រដ្ឋសភាក្រើន​រំឭក​ឲ្យ​លោក កឹម សុខា បំភ្លឺការចោទប្រកាន់រឿងអាស្រូវស្នេហាតាមញត្តិរបស់យុវជន

អគ្គលេខាធិការដ្ឋាននៃរដ្ឋសភាបានដាក់លិខិតមួយទៀតទៅលោក កឹម សុខា ប្រធានស្តីទីនៃគណបក្សសង្រ្គោះជាតិ ដោយរំឭកឲ្យលោកបំភ្លឺ​ទាក់ទងនឹងញត្តិរបស់យុវជនដែលទាមទារឲ្យបក​ស្រាយ​រឿងការចោទប្រកាន់អាស្រូវស្នេហា។

អ្នកនាំពាក្យនៃរដ្ឋសភា លោក ឡេង ប៉េងឡុង ប្រាប់វីអូឌីថានៅព្រឹកថ្ងៃចន្ទនេះ លោកបានដាក់លិខិតមួយច្បាប់ទៀតទៅលោក កឹម សុខា ដោយលោកថាគ្រាន់តែរំឭកឲ្យឆ្លើយតបនឹងញត្តិរបស់យុវជន។ លោកបន្តថាការដាក់លិខិតជាថ្មីនេះ ដោយសារយុវជនទាំងនោះ​បានចេញមុខតវ៉ានិងដាក់ញត្តិជាថ្មីមករដ្ឋសភា។

លោក ឡេង ប៉េងឡុង បានច្រានចោលមតិមួយចំនួនថារដ្ឋសភាបានយកចិត្តទុកដាក់រឿងនេះជាជាងញត្តិរបស់​ប្រជាពលរដ្ឋ។ លោកមានប្រសាសន៍ថា៖ “ញត្តិរបស់ប្រជាពលរដ្ឋធ្វើដូចតែគ្នាទេ ឲ្យតែមកដល់ខ្ញុំ ខ្ញុំធ្វើភ្លាម មិនអាចឲ្យយឺតទេ”

កាលពីថ្ងៃទី២១ខែមីនា អនុប្រធានទី២នៃរដ្ឋសភា លោក ងួន ញ៉ិល បានចេញលិខិត​មួយ​ស្នើឲ្យលោក កឹម សុខា បំភ្លឺរឿងញត្តិរបស់យុវជនមួយក្រុម ទាក់ទងនឹងរឿងអាស្រូវស្នេហាតាមខ្សែអាត់សំឡេងដែលត្រូវបានទម្លាយតាមប្រព័ន្ធសង្គមហ្វេសប៊ុក។ រដ្ឋសភាបញ្ជាក់ថា៖ “…ដើម្បីការពារកិត្យានុភាពរបស់រដ្ឋសភា ការពារកិត្តិយសនិងសេចក្តីថ្លៃថ្នូររបស់តំណាងរាស្រ្ត ឯកឧត្តមបណ្ឌិត ងួន ញ៉ិល ប្រធានរដ្ឋសភាស្តីទី បានប្រគល់ភារកិច្ចឲ្យអគ្គលេខាធិការដ្ឋានរដ្ឋសភាបញ្ជូនញត្តិនេះជូនឯកឧត្តម”

ចំណែក​នៅថ្ងៃចន្ទនេះ គណៈកម្មការសិទ្ធិមនុស្ស ទទួលពាក្យបណ្តឹង អង្កេតនិងទំនាក់ទំនងរដ្ឋសភា ព្រឹទ្ធសភា បានជូនដំណឹងទៅប្រធានរដ្ឋសភា លោក ហេង សំរិនថាគណៈកម្មការមិនអាចកោះហៅលោក កឹម សុខា តាមញត្តិ​របស់​យុវជន​ដែលដាក់ទៅគណៈកម្មការ​កាលពីកន្លងទៅ ដោយថានេះផ្ទុយពីរដ្ឋធម្មនុញ្ញ។ នៅក្នុងលិខិតមួយចុះថ្ងៃទី២៨ខែមីនា ប្រធានគណៈកម្មការ លោក អេង ឆៃអ៊ាង ដែលមកពីគណបក្សសង្រ្គោះជាតិបានលើកឡើងប្រាប់ទៅលោក ហេង សំរិនថានៅក្នុងរដ្ឋធម្មនុញ្ញកម្ពុជានិងបទបញ្ជាផ្ទៃក្នុងនៃរដ្ឋសភា ពុំមានមាត្រានិងប្រការណាមួយអនុញ្ញាតឲ្យរដ្ឋសភាកោះអញ្ជើញតំណាងរាស្រ្តមកបំភ្លឺពីបញ្ហា​អ្វីឡើយ។

លោក ឡេង ប៉េងឡុង យល់ស្រប​នឹង​ការ​លើក​ឡើង​របស់លោក អេង ឆៃអ៊ាង។ លោកបញ្ជាក់ថាការកោះហៅតំណាងរាស្រ្តណាម្នាក់ ទាល់តែមានញត្តិរបស់តំណាងរាស្រ្តមួយចំនួន។

គួរបញ្ជាក់​ថា​កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន បានអះអាងថាលោកមានរូបភាពអ្នកនយោបាយល្បីឈ្មោះម្នាក់នាំស្រីទៅចូលសណ្ឋាគារមួយនៅទីក្រុងបាងកកប្រទេសថៃ។ ថ្វីត្បិតតែលោក ហ៊ុន សែន មិនបានបញ្ចេញឈ្មោះអ្នកនយោបាយនោះក៏ដោយ តែមជ្ឈដ្ឋានជាច្រើនគិតថាលោកនាយករដ្ឋមន្រ្តីសំដៅដល់លោក កឹម សុខា ដែលកំពុងរងការចោទថាមានរឿងអាស្រូវស្នេហា៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ