សាលាក្រុងបាងកកបានសម្រេចចិត្តកម្រិតសកម្មភាពលេងទឹកអំឡុងពេលបុណ្យសង្ក្រាន្ត ឬបុណ្យចូលឆ្នាំនៅក្នុងទីក្រុងបាងកក ដោយអះអាងថាដើម្បីកាត់បន្ថយការប្រើប្រាស់ទឹក ខណៈពេលដែលប្រទេសថៃកំពុងជួបប្រទះគ្រោះរាំងស្ងួតដ៏ធ្ងន់ធ្ងរ។
កាសែតបាងកកប៉ុស្តិ៍បានចុះផ្សាយដោយដកស្រង់សម្ដីអភិបាលរងក្រុងបាងកកលោក អាម៉ន គិតចាវែងគុន (Amorn Kitchawengkul) ថាការលេងជះទឹកនិងគប់ទឹកក្នុងបុណ្យចូលឆ្នាំនោះនឹងត្រូវកំណត់ឲ្យលេងតែរយៈពេល៣ថ្ងៃប៉ុណ្ណោះ គឺចាប់ពីថ្ងៃទី១២ដល់ថ្ងៃទី១៤ ខែមេសា ហើយសកម្មភាពនៃការលេងជះទឹកនិងគប់ទឹកក្នុងរយៈពេល៣ថ្ងៃនោះត្រូវបញ្ឈប់ត្រឹមម៉ោង៩យប់។
ការសម្រេចនេះត្រូវបានធ្វើឡើងនៅក្នុងកិច្ចប្រជុំរួមគ្នារវាងរដ្ឋបាលក្រុងបាងកក ក្រសួងទេសចរណ៍ និងកីឡា នាយកដ្ឋាននគរបាលទេសចរណ៍ និងវិស័យឯកជន។
ថ្ងៃឈប់សម្រាកសម្រាប់បុណ្យចូលឆ្នាំថៃក្នុងឆ្នាំមានរយៈពេល៥ថ្ងៃគឺពីថ្ងៃទី១៣ដល់ថ្ងៃទី១៧ ខែមេសា ដោយថ្ងៃទី១៦ និងថ្ងៃទី១៧ ខែមេសាគឺចំថ្ងៃចុងសប្ដាហ៍។
ការលេងគប់ទឹកគឺផ្នែកដ៏សំខាន់មួយនៃការប្រារព្ធបុណ្យចូលឆ្នាំរបស់ថៃ ពិសេសនៅតំបន់មួយចំនួនដូចជាតំបន់ស៊ីលុម និងផ្លូវខៅសាន ដែលជាតំបន់ទេសចរណ៍ល្បីរបស់ថៃ។ តំបន់ទាំងនោះតែងក្លាយទៅជាទីលានក្នុងការបាចទឹក ជះទឹកដាក់គ្នា ហើយជាទូទៅបញ្ចប់នៅពេលយប់ជ្រៅ។
អភិបាលរងក្រុងបាងកកលោក Amorn បានមានប្រសាសន៍ថា វិស័យឯកជនបានយល់ពីស្ថានការណ៍ និងបានយល់ព្រមសហការជាមួយអាជ្ញាធរដើម្បីសន្សំសំចៃទឹក។ តម្រូវការទឹកនៅអំឡុងពេលចូលឆ្នាំនេះជាទូទៅកើនឡើងច្រើនជាង៣នៃតម្រូវក្នុងថ្ងៃធម្មតា៕
ប្រភព៖ Bangkok Post
