សមត្ថកិច្ចបែលហ្សិកបង្ហាញមុខជនសង្ស័យបីនាក់ក្នុងហេតុការវាយប្រហារនៅរដ្ឋព្រុចសែលកាលពីថ្ងៃអង្គារម្សិលមិញដែលសម្លាប់មនុស្សអស់ប្រមាណ៣៥នាក់និងរាប់សិបនាក់ផ្សេងទៀតរងរបួស។
នៅព្រឹកថ្ងៃអង្គារម្សិលមិញមានការករណីវាយប្រហារដោយបំផ្ទុះគ្រាប់បែកអត្តឃាតពីរកន្លែងផ្សេងគ្នានៅក្នុងរដ្ឋព្រុចសែលនៃប្រទេសបែលហ្សិកគឺ គ្រាប់ទីមួយនៅព្រលានយន្តហោះ និងគ្រាប់ទី២បំផ្ទុះនៅស្ថានីយ៍រថភ្លើងក្រោមដី។
ក្រោយការបំផ្ទុះ សមត្ថកិច្ចរបស់បែលហ្សិកប្រកាសបើកការស៊ើបអង្កេតជាទ្រង់ទ្រាយធំ ហើយបានបង្ហាញមុខជនសង្ស័យ៣នាក់ដែលបន្លំខ្លួនធ្វើជាអ្នកដំណើរ។ នេះបើតាមប្រភពសារព័ត៌មាន Channel News Asia។
ក្នុងចំណោមជនសង្ស័យក្នុងហេតុការបំផ្ទុះគ្រាប់បែកអត្តឃាត៣នាក់នេះសមត្ថកិច្ចសង្ស័យថានៅសល់ម្នាក់ដែលរៀបចំផែនការបំផ្ទុះបរាជ័យ ហើយសមត្ថកិច្ចកំពុងស្វែងរកជនទី៣នេះ។
ហេតុការណ៍វាយប្រហារនេះពួកក្រុមរដ្ឋឥស្លាមអះអាងថាក្រុមខ្លួនជាអ្នកធ្វើ។ ក្រោយហេតុការណ៍វាយប្រហារនេះសមត្ថកិច្ចបានរឹតបន្តឹងការស៊ើបអង្កេតហើយបានរកឃើញទង់សម្គាល់របស់ក្រុមរដ្ឋឥស្លាមនិងសារធាតុគីមីសម្រាប់ធ្វើគ្រាប់បំផ្ទុះនៅក្នុងផ្ទះមួយនៅរដ្ឋព្រុចសែល៕