របាយការណ៍៖ មណ្ឌល​ថែទាំកុមារបានកើនឡើង៩២ភាគរយធ្វើឲ្យព្រួយបារម្ភ

របាយការណ៍មួយបានបង្ហាញថាចំនួនមណ្ឌល​ថែទាំកុមារបានកើនឡើង៩២ភាគរយ ខណៈរដ្ឋាភិបាលចាត់ទុកកំណើននេះថាជាការព្រួយបារម្ភយូរមកហើយពីបញ្ហាសុខភាពនិង​សុវត្ថិភាព​​កុមារដោយ​សារតែមិន​អាច​គ្រប់គ្រងបាន។

ការ​សិក្សាអង្កេត​មួយបាន​ធ្វើ​ឡើង​ដោយ​ក្រសួង​សង្គមកិច្ច អតីតយុទ្ធជន និង​យុវនីតិសម្បទា ក្នុង​ឆ្នាំ២០១៥ បាន​រកឃើញ​ថា មាន​កុមារ​ចំនួន​១១៧៨៨នាក់កំពុង​រស់នៅ​តាម​មណ្ឌល​ថែទាំចំនួន២៦៧កន្លែងគ្រាន់តែក្នុង​ខេត្ត​ចំនួន៥ ។ ប៉ុន្តែកាលពី​ឆ្នាំ២០១៤ នៅក្នុង​ខេត្ត៥ដដែល​នេះក្រសួង​ឲ្យដឹងថាមាន​មណ្ឌល​ថែទាំត្រឹមតែ១៣៩កន្លែង​ប៉ុណ្ណោះ ដែលមាន​កុមារ​កំពុងស្នាក់នៅ​ចំនួន៧៥៤៥នាក់។ តួលេខនេះបានបង្ហាញពី​ការ​កើនឡើង៩២ភាគរយ​នៃ​ចំនួន​មណ្ឌល​ដែល​ត្រូវបាន​ធ្វើអធិការកិច្ច​កន្លងមក​។​

ក្នុងសារអេឡិចត្រូនិចដែលVODទទួលបាននៅថ្ងៃទី២៤ខែមីនា អង្គការយូនីសេហ្វ​ប្រចាំ​ប្រទេសកម្ពុជាបានដកស្រង់​ប្រសាសន៍លោក វង សូត រដ្ឋមន្ត្រី​ក្រសួង​សង្គមកិច្ច អតីតយុទ្ធជន និង​យុវនីតិសម្បទាមកថា “របកគំហើញនេះបញ្ជាក់ពីការព្រួយបារម្ភជាយូរមកហើយរបស់យើងលើការកើនឡើងនូវចំនួនមណ្ឌលថែទាំកុមារដោយមិនអាចគ្រប់គ្រងបានក្នុងប្រទេសនេះដែលនាំឲ្យ​​មានហានិភ័យដល់សុខុមាលភាពនិងសុវត្ថិភាព​​កុមាររស់នៅតាមមណ្ឌលដែលពុំមានការពិនិត្យតាមដានត្រឹមត្រូវ។ យើងធ្វើការអង្កេតនេះជាផ្នែកមួយនៃកិច្ចខិតខំប្រឹងប្រែងរបស់យើងដើម្បីក្តាប់ឲ្យដឹងពីវិសាលភាពពិតប្រាកដនៃការកើនទ្បើងចំនួនមណ្ឌលថែទាំកុមារនិងដឹងពីមណ្ឌលដែលទទួលកុមារស្នាក់នៅសំដៅធានាឲ្យមានការចុះត្រួតពិនិត្យឲ្យបានគ្រប់ជ្រុងជ្រោយនិងការធ្វើអធិការកិច្ចប្រចាំឆ្នាំជាទៀងទាត់”។

ក្នុងសារអេឡិចត្រូនិចដដែលលោកស្រី ដេបូរ៉ា កូមីនី ប្រធាន​អង្គការយូនីសេហ្វ​ប្រចាំ​ប្រទេសកម្ពុជាបានមាន​ប្រសាសន៍ថា “ការស្នាក់នៅក្នុងមណ្ឌលអាចធ្វើឲ្យកុមារងាយប្រឈមនឹងគ្រោះថ្នាក់ផ្សេងៗដូចជាការរំលោភបំពានផ្លូវកាយ និងផ្លូវភេទ និងផលប៉ះពាល់ជាអវិជ្ជមានលើការអភិវឌ្ឍជារួមរបស់កុមារ។ មូលហេតុនេះហើយបានជាយើងបន្តលើកកម្ពស់ អំពីសារៈសំខាន់នៃការថែទាំកុមារតាមគ្រួសារនិងសហគមន៍។ យើងត្រូវចាត់ទុកមណ្ឌលថែទាំថាជាជម្រើសចុងក្រោយនិងជាដំណោះស្រាយបណ្តោះអាសន្នសម្រាប់កុមារដែលពុំមានឪពុកម្តាយឬគ្រួសារជាថែទាំ”។

ការ​ស្រាវជ្រាវ​បែបវិទ្យាសាស្ត្រ​កម្រិត​សកល​រាប់​ទសវត្សកន្លងមកបាន​បង្ហាញថាការ​រស់នៅ​តាម​មណ្ឌល​ថែទាំអាច​បង្ក​គ្រោះថ្នាក់​ដល់​កាយសម្បទា បញ្ញាស្មារតី និង​អារម្មណ៍​របស់​កុមារ និង​មាន​ផលប៉ះពាល់​រយៈពេលវែង​លើ​ជីវិត​របស់ពួកគេនៅពេលគេ​ធំពេញវ័យ។ ការស្រាវជ្រាវ​នេះក៏​បាន​បង្ហាញ​ផងដែរថា “កុមារនៅតាមមណ្ឌលថែទាំច្រើនពឹងផ្អែកលើបុគ្គលិករបស់មណ្ឌល ហើយ​​មិនអាចអភិវឌ្ឍបំណិនសង្គមដែលចាំបាច់ឲ្យបានពេញលេញដើម្បីឲ្យពួកគេអាចធ្វើសមាហរណកម្មចូលទៅក្នុងសង្គមវិញបាន”។​

របាយការណ៍ដដែលបង្ហាញទៀតថាមាន​កត្តា​ជា​ច្រើនដែល​អាច​មានឥទ្ធិពល​លើ​ការ​សម្រេចចិត្ត​របស់គ្រួសារក្នុង​ការ​បញ្ជូនកុមារ​ទៅ​ដាក់​ក្នុង​មណ្ឌល​ថែទាំដូចជាការ​បែកបាក់គ្នារវាងឪពុកម្តាយ ភាព​ក្រីក្រ ការ​ធ្វើចំណាកស្រុក​របស់ឪពុក​ម្តាយ។បន្ថែមពីលើ​មូលហេតុទាំងនេះគឺមានឪពុកម្តាយមួយចំនួន​យល់​ច្រលំថាការ​យកកូនទៅ​ផ្ញើ​តាម​មណ្ឌលគឺជា​ជម្រើស​ល្អ​សម្រាប់ឲ្យ​កូន​ទទួលបាន​ការ​អប់រំ និង​ការថែទាំ​កាន់តែ​ល្អ គួបផ្សំនឹងការខិតខំស្វះ​ស្វែងរក​កុមារ និង​ការ​ផ្សព្វផ្សាយជំរុញ​របស់​មណ្ឌល​មួយចំនួនផងដែរ។ របាយការណ៍បញ្ជាក់ថា ក្នុង​ប្រទេស​កម្ពុជា កុមារ​ចំនួន៣នាក់ក្នុង​ចំណោម​កុមារ៤នាក់(ឬ​ប្រមាណជា៧៧ភាគរយ)ដែល​រស់នៅ​តាម​មណ្ឌលថែទាំ យ៉ាងហោចណាស់ក៏នៅមានម្តាយឬឪពុកកំពុងរស់រានមានជីវិត និង​មាន​សាច់ញាតិ​របស់​ខ្លួន។​

រដ្ឋាភិបាលកម្ពុជាបានចេញអនុក្រឹត្យកាលពីពេល​ថ្មីៗនេះ​ស្តីពីការ​គ្រប់គ្រង​មណ្ឌល​ថែទាំកុមារ។ យោងតាម​អនុក្រឹត្យ​នេះ ក្រសួង​សង្គម​កិច្ច “នឹងចាត់វិធានការដើម្បីគ្រប់គ្រងមណ្ឌលថែទាំកុមារនិងលើកកម្ពស់ការថែទាំនៅតាមគ្រួសារនិងសហគមន៍ ក្នុងគោលបំណងធ្វើសមាហរណកម្មកុមារឲ្យបាន៣០ភាគរយក្នុងចំណោមកុមារដែលគេដឹងថាកំពុងរស់នៅតាមមណ្ឌលឲ្យវិលត្រទ្បប់ទៅកាន់គ្រួសារនិងសហគមន៍របស់ពួកនៅចុងឆ្នាំ២០១៨”៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered