សភាមីយ៉ាន់យ៉ាបានអនុម័តបញ្ជីឈ្មោះសមាសភាពរដ្ឋាភិបាលដែលរៀបចំឡើងដោយប្រធានាធិបតី Htin Kyaw ដែលការអនុម័តតែងតាំងនេះធ្វើឡើងដោយប្រុងប្រយ័ត្នក្នុងការត្រួតពិនិត្យលើប្រវត្តិអប់រំនិងការសិក្សា។
ការប្រជុំអនុម័តកាលពីថ្ងៃព្រហស្បតិ៍ម្សិលមិញសភាមីយ៉ាន់ម៉ាបានអនុម័តលើបញ្ជីឈ្មោះរដ្ឋមន្ត្រីចំនួន១៨រូប ក្នុងនោះមានទាំងឈ្មោះលោកស្រី អ៊ុង សានស៊ូជី ផងដែរ។ ទោះយ៉ាងណាមិនទាន់មានព័ត៌មានបញ្ជាក់ផ្លូវការថាលោកស្រី អ៊ុង សានស៊ូជី ដឹកនាំក្រសួងណាមួយទេ តែមន្ត្រីគណបក្សសម្ព័ន្ធជាតិដើម្បីលទ្ធិប្រជាធិបតេយ្យបង្ហើបថាលោកស្រីនឹងដឹកនាំក្រសួងការបរទេសហើយអាចកាន់កិច្ចការមួយចំនួនទៀត។ នេះបើតាម សារព័ត៌មានមីយ៉ាន់ម៉ា។
ក្នុងដំណើរនៃការតែងតាំងនេះគឺមានការពិនិត្យតឹងរឹងចំពោះរដ្ឋមន្ត្រីថ្មីទៅលើប្រវត្តិនៃការសិក្សានិងប្រវត្តិការងារ។ សារព័ត៌មានមីយ៉ាន់ម៉ាបញ្ជាក់ថាលោកស្រី អ៊ុង សានស៊ូជី នឹងមានឥទ្ធិពលខ្លាំងលើការសម្រេចលើគោលនយោបាយនានា បើទោះជាលោកស្រីមិនបានកាន់តំណែងជាប្រធានាធិបតីក៏ដោយ។
តាមគម្រោងរដ្ឋាភិបាលស៊ីវិលថ្មីរបស់មីយ៉ាន់ម៉ានឹងចូលកាន់តំណែងដឹកនាំប្រទេសនៅថ្ងៃទី១ខែមេសាខាងមុខនេះ៕