លោក ឈាង វុន ថា​លោក កឹម សុខា​ ត្រូវ​លាលែង​ពីតំណាងរាស្រ្ត​ ប្រសិន​​អាស្រូវស្នេហាជារឿងពិត

លោក ឈាង វុន តំណាងរាស្រ្ត​របស់​គណបក្ស​ប្រជាជនកម្ពុជា​និង​ជា​អ្នកនាំពាក្យ​ឲ្យ​តំណាងរាស្រ្ត​របស់គណប​ក្ស​កាន់អំណាច

អ្នកនាំពាក្យឲ្យ​​តំណាងរាស្រ្ត​គណបក្ស​ប្រជាជនកម្ពុជានៅ​រដ្ឋសភា​​បាន​ថ្លែង​កាលពីថ្ងៃ​អង្គារ​ថា​លោក កឹម សុខា តំណាងរាស្រ្ត​មក​ពីមណ្ឌល​ខេត្ត​កំពង់ចាម​និង​ជា​អនុប្រធា​ន​គណបក្ស​សង្គ្រោះជាតិ ត្រូវតែ​លាលែង​ពី​តំណែង​ ប្រសិន​បើករណី​អាស្រូវ​ស្នេហា​ជា​រឿងពិត ដោយ​គំរាម​ថា​នឹង​បង្កើត​គណៈ​កម្មការ​ស៊ើ​បអង្កេតមួយ​លើ​ករណីនេះ។​​

លោក ឈាង វុន តំណាងរាស្រ្ត​របស់​គណបក្ស​ប្រជាជនកម្ពុជា​និង​ជា​អ្នកនាំពាក្យ​ឲ្យ​តំណាងរាស្រ្ត​របស់គណប​ក្ស​កាន់អំណាចទាំង​៦៨រូប​ បានថ្លែង​ប្រាប់អ្នក​សារព័ត៌មាន​ក្រោយ​ពេល​ទទួល​ញត្តិ​របស់​ក្រុមយុវជន​​ប្រឆាំង​នឹង​លោក កឹម សុខា ថា​ប្រសិន​បើអាស្រូវស្នេហា​ជា​រឿងពិត ​លោក​ កឹម សុខា រំលោភ”តម្លៃស្រ្តីខ្មែរ​និង​សិទ្ធិ​នារី” ដោយ​​លោក​ចាត់ទុក​ថា​ជា”គ្រោះ​ថ្នាក់មែនទែន”។ លោក​បន្ថែម​ថា​​ករណីនេះជា​ការរំលោភ​ច្បាប់ឯក​ពន្ធភាព(ប្តីមួយ​ប្រពន្ធ​មួយ)ទៀត​ផង​។​

លោក ឈាង វុន ដែល​ជា​ប្រធានគណៈកម្មការ​កិច្ច​ការ​បរទេស សហប្រតិ​បត្តិកា​រអន្តរជាតិ ឃោសនាការនិងព័ត៌មាននៃរដ្ឋសភា គំរាម​ថា​គណៈ​កម្មការអចិន្រ្តៃយ៍​នៃ​រដ្ឋសភា​មានសិទ្ធិ​បង្កើ​តគណៈកម្មការស៊ើបអង្កេ​ត​រឿ​ង​នេះ​​នៅ​ក្នុង​រដ្ឋសភា។​ លោក​ផ្តល់​យោបល់ថា​លោក កឹម សុខា ត្រូវតែ​លាលែង​ពីតំណាងរាស្រ្ត ប្រសិន​បើ​អាស្រូវ​ស្នេហា​ជារឿងពិត។​

លោក​មាន​ប្រសាសន៍ថា៖ “ជា​ការពិត​យើង​មិន​អាច​លើ​ក​អភ័យ​ឯក​សិទ្ធិ​គាត់​បានទេ ព្រោះ ទាល់​តែ​ពីរភាគ​បី​ ក៏ប៉ុន្តែ​បង្ហាញពី​សីលធម៌​ អ្នក​តំណាង​រាស្រ្ត​ បើ​សិន​រឿង​នេះ​ពិ​ត​ប្រាកដ​ គាត់​ត្រូវ​លាលែង​ចេញពីតំណាងរាស្រ្ត”។​

វីអូឌី (VOD) មិន​ទាន់​អាច​សុំការ​ឆ្លើយ​តប​ពី​អ្នកនាំពាក្យ​គណបក្ស​សង្គ្រោះជាតិ​លោក យឹម សុវណ្ណ បាន​នៅ​ឡើយ​ទេ​។

លោកស្រី ធីតា ឃឹះ នាយិកាអង្គការសីលការ មានប្រសាសន៍ថាប្រសិនបើដូចអ្វីដែលលោក ឈាង វុន ថាករណីលោក កឹម សុខា ជាការរំលោភ”តម្លៃស្រ្តីខ្មែរនិងសិទ្ធិនារី”នោះ លោកស្រីថាមានបុរស៦០ភាគរយនឹងត្រូវជាប់ចោទពីបទរំលោភសិទ្ធិស្រ្តី។ប៉ុន្តែលោកស្រីយល់ថាករណីលោក កឹម សុខា នេះគឺគេកំពុងតែយកស្រ្តីធ្វើជាឈ្នាន់នយោបាយដើម្បីផ្តួលគូរប្រកួត។ លោកស្រី​បញ្ជាក់​ថា៖ “ការដែលប្រើប្រាស់ស្រ្តីជាមូលហេតុដើម្បីគោលបំណងនយោបាយអីមួយគឺវាធ្វើឲ្យមានការច្របូកច្របល់ ហើយច្បាស់លាស់ថា វារំលោភទៅសិទ្ធិស្រ្តី។ ប៉ុន្តែអ្វីដែលលោក ឈាង វុន និយាយ មិនមែនតែទៅលើតែលោក កឹម សុខា មួយទេ ប្រហែលជាត្រូវថាទាំងអស់លើអ្នកដែលរំលោភរឿងស្រ្តី”

កាលពីថ្ងៃចន្ទ អគ្គលេខាធិការដ្ឋាននៃរដ្ឋសភាបានដាក់លិខិតមួយទៀតទៅលោក កឹម សុខា ដោយរំឭកឲ្យលោកបំភ្លឺ​ទាក់ទងនឹងញត្តិរបស់យុវជនដែលទាមទារឲ្យបក​ស្រាយ​រឿងការចោទប្រកាន់អាស្រូវស្នេហា។ កាលពីថ្ងៃទី២១ខែមីនា អនុប្រធានទី២នៃរដ្ឋសភា លោក ងួន ញ៉ិល បានចេញលិខិត​មួយ​ស្នើឲ្យលោក កឹម សុខា បំភ្លឺរឿងញត្តិរបស់យុវជនមួយក្រុម ទាក់ទងនឹងរឿងអាស្រូវស្នេហាតាមខ្សែអាត់សំឡេងដែលត្រូវបានទម្លាយតាមប្រព័ន្ធសង្គមហ្វេសប៊ុក។ រដ្ឋសភាបញ្ជាក់ថា៖ “…ដើម្បីការពារកិត្យានុភាពរបស់រដ្ឋសភា ការពារកិត្តិយសនិងសេចក្តីថ្លៃថ្នូររបស់តំណាងរាស្រ្ត ឯកឧត្តមបណ្ឌិត ងួន ញ៉ិល ប្រធានរដ្ឋសភាស្តីទី បានប្រគល់ភារកិច្ចឲ្យអគ្គលេខាធិការដ្ឋានរដ្ឋសភាបញ្ជូនញត្តិនេះជូនឯកឧត្តម”

គួរបញ្ជាក់​ថា​កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន បានអះអាងថាលោកមានរូបភាពអ្នកនយោបាយល្បីឈ្មោះម្នាក់នាំស្រីទៅចូលសណ្ឋាគារមួយនៅទីក្រុងបាងកកប្រទេសថៃ។ ថ្វីត្បិតតែលោក ហ៊ុន សែន មិនបានបញ្ចេញឈ្មោះអ្នកនយោបាយនោះក៏ដោយ តែមជ្ឈដ្ឋានជាច្រើនគិតថាលោកនាយករដ្ឋមន្រ្តីសំដៅដល់លោក កឹម សុខា ដែលកំពុងរងការចោទថាមានរឿងអាស្រូវស្នេហា៕ រាយការណ៍បន្ថែម​ដោយ​លោក អ៊ឹង ប៊ុនថន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ