អាមេរិកអំពាវនាវឲ្យកូរ៉េខាងជើងដោះលែងនិស្សិតរបស់ខ្លួនជាបន្ទាន់​

តុលាការរបស់ទីក្រុងព្យុងយ៉ាងកាលពីថ្ងៃពុធម្សិលមិញបានកាត់ទោសនិស្សិតជនជាតិអាមេរិកម្នាក់​ឲ្យជាប់ពន្ធនាគារ១៥ឆ្នាំពីបទ​ធ្វើសញ្ញាផ្សព្វផ្សាយឲ្យមានយុទ្ធនាការប្រឆាំងរដ្ឋាភិបាល។​

និស្សិតជនជាតិ​អាមេរិក​ឈ្មោះ អូតូ វ៉ឺមបៀ អាយុ២១ឆ្នាំមកពីសាកលវិទ្យាល័យវីហ្គីនៀ ត្រូវសមត្ថកិច្ចកូរ៉េខាងជើងចាប់ខ្លួនកាលពីខែមករាដើមឆ្នាំ២០១៦នៅក្នុងសណ្ឋាគារ​ដោយចោទថានិស្សិតរូបនេះ​បានធ្វើសញ្ញាឃោ​សនាឲ្យមានការធ្វើវិទ្ធង្សនាឬធ្វើសកម្មភាពប្រឆាំងរដ្ឋាភិបាលដោយសម្ងាត់។ នេះបើតាមសារព័ត៌មាន​ Channel News Asia។​​

ភ្នាក់ងារសារព័ត៌មានរដ្ឋកូរ៉េខាងជើង KCNA ចុះផ្សាយថាតុលាការជាន់ខ្ពស់បានសម្រេចឲ្យយុវជនជនជាតិអាមេរិករូបនេះជាប់ពន្ធនាការចំនួន​១៥ឆ្នាំ។​

ជុំវិញការកាត់ទោសនេះមន្ត្រីអ្នកនាំពាក្យសេតវិមានលោក Josh Earnest ថ្លែងថា ការចោទប្រកាន់របស់រដ្ឋអំ​ណាចកូរ៉េខាងជើងលើប្រជាពលរដ្ឋរបស់ខ្លួននេះគឺជាចេតនាចង់យកទៅប្រើជាកូនអ៊ុកដើម្បីបន្តរបៀបវារៈន​យោបាយរបស់ខ្លួនតែប៉ុណ្ណោះ។​ អ្នកនាំពាក្យរូបនេះជំរុញឲ្យឲ្យមានការដោះលែងនិស្សិតរបស់ខ្លួនជាបន្ទាន់​ ដោយមិនមានលក្ខខណ្ឌ៕