លោកនាយករដ្ឋមន្រ្តី ហ៊ុន សែន បានស្នើតែងតាំងរដ្ឋលេខាធិការចំនួន៤រូបបន្ថែមទៅក្នុងក្រសួងចំនួន ដោយអះអាងថាការតែងតាំងនេះជាសេចក្តីត្រូវការចាំបាច់របស់រដ្ឋាភិបាល។
ក្នុងលិខិតចុះថ្ងៃ២៥ខែមីនាផ្ញើទៅប្រធានរដ្ឋសភា លោកនាយករដ្ឋមន្ត្រីហ៊ុន សែន បានសរសេរថាលោកស្នើតែងតាំងបំពេញសមាសភាពនៃរដ្ឋាភិបាលបន្ថែម ដែលក្នុងនោះមានលោក អ៊ី ឈាន អតីតអភិបាលខេត្តប៉ៃលិននិងមន្រ្តីក្រសួងមហាផ្ទៃ ត្រូវបានតែងតាំងជារដ្ឋលេខាធិការក្រសួងការពារជាតិ និងលោក លុយ ដាវីត ត្រូវបានតែងតាំងជារដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិ។
លោកនាយករដ្ឋមន្ត្រីក៏បានស្នើតែងតាំង លោក ណៅ ធួក និង លោក លី ផល្លា ដែលលោកអ្នកទាំងពីរជាអនុរដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ជារដ្ឋលេខាធិការនៃក្រសួងនេះ។
ក្នុងលិខិតនោះ លោកនាយករដ្ឋមន្រ្តីបញ្ជាក់ថាការតែងតាំងអ្នកទាំង៤នេះគឺដោយយោងទៅលើសមត្ថភាពនិងបទពិសោធន៍ការងារ ព្រមទាំងយោងតាមសេចក្តីត្រូវការចាំបាច់របស់រដ្ឋាភិបាល។
គួរបញ្ជាក់ផងដែរថាកាលពីថ្ងៃទី១៦ មីនា លោកនាយករដ្ឋមន្ត្រីក៏បានផ្ញើលិខិតទៅកាន់ប្រធានរដ្ឋសភាអំពីសំណើសុំឲ្យមានការរៀបចំបោះឆ្នោតផ្តល់សេចក្តីទុកចិត្តពីរដ្ឋសភាលើការកែសម្រួលសមាសភាពរដ្ឋាភិបាល។ ក្នុងសំណើនោះលោកនាយករដ្ឋមន្ត្រីបានសម្រេចបញ្ចប់មុខងាររដ្ឋមន្រ្តីចំនួន៣រូបនិងផ្លាស់ប្តូររដ្ឋមន្រ្តីចំនួន៥រូបឲ្យទៅដឹកនាំក្រសួងផ្សេងវិញ។ ក្នុងនោះផងដែរក្រៅពីការស្នើសុំបញ្ចប់និងផ្លាស់ប្ដូរតួនាទីរដ្ឋមន្ត្រី លោកក៏បានស្នើតែងតាំងមន្ត្រី១១រូបផ្សេងទៀតសម្រាប់តំណែងរដ្ឋលេខាធិការផងដែរ។ ទោះបីជាមានការរុះរើនិងផ្លាស់ប្តូរបែបនេះក៏ដោយ អ្នកវិភាគឲ្យជាយោបល់ថារដ្ឋាភិបាលគួរតែកាត់បន្ថយសមាជិកគណៈរដ្ឋមន្ត្រីរបស់ខ្លួនឲ្យនៅតិចជាងនេះ ដោយលោកថានៅប្រទេសដែលមានសេដ្ឋកិច្ចលូតលាស់ជាងកម្ពុជាដូចជាប្រទេសថៃនិងសិង្ហបុរី គឺមានចំនួនសមាជិកគណៈរដ្ឋមន្ត្រីតិចជាងកម្ពុជា៕
