ទីក្រុងព្យុងយ៉ាងនៅតែបន្តការបាញ់សាកល្បងអាវុធរបស់ខ្លួនជាបន្តបន្ទាប់បើទោះជាអង្គការសហប្រជាជាតិចេញវិធានការហាមប្រាមក៏ដោយដែលសកម្មភាពនេះបង្កឲ្យមានភាពតានតឹងនៅក្នុងឧបទ្វីបកូរ៉េ។
រដ្ឋមន្ត្រីការពារជាតិកូរ៉េខាងត្បូងបានថ្លែងថាកូរ៉េខាងជើងបានបាញ់មីស៊ីលឆ្លងទ្វីបកម្រិតមធ្យមចំនួនពីរគ្រាប់ទៀតចូលទៅក្នុងសមុទ្រនៅព្រឹកថ្ងៃសុក្រនេះគឺបាញ់នៅប៉ុន្មានថ្ងៃបន្ទាប់ពីលោក គីម ជុងអ៊ុន បញ្ជាឲ្យសាកល្បងអាវុធនុយក្លេអ៊ែនិងមីស៊ីលឆ្លងទ្វីប។ នេះបើតាមប្រភពសារព័ត៌មាន Channel News Asia។
មន្ត្រីកូរ៉េខាងត្បូងថ្លែងថាមីស៊ីលនេះបាញ់ចេញពីខេត្តសុឈុននៅភាគនិរតីនៃប្រទេសនៅម៉ោង៥និង៥៥នាទីព្រឹក ហើយគ្រាប់អាចហោះក្នុងចម្ងាយ៨០០គីឡូម៉ែត្រទៅក្នុងសមុទ្រខាងកើតឬហៅសមុទ្រជប៉ុន។
ទោះយ៉ាងណាមន្ត្រីទាំងនេះមិនទាន់បញ្ជាក់ពីប្រភេទនៃមីស៊ីលនោះទេ ប៉ុន្តែទីភ្នាក់ងារសារព័ត៌មានរដ្ឋកូរ៉េខាងត្បូងយ៉ុងហាប់ចុះផ្សាយដោយដកស្រង់ប្រភពពីយោធាថានោះជាមីស៊ីលរ៉ូដុងអាចរត់បានចម្ងាយ១៣០០គីឡូម៉ែត្រ៕