប្រជាជាតិបានអំពាវនាវកាលពីថ្ងៃចន្ទឲ្យមានការកាត់ទោសមេដឹកនាំកូរ៉េខាងជើងលោក គីម ជុងអ៊ុន និងមន្រ្តីជាន់ខ្ពស់ពីបទប្រព្រឹត្តឧក្រិដ្ឋកម្មប្រឆាំងមនុស្សជាតិ។
ភ្នាក់ងារព័ត៌មាន Reuter បានរាយការណ៍ថាអ្នកស៊ើបអង្កេតសិទ្ធិមនុស្សអង្គការសហប្រជាជាតិលោក Marzuki Darusman បានធ្វើការអំពាវនាវបែបនេះពេលថ្លែងនៅឯកិច្ចប្រជុំក្រុមប្រឹក្សាសិទ្ធិមនុស្សរបស់ UN ដែលកិច្ចប្រជុំនេះត្រូវបានពហិការដោយកូរ៉េខាងជើង។ លោក Marzuki Darusman បានថ្លែងថាកូរ៉េខាងជើងកំពុងចំណាយធនធានជាច្រើនដើម្បីបង្កើតអាវុធនុយក្លេអ៊ែរនិងអាវុធប្រល័យលោកជាច្រនផ្សេងទៀត ខណៈពេលដែលពលរដ្ឋកូរ៉េខាងជើងជាច្រើនមានអាហារមិនគ្រប់គ្រាន់។
លោក Darusman បានថ្លែងដោយយោងតាមរបាយការណ៍របស់លោកបានចេញផ្សាយកាលពីខែមុនបានឱ្យដឹងថា៖ «ខ្ញុំចង់បញ្ជាក់ជាថ្មីពីការអំពាវនាវរបស់ខ្ញុំទៅសហគមន៍អន្តរជាតិឲ្យបោះជំហានទៅមុខ ដើម្បីធានាឱ្យបាននូវគណនេយ្យភាពនៃការដឹកនាំជាន់ខ្ពស់នៃសាធារណរដ្ឋប្រជាមានិតប្រជាធិបតេយ្យកូរ៉េដែលរួមទាំងលោក គឹម ជុងអ៊ុន ផង “។
សភាពអ៊ឺរ៉ុបនិងសហរដ្ឋអាមេរិកបានគាំទ្រការអំពាវនាវរបស់លោកសម្រាប់ការទទួលខុសត្រូវនេះដោយមិនបាននិយាយឈ្មោះលោក គីម ជុងអ៊ុន។
ប្រទេសចិនដែលជាសម្ព័ន្ធមិត្តទីក្រុងព្យុងយ៉ាងបានបញ្ចេញសំឡេងបែបសម្របសម្រួលដោយនិយាយថា បញ្ហាសិទ្ធិមនុស្សមិនគួរត្រូវបានធ្វើជារឿងនយោបាយនោះទេនិងអំពាវនាវឱ្យមានវិធីសាស្រ្តទូលំទូលាយដើម្បីដោះស្រាយជាមួយកូរ៉េខាងជើង។
កាលពីថ្ងៃទី១ ខែមីនា រដ្ឋមន្ត្រីការបរទេសកូរ៉េខាងជើងលោក រី ស៊ូយ៉ុង (Ri Su Yong) បានថ្លែងសុន្ទរកថានៅក្នុងវេទិកានៅក្រុងហ្សឺណែវថា ខ្លួននឹងធ្វើពហិការសម័យប្រជុំណាមួយដែលពិនិត្យកំណត់ត្រារបស់ខ្លួនហើយនឹង «មិនដែល» ត្រូវបានចងដោយសេចក្តីសម្រេចបែបនេះទេ៕
ប្រភព៖ CNA
