តុលាការកំពូលប៉ាគីស្ថានអនុញ្ញាតឲ្យអតីតប្រធានាធិបតីចេញទៅក្រៅប្រទេស​

តុលាការកំពូលរបស់ប៉ាគីស្ថាន​បានសម្រេចអនុញ្ញាតឲ្យអតីតប្រធានាធិបតីលោក Pervez Musharraf ដែលកំពុងរង់​ចាំសវនាការពីបទក្បត់ជាតិ​និង​បទចោទផ្សេងៗទៀតឲ្យទៅព្យាបាល​ជំងឺនៅក្រៅប្រទេស។​

ការសម្រេចដកការហាម​មិនឲ្យអតីតប្រធានាធិបតីរូបនេះចាកចេញទៅក្រៅប្រទេសខណៈលោក​កំពុងមានបញ្ហាប្រឈមខ្លាំងខាងសុខភាព។​​ ពេលនេះតុលាការអនុញ្ញាតឲ្យចាកចេញ​ទៅក្រៅប្រទេស​ក្នុងលក្ខណៈស្វែងរកការព្យាបាលសុខភាព​ដែលកំពុងប្រឈមខ្លាំង។ ​នេះបើតាមសារព័ត៌មាន BBC។​

អតីតប្រធានាធិបតី Pervez Musharraf រងការចោទប្រកាន់ថាបានសម្លាប់អតីតនាយករដ្ឋមន្ត្រី​ Benazir Bhutto កាលពីឆ្នាំ២០០៧និងកំពុងប្រឈមបទចោទផ្សេងៗទៀតរួមទាំងបទក្បត់ជាតិ​ផងដែរ។​

ទោះយ៉ាងណា​លោក Pervez Musharraf​ វ័យ៧០ច្រានចោលការចោទប្រកាន់ទាំងអស់នោះ ហើយហៅថា ការចោទរូបលោកគឺជារឿងនយោបាយ។​ ​ លោកបានចាប់ផ្តើមឈឺទ្រូងកាលពីខែមករាឆ្នាំ២០១៦ ហើយត្រូវបានបញ្ជូនទៅមន្ទីរពេទ្យនៅដើមសប្តាហ៍នេះដោយសារមានបញ្ហាឈឺឆ្អឹងខ្នងបន្ថែមទៀត៕