មន្រ្តីសិទ្ធិមនុស្សខេត្តស្វាយរៀងលើកឡើងថាអាជ្ញាធរកម្ពុជាមិនមានការអនុវត្តច្បាប់ឲ្យបានតឹងរឹងដូចវៀតណាមទេចំពោះចំណាត់ការលើជនជាតិវៀតណាមដែលមកប្រកបរបរលក់ឆ្នោតនៅក្នុងប្រទេសកម្ពុជា។
កាលពីថ្ងៃទី១៨ ខែមីនា ឆ្នាំ២០១៦ ជនជាតិខ្មែរ៣១នាក់មានស្រុកកំណើតនៅស្រុកចន្ទ្រានិងនៅស្រុកកំពង់រោរិ៍ ខេត្តស្វាយរៀង ត្រូវបានចាប់បញ្ចួនពីប្រទេសវៀតណាមមកកម្ពុជាវិញ ដោយគេចោទថាបានចូលទៅប្រកបរបបលក់ឆ្នោតខុសច្បាប់នៅទីក្រុងហូជីមីញ។ នេះបើតាមសេចក្តីប្រកាសរបស់ក្រសួងការបរទេសកម្ពុជា។
មន្រ្តីសិទ្ធិមនុស្សរបស់អង្គការលីកាដូប្រចាំងខេត្តស្វាយរៀងលោក នុត បូពិណ្ណារ័ត្ន លើកឡើងថាការចាប់បញ្ជូនជនជាតិខ្មែរដែលទៅលក់ឆ្នោតនៅប្រទេសវៀតណាមមកកម្ពុជាវិញនោះគឺជាកាអនុវត្តច្បាប់យ៉ាងតឹងរឹងរបស់ប្រទេសគេ។ លោកបន្ថែមថាចំពោះប្រជាពលរដ្ឋវៀតណាមមកលក់ឆ្នោតនិងប្រកបមុខរបរផ្សេងៗជាច្រើនគ្មានច្បាប់ទំលាប់នៅក្នុងខេត្តស្វាយរៀងតែសមត្ថកិច្ចខ្មែរហាក់ដូចជាមិនមានការអនុវត្តច្បាប់ឲ្យបានតឹងតែងនៅឡើយ។
លោកបន្ថែមថា៖ “ចំពោះខ្មែរត្រូវបានវៀតណាមចាប់ហើយយកទៅឃុំទុកកន្លះខែឬមួយខែដើម្បីឲ្យយើងរាងចាលតែចំពោះចំណាត់ការរបស់កម្ពុជាយើងវិញចាប់ទៅបញ្ជូនទៅអស់ហាក់ដូចមិនមានការព្រមានទេកុំឲ្យចូលមកទៀតនោះទេគ្រាន់តែឆែកមើលលិខិតស្នាមតិចតូចបញ្ជូនទៅបាត់ដល់ពេលចូលមកវិញអ្នកដដែលៗមកលក់ដូរពេញៗស្វាយរៀង”។
អ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថានោះគ្រាន់តែជាការលើកឡើងរបស់សង្គមស៊ីវិល។ តែក្រសួងមហាផ្ទៃបានខិតខំក្នុងការចាប់បញ្ជូនជនជាតិវៀតណាមខុសច្បាប់ទៅវិញ។
លោកលើកឡើងថា៖ “ចង់គេថាម៉េចថាទៅបើចាប់ទៅរាល់ថ្ងៃប៉ុន្មានពាន់នាក់ហើយនៅមើលមិនឃើញ។ គាត់លើកឡើងថាចាប់ទៅហើយមកវិញដដែលៗមិនមានចំណាត់ការតឹងរឹងដូចវៀតណាម អ្នកណាថាអ្វីថាទៅ ថាទៅយកប្រាក់ខែគេស៊ីចេះតែថាទៅ គាត់ចាំតែថាយើងចាំតែធ្វើ”។
ទោះបីជាយ៉ាងណាមន្រ្តីសិទ្ធិមនុស្សប្រចាំខេត្តស្វាយរៀងលោក នុត បូពិណ្ណារ័ត្ន បន្ថែមថាប្រជាពលរដ្ឋវៀតណាមមកលក់ឆ្នោតនៅក្នុងប្រទេសកម្ពុជាអនាធិបតេយ្យបែបនោះគឺធ្វើឲ្យប៉ះពាល់ខ្លាំងដល់ជីវភាពពលរដ្ឋខ្មែរតាមរយៈការលេងល្បែងឆ្នោតនិងអាចបង្កអសន្តិសុខក្នុងសង្គមខ្មែរ ហើយការលក់ឆ្នោតនោះមិនបានផ្ដល់ចំណូលដល់ប្រទេសកម្ពុជាទេ។ ដូច្នេះលោកជំរុញឲ្យសមត្ថកិច្ចខ្មែរអនុវត្តច្បាប់ឲ្យបានត្រឹមត្រូវ។
លោកមេធាវី សុក សំអឿន លើកឡើងថានៅស្រុកខ្មែរមានច្បាប់ដាក់ទោសទណ្ឌទៅលើអ្នកលេងល្បែងស៊ីសង។ លោកថាបើមានពលរដ្ឋវៀតណាមមកលក់ឆ្នោតនៅស្រុកខ្មែរអាចចាត់ទុកជាល្បែងស៊ីសងខុសច្បាប់មួយដែលសមត្ថកិច្ចមានសិទ្ធិក្នុងការឃាត់ខ្លួន៕