លោកនាយករដ្ឋមន្រ្តី ហ៊ុន សែន នៅថ្ងៃព្រហស្បតិ៍នេះ បានថ្លែងថានយោបាយឈ្នះៗជារបស់លោកសុទ្ធសាធ ដោយថាដោយសារតែនយោបាយនេះហើយ ទើបនាំឲ្យកម្ពុជាមានឯកភាពជាតិនិងទឹកដី។
ក្នុងពិធីចែកសញ្ញាបត្រដល់និស្សិតសាកលវិទ្យាល័យន័រតុន ដែលធ្វើឡើងនៅកោះពេជ្រ លោកនាយករដ្ឋមន្រ្តីបានថ្លែងថាលោកមិនដណ្តើមរបស់គេ តែលោកថាលោកក៏មិនអនុញ្ញាតឲ្យគេដណ្តើមយកនយោបាយឈ្នះៗ ដែលលោកថាជាកម្មសិទ្ធិរបស់លោក។ លោកបញ្ជាក់ថាដោយសារនយោបាយឈ្នះៗនេះនាំឲ្យកម្ពុជាដែលមានតំបន់ត្រួតត្រាច្រើន មកជាតំបន់ត្រួតត្រាតែមួយ។
លោក ហ៊ុន សែន មានប្រសាសន៍ថា៖ “នយោបាយឈ្នះៗហ្នឹងគឺជារបស់ខ្ញុំសុទ្ធសាធតែម្តង”។
កាលពីថ្ងៃទី២៣ខែតុលា ឆ្នាំ២០១៥ ដែលជាទិវារំឭកកិច្ចព្រមព្រៀងទីក្រុងប៉ារីស លោក ហ៊ុន សែន បានអះអាងថាដោយសារនយោបាយឈ្នះៗរបស់លោក ទើបនាំឲ្យកម្ពុជាមានសន្តិភាពពេញលេញ ដែលលោកថាគឺជាសន្តិភាពដែលជនកម្ពុជាបានរួបរួមគ្នា បង្កើតឡើងដោយខ្លួនឯងហើយ គ្មានអ្នកឈ្នះគ្មានអ្នកចាញ់។ លោកបន្តថានយោបាយឈ្នះៗរបស់លោកដែលបានដាក់ចុះនៅឆ្នាំ១៩៩៦-១៩៩៨ គឺមានតែការឯកភាពជាតិ ឯកភាពទឹកដី គឺជាលើកដំបូងក្នុងប្រវត្តិសាស្ត្រជាង៥០០ឆ្នាំ ដែលលោកថាកម្ពុជាមានប្រទេសមួយមានតំបន់ត្រួតត្រាមួយ មានរដ្ឋធម្មនុញ្ញមួយ មានព្រះមហាក្សត្រមួយ មានរដ្ឋាភិបាលតែមួយ មានកងកម្លាំងប្រដាប់អាវុធតែមួយ ហើយគ្មានការបែងចែក៕
