ប្រធានរដ្ឋសភា លោក ហេង សំរិន ដែលបានទៅបំពេញទស្សនកិច្ចនៅប្រទេសអូស្រ្តាលី បានអះអាងថារដ្ឋសភាកម្ពុជាមានសណ្តាប់ធ្នាប់ជាងសភាអូស្រ្តាលី នៅពេលមានការជជែកដេញដោលគ្នា។
លោក ហេង សំរិន បានលើកឡើងបែបនេះនៅពេលលោកទៅបំពេញទស្សនកិច្ចផ្លូវការនៅប្រទេសអូស្រ្តាលី ចាប់ពីថ្ងៃទី១៣ដល់ថ្ងៃទី១៦ ខែមីនា ឆ្នាំ២០១៦។
លោក ញ៉ែម ថ្ថាវី តំណាងរាស្ត្រមណ្ឌលខេត្តកំពង់ធំដែលអមដំណើរប្រធានរដ្ឋសភាក្នុងដំណើរទស្សនកិច្ចនេះ បានប្រាប់អ្នកសារព័ត៌មានកាលពីថ្ងៃព្រហស្បតិ៍ ពេលត្រឡប់មកដល់កម្ពុជាវិញថាដំណើរទស្សនកិច្ចនេះគឺធ្វើឡើងដើម្បីពង្រឹងទំនាក់ទំនងរវាងសភាទាំងពីរ។ លោកបន្តថាលោក ហេង សំរិន បានជួបជាមួយប្រធានរដ្ឋសភានិងព្រឹទ្ធសភានៅប្រទេសអូស្រ្តាលី។ លោកបន្ថែមថានេះជាលើកទីមួយដែលលោក ហេង សំរិន បានទៅបំពេញទស្សនកិច្ចបែបនេះនិងបានឃើញផ្ទាល់ពីការជជែកដេញដោលគ្នានៅក្នុងរដ្ឋសភានិងព្រឹទ្ធសភា។
លោក ញ៉ែម ថ្ថាវី មានប្រសាសន៍ថា៖ “សម្តេចចក្រី លោកធ្លាប់បានឃើញនៅក្នុងទូរទស្សន៍អីដែរ តែនេះជាលើកទីមួយដែលយើងបានឃើញផ្ទាល់តែម្តង។ ហើយរបៀបរបបគេទាំងនោះ មានទឹកមាត់ ដេញដោលគ្នាខ្លាំងណាស់ ប៉ុន្តែសម្តេចលោកបានមានប្រសាសន៍ដែរថាអេឃើញពួកគេនេះ ដូចជាជជែក ស្រែកដាក់គ្នាណាស់អញ្ចឹងនៅសភាខ្មែរយើង មើលទៅដូចជាមានសណ្តាប់ធ្នាប់ជាង។ ប៉ុន្តែនេះជាជាតិសាសន៍មួយៗ របៀបរបបខុសគ្នា។ ដូច្នេះនេះជាការរៀនសូត្រមួយដែរ”។
លោកបញ្ជាក់បន្ថែមថា៖ “ពេលដែលជជែកគ្នាខ្លាំងមែនទែន ខ្លាំងក៏ដោយ ប៉ុន្តែនៅពេលប្រធានសភា ឬប្រធានព្រឹទ្ធសភា ប្រាប់ថាឲ្យឈប់និយាយ ស្ងាត់ជ្រាប ឃើញកន្លែងហ្នឹង គេមិនហ៊ានតមាត់ទៅនឹងប្រធានសភាឬព្រឹទ្ធសភាទេ”។
រដ្ឋសភាកម្ពុជាឲ្យដឹងថាដំណើរទស្សនកិច្ចរបស់ថ្នាក់ដឹកនាំរដ្ឋសភានេះធ្វើឡើងតបតាមការអញ្ជើញរបស់ប្រធានរដ្ឋសភាអូស្រ្តាលី។
លោក ញ៉ែម ថ្ថាវី បានឲ្យដឹងទៀតថាប្រធានរដ្ឋសភាបានប្រាប់ទៅអូស្រ្តាលីពីការកែទម្រង់របស់រដ្ឋសភា ព្រឹទ្ធសភានិងរដ្ឋាភិបាលកម្ពុជា។
នាយកប្រតិបត្តិអង្គការខុមហ្វ្រែល លោក គល់ បញ្ញា មានប្រសាសន៍ថាការដេញដោលនិងការអនុវត្តតួនាទីរបស់សភាអូស្តា្រលីមានភាពរឹងមាំជាងកម្ពុជា។ លោកបន្តថាសភាកម្ពុជាមានការរឹតត្បិតការបញ្ចេញមតិ ការដកសមាជិកភាពរបស់តំណាងរាស្រ្ត ដោយពុំបានឆ្លងកាត់ការដកអភ័យឯកសិទ្ធិត្រឹមត្រូវ ការដាក់សម្ពោធ ការដាក់ពិន័យទៅលើអ្នកតំណាងរាស្ត្រដោយពុំមានមូលហេតុច្បាស់លាស់ជាដើម។
លោកមានប្រសាសន៍ថា៖ “វារីកចម្រើនមួយចំនួន ប៉ុន្តែមួយចំនួនទៀតក៏មានការថយដែរ វាបាត់សណ្តាប់ធ្នាប់ខ្លះដែរនៅក្នុងរដ្ឋសភា។ កន្លងមកយើងឃើញថាទៅឲ្យបាត់សមាជិកភាពរបស់អ្នកតំណាងរាស្ត្រមួយចំនួនដោយអត់មានឆ្លងកាត់ដកអភ័យឯកសិទ្ធិអីត្រឹមត្រូវនេះក៏ជាបញ្ហាដែលបាត់បង់របៀបរបបនៅក្នុងរដ្ឋសភា។ យើងឃើញមានការដាក់សម្ពាធ ការដាក់ពិន័យទៅលើអ្នកតំណាងរាស្ត្រ អត់មានមូលហេតុ យើងគ្រាន់តែដាក់ពិន័យដកប្រាក់ខែគេហ្នឹងសុទ្ធតែបាត់សណ្តាប់ធ្នាប់ហើយ ព្រោះអីនៅក្នុងបទបញ្ជាផ្ទៃក្នុងអីហ្នឹងគ្មានឲ្យអំណាចអីត្រូវដកប្រាក់ខែប្រាក់អីគេអញ្ចឹងដោយគ្រាន់តែគេបញ្ចេញមតិណា ហ្នឹងហើយជាការបាត់សណ្តាប់ធ្នាប់វិញទេ”៕ ដោយ ស៊ុន ណារិន និងហ៊ុន សិរីវឌ្ឍន៍