មីយ៉ាន់ម៉ាដកស្ថានភាពប្រកាសអាសន្ននៅរដ្ឋរ៉ាខីនបន្ទាប់ពីរឹតត្បិតសេរីភាពជិត​៤ឆ្នាំ​

ប្រធានាធិបតី​ជិតផុតអាណត្តិរបស់មីយ៉ាន់ម៉ាលោក ថេន សេន  បានប្រកាសដកភាពអាសន្ននៅក្នុងរដ្ឋរ៉ាខីននៃភាគខាងលិខនៃប្រទេសបន្ទាប់ពីរដ្ឋាភិបាល​ដាក់ការរឹតបន្តឹងសេរីភាពប្រជាជននៅក្នុងរដ្ឋ​ដែលមានជនជាតិភាគតិច​រ៉ូហ៊ីងយាកាន់សាសនាឥស្លាម​កំពុងរស់នៅច្រើន​មួយនេះជិត៤ឆ្នាំ។​

សារព័ត៌មានមីយ៉ាន់ម៉ាដកស្រង់សម្តីរបស់មន្ត្រីរដ្ឋាភិបាលចុះផ្សាយថា ការប្រកាសរបស់លោក ថេន សេន បានធ្វើឡើងកាលពីថ្ងៃអង្គារម្សិលមិញ។​​

រដ្ឋាភិបាលមីយ៉ាន់ម៉ាបានសម្រេចដាក់​រដ្ឋរ៉ាខីនក្នុងស្ថានភាពប្រកាសអាសន្នបន្ទាប់ពីមានហិង្សាផ្ទុះឡើងរវាងអ្នកភូមិកាន់សាសនាព្រះពុទ្ធនិងអ្នកកាន់សាសនាឥស្លាម កាលពីឆ្នាំ​២០១២ដែលបានបណ្តាលឲ្យមានមនុស្សស្លាប់ជាង២០០នាក់និងរាប់ម៉ឺននាក់ទៀតត្រូវបាត់បង់ផ្ទះសំបែងដែលជនជាតិភាគតិចររ៉ូហ៊ីងយ៉ាជាអ្នកប៉ះពាល់ខ្លាំងជាងគេ។​

លោក ថេន សេន ថ្លែងថាលោកមិនបារម្ភថាការប្រកាសដកស្ថានភាពអាសន្នចេញពីរដ្ឋនេះបង្កបញ្ហាអ្វីនោះទេ ព្រោះកម្លាំងការពារសន្តិសុខនៅតែដាក់ប្រចាំនៅទីនោះរហូតដល់ស្ថានភាពនៃការប្រឈមដាក់គ្នាបានប្រសើរឡើង។​

ទោះយ៉ាងណា​សេចក្តីប្រកាសព័ត៌មាន​របស់រដ្ឋបានប្រកាសថាកម្លាំងយោធារបស់ជាតិ​នឹងដកថយខ្លះពីការជួយរក្សាសន្តិសុខនៅតំបន់នោះ ពីព្រោះបច្ចុប្បន្ន​រដ្ឋរ៉ាខីនមិនមានការគំរាមកំហែងដល់អាយុជីវិត​របស់ទៀតទេ៕