មន្ត្រីប៉ាគីស្ថានឲ្យដឹងថា យ៉ាងហោចណាស់មនុស្ស៦៩នាក់បានស្លាប់ និងរាប់រយនាក់ផ្សេងទៀតបានរងរបួសនៅក្នុងការបំផ្ទុះគ្រាប់បែកនៅសួនសាធារណៈមួយកាលពីថ្ងៃអាទិត្យ នៅក្នុងទីក្រុង Lahore ភាគកើតប្រទេសប៉ាគីស្ថាន ដោយភាគច្រើននៃអ្នកស្លាប់ជាស្ត្រី និងកុមារ។
បណ្ដាញផ្សាយព័ត៌មាន BBC បានរាយការណ៍ថា នៅពេលដែលគ្រាប់បែកត្រូវបានផ្ទុះឡើង មានមនុស្សជាច្រើនកំពុងស្ថិតនៅក្នុងសួន Gulshan-i-Iqbal ដ៏ពេញនិយម ដោយអ្នកខ្លះកំពុងប្រារព្ធពិធីបុណ្យ Easter ដែលជាបុណ្យធំមួយនៅក្នុងសាសនាគ្រិស្ត។
មន្ត្រីរដ្ឋបាលជាន់ខ្ពស់នៃទីក្រុង Lahore លោក Muhammad Usman បានប្រាប់ភ្នាក់ងារសារព័ត៌មាន AFP ថា ករណីនេះគឺជាការវាយប្រហារគ្រាប់បែកអត្តឃាត ដោយលោកថា អ្នកបំផ្ទុះគ្រាប់បែកនោះបានចូលទៅក្នុងសួននោះ រួចបំផ្ទុះខ្លួនឯងនៅជិតកន្លែងក្មេងលេង ក្បែរច្រករថយន្តចេញចូល។
មន្ទីរពេទ្យធំៗទាំងអស់នៅក្នុងតំបន់បានស្ថិតនៅក្នុងស្ថានភាពសង្គ្រោះបន្ទាន់ បន្ទាប់ពីការផ្ទុះនេះ។ ប្រធានាធិបតីប៉ាគីស្ថានបានថ្កោលទោសចំពោះការផ្ទុះនេះ ហើយរដ្ឋាភិបាលក្នុងតំបន់បានប្រកាសកាន់ទុក្ខរយៈពេល៣ថ្ងៃ។
ក្រុងLahoreគឺជាទីក្រុងធំរបស់ខេត្ត Punjab ដែលជាខេត្តធំបំផុត និងមានជាងគេរបស់ប៉ាគីស្ថាន ហើយជាមូលដ្ឋានអំណាចនយោបាយរបស់នាយករដ្ឋមន្រ្តី Nawaz Sharif ផងដែរ។
ពួកបំបែកខ្លួនតាលីបង់ Jamaat-ul-Ahrar បានប្រាប់ប្រព័ន្ធផ្សព្វផ្សាយក្នុងស្រុក និងប្រព័ន្ធផ្សព្វផ្សាយលោកខាងលិចថា ពួកគេគឺជាអ្នកនៅពីក្រោយការវាយប្រហារនេះ។ អ្នកនាំពាក្យឲ្យក្រុមនេះ លោក Ehsanullah Ehsan បានប្រាប់ព័ត៌មាន Express Tribune របស់ប៉ាគីស្ថានថា៖ “យើងប្រកាសពីការទទួលខុសត្រូវចំពោះការវាយប្រហារទៅលើពួកអ្នកកាន់សាសនាគ្រិស្តទាំងនោះ ខណៈពេលពួកគេប្រារព្វពិធីបុណ្យ Easter”។
ប្រទេសប៉ាគីស្ថានបានទទួលរងនូវឧប្បត្តិហេតុហិង្សាជាប្រចាំជាប់ពាក់ព័ន្ធនឹងពួកតាលីបង់ដូចជាជម្លោះនិកាយ និងសកម្មភាពទំនើងព្រហ្មទណ្ឌ។
ទន្ទឹមនឹងនេះដែរ នៅក្នុងរដ្ឋធានីអ៊ីស្លាមម៉ាបាត នគរបាលបានបាញ់ឧស្ម័នបង្ហូរទឹកភ្នែកដាក់អ្នកតវ៉ារាប់ពាន់នាក់ដែលបានដើរជាក្បួនបង្ហាញការគាំទ្រដល់ខ្មាន់កាំភ្លើងអ៊ិស្លាមនិយមលោក Mumtaz Qadri ដែលពួកគេមើលឃើញថាជាវីរបុរសសាសនា។ លោក Mujmtaz Qadri ត្រូវបានគេព្យួរកកាលពីខែមុន ពីបទសម្លាប់លោក Salman Taseer អភិបាលនៃរដ្ឋ Punjab កាលពីប្រាំឆ្នាំមុន។ លោក Taseer ដែលត្រូវបានសម្លាប់នោះបានការពារស្ដ្រីកាន់សាសនាគ្រិស្តម្នាក់ដែលបានជាប់គុកពីបទចោទប្រកាន់ប្រមាថព្រះជាម្ចាស់៕
