ចំនួនអ្នកស្លាប់ដោយសារគ្រោះថ្នាក់ចរាចរណ៍ក្នុងត្រីមាសទី១ឆ្នាំ២០១៦នេះមានចំនួនជាង៤០០នាក់ គឺប្រហាក់ប្រហែលនឹងរយៈពេលដូចគ្នាកាលពីឆ្នាំមុនដែរបើទោះបីរដ្ឋាភិបាលបានបង្កើតច្បាប់ថ្មីរឹតបន្តឹងការបើកបរក៏ដោយ។
នៅដើមឆ្នាំ២០១៦នេះរដ្ឋាភិបាលបានប្រកាសឲ្យសមត្ថកិច្ចរឹតបន្តឹងច្បាប់ចរាចរាចរណ៍ផ្លូវគោកថ្មីដោយតម្រូវឲ្យអ្នកបើកបរយានយន្តត្រូវពាក់ពួកសុវត្ថិភាព ពាក់ខ្សែក្រវ៉ាត់ពេលបើកបរ។
អ្នកបើកករត្រូវមានប័ណ្ណបញ្ជាក់ពីជំនាញបើកបរ មានប័ណ្ណសម្គាល់យានយន្ត ចាត់វិធានការទៅលើយានយន្តគ្រប់ប្រភេទ ដែលដឹកលើសចំណុះ អ្នកបើកបរក្នុងល្បឿនលឿនហួសពីច្បាប់កំនត់ និងអ្នកបើកបរក្រោមឥទ្ធិពលនៃគ្រឿងស្រវឹងជាដើម។
ការបង្កើតច្បាប់ត្រួតពិនិត្យលើអ្នកប្រើប្រាស់ផ្លូវនេះរដ្ឋាភិបាលអះអាងថាដើម្បីកាត់បន្ថយអ្នកស្លាប់តាមដងផ្លូវដោយគ្រោះថ្នាក់ចរាចរណ៍មិនមែនបង្កើតច្បាប់នេះដើម្បីជំរិតទារប្រាក់ពលរដ្ឋដូចមជ្ឈដ្ឋានមួយចំនួនរិះគន់ទេ។
ក្នុងសិក្ខាសាលាមួយដែលធ្វើឡើងនៅក្រសួងសាធារណការនិងដឹកជញ្ជូននាថ្ងៃទី២៤ខែមីនានេះ អគ្គស្នងការរងនគរបាលជាតិលោក ហ៊ឹម យ៉ាន លើកឡើងថាការអនុវត្តច្បាប់ចរាចរណ៍ផ្លូវគោកថ្មីក្នុងត្រីមាសទី១ឆ្នាំ២០១៦នេះ លោកថា ទទួលបានជោគជ័យគួឲ្យកត់សម្គាល់ដូចជាសមត្ថកិច្ចបានរកឃើញយានយន្តល្មើសបានជិត៧សែនគ្រឿង(៦៩៧២៤៦) ផាកពិន័យបានចំនួនជាង៣១ម៉ឺនគ្រឿង(៣១៨៩៩៨)គិតជាប្រាក់បានជាង៤ពាន់លានរៀល ឃាត់យានយន្តអត់ស្លាកលេខបាន៨០០គ្រឿង ផ្សព្វផ្សាយនិងអប់រំអ្នកប្រើប្រាស់ផ្លូវដែលប្រព្រឹត្តិល្មើសបានជាង៣សែននាក់។
លោក ហ៊ឹម យ៉ាន ឲ្យដឹងទៀតថាចំណែកគ្រោះថ្នាក់ចរាចរណ៍វិញចាប់ពីថ្ងៃទី១ខែមករាដល់ថ្ងៃទី២១ខែមីនាឆ្នាំ២០១៦នេះ មានមនុស្សស្លាប់៤៥១នាក់ដែលចំនួននេះបានថយចុះតែម្នាក់បើប្រៀបប្រៀបធៀបរយៈពេលដូចគ្នាកាលពីឆ្នាំមុន។
លោកថា៖ “យើងត្រូវកត់សម្គាល់ថាបើយានយន្តច្រើនមានបញ្ហាច្រើន ប៉ុន្តែបើយើងទប់ឲ្យបានស្មើប៉ុណ្ណឹង កុំឲ្យងាប់ កុំឲ្យវាកើនគឺអាចចាត់ទុកថាបានជោគជ័យខ្លះដែរ”។
រដ្ឋលេខាធិការក្រសួងសាធារណការនិងដឹកជញ្ជូនលោកស្រី មឺន មាណវី អះអាងដែរថាការមិនទាន់ដែលរដ្ឋាភិបាលមិនអាចកាត់បន្ថយគ្រោះថ្នាក់ចរាចរណ៍នេះបានលោកស្រីថាអាចមកពីអ្នកប្រើប្រាស់ផ្លូវខ្លះមិនទាន់យល់និងខ្លះទៀតមិនទាន់សហការល្អជាមួយសមត្ថកិច្ច។
លោកស្រីថា៖ “យើងនូវសង្ឃឹមត្រីមាសទី២ទី៣ទី៤ទៀត អញ្ចឹងសូមមានការចូលរួមទាំងអស់គ្នានៅក្នុងអង្គសិក្ខាសាលាយើងនឹងជួយដល់ប្រជាពលរដ្ឋយើងផងពិសេសវិទ្យុVODហ្នឹងសុំជួយផងផ្នែកសុវត្ថិភាពចរាចរណ៍ហ្នឹងចាស មិនមែនកន្លងទៅមិនបានជួយទេ ប៉ុន្តែសុំបន្តជួយទៀត”។
មន្រ្តីជំនាញលើកឡើងថាគ្រោះថ្នាក់ចរាចរណ៍បណ្តាលមកពីកត្តាធំៗពីរ គឺទី១ការបើកលើសល្បឿនកំណត់៤០ភាគរយ និងទី២ការបើកបរក្រោមឥទ្ធិពលនៃគ្រឿងស្រវឹង១២ភាគរយ។
នាយកប្រតិបត្តិមជ្ឈមណ្ឌលប្រជាពលរដ្ឋដើម្បីសន្ដិភាពនិងអភិវឌ្ឍលោក យង់ គីមអេង លើកឡើងថាការមិនអាចទប់ស្កាត់គ្រោះថ្នាក់ចរាចរណ៍បាននេះ លោកថាអាចមកពីសមត្ថកិច្ចជំនាញដែលចុះអនុវត្តច្បាប់មិនហានចាត់វិធានការទៅលើម្ចាស់រថយន្តលើ្មសដែលមានខ្នងបង្អែកធំៗនិងខ្វះការចុះផ្សព្វផ្សាយដល់ពលរដ្ឋ។
លោក យង់ គិមអេង អះអាងទៀតថាលោកមិនជឿថាគ្រោះថ្នាក់ចរាចរណ៍ដោយសារគ្រឿងស្រវឹងមានត្រឹម១២ភាគរយទេ ។
លោកថា៖ “ខ្ញុំគិតថាការធ្វើហ្នឹងជាចេតនារបស់រដ្ឋាភិបាលដើម្បីជួយទៅដល់ពួកក្រុមហ៊ុនឧស្សាហកម្មគ្រឿងស្រវឹងផងមិនដឹង។ កុំឲ្យគេមើលឃើញថាស្រវឹងហ្នឹងច្រើនអញ្ចឹងទៅសំនឹងរដ្ឋាភិបាលមិនទាន់ចេញច្បាប់គ្រប់គ្រងគ្រឿងស្រវឹងហ្នឹងផងទៅ កុំឲ្យគេដាក់បន្ទុកទៅលើរដ្ឋាភិបាលហ្នឹងធ្ងន់ពេលទៅលើគ្រឿងស្រវឹងហ្នឹងហើយម៉្យាងវិញទៀតអាចធ្វើឲ្យឧស្សាហកម្មគ្រឿងស្រវឹងហ្នឹងអាចបន្តធ្វើសកម្មភាពលក់ដូរដោយសេរីនៅប្រទេសកម្ពុជាបានតទៅទៀតបាន បាទ”។
បើតាមលោក ហ៊ឹម យ៉ាន រដ្ឋាភិបាលនឹងពន្លឿនការអនុម័តច្បាប់គ្រប់គ្រងគ្រឿងស្រវឹងនេះដោយលោកយល់ថាមានច្បាប់គ្រប់គ្រងគ្រឿងស្រវឹងលោកថាជាការចូលរួមមួយផ្នែកទៀតក្នុងការទប់ស្កាត់គ្រោះថ្នាក់ចរាចរណ៍ក្រៅពីសមត្ថកិច្ចចុះត្រួតពិនិត្យនឹងអ្នកប្រើប្រាស់គ្រឿងសវឹងតាមគោលដៅ។
បើតាមរបាយការណ៍ស្ថាប័នពាក់ព័ន្ធនឹងបន្តរឹតបន្តឹងការអនុវត្តច្បាប់ឲ្យមានតម្លាភាព ទប់ស្កាត់ការបើកបរលើសល្បឿនកំណត់ ត្រួតពិនិត្យលក្ខណៈបច្ចេកទេស ត្រួតពិនិត្យសាលាបង្រៀនបើកបរ ជំរុញការផ្សព្វផ្សាយដល់ថ្នាក់មូលដ្ឋាន សិក្សានិងបំពាក់ឧបករណ៍បច្ចេកទេសត្រួតពិនិត្យល្បឿននិងគ្រឿងស្រវឹង៕
